भांगरभूंय | प्रतिनिधी
गांव- राज्य- देशाचो कारभार बरे तरेन चलोवपाक जाय जाल्यार दुडू गरजेचे. अर्थीक बाजू बळिश्ट आसले बगर राज्याचो रथ सुरळीत चलोवंक मेळना. ताका लागून सरकारां लोकां कडल्यान टॅक्स घेता आनी तो लोकां खातीरच्या साधन, सुविधांचेर वापरतात. एकल्याचो टॅक्स दुसऱ्याक सवलती, अनुदानां दिवपाक वापरतात. खरें म्हणल्यार संतुळीत उदरगत जाल्यार सवलती दिवपाचो वेळ येना. सैमीक संकश्टां आडवाद. मनीस, सेवा, वेवसायां वरवीं सरकाराक टॅक्स मेळटा. तातूंतलो एक म्हणल्यार सोरो विक्री. सरकारांक तरातरांच्या सोऱ्यां वरवीं अब्जांनी रुपया टॅक्स मेळटा. गोंयांक वर्साक सादारण 500 कोटी रुपया अबकारी कर मेळटा. सोरो, जुगार वायट आसलो तरी तो राज्याचो रथ चलयता. हालींच गोंय सरकारान मोपा आनी दाबोळी विमानतळांचेर दिसाचीं चोविसूय वरां सोरो विकपाक आनी पियेवपाक (पायलट सोडून) मेळचो म्हूण अबकारी नेमांनी दुरुस्ती केल्या. अर्थांत हो निर्णय कोणाक आवडूं वा ना आवडूं, पर्यटना खातीर तो मानून घेवचो पडटलो. मात गोंयच्या सोरो विक्रेत्यांक हाचो धपको बसपाची शक्यताय न्हयकारपाक येना. तांचे संघटणेन तसो हुस्कोय उक्तायला.
विमानतळांचेर सुरू जावपी ह्या बार्रां वा होलसेल सोरो विक्री दुकानां खातीर अबकारी नेमांत नेमके कितें बदल केल्यात? विमानतळां वयलीं दुकानां, बार्रां 24 वरां चालू आसतलीं. हरशीं रातीं 10 वरांचेर तीं बंद करपाक जाय. कांय फांतोड मेरेन उक्तीं आसतात, ही गजाल वेगळी. मध्यानरातीं पसून विमानां येतात, म्हूण बार्रांक वेळाचें बंधन घालूंक नासतलें! पंचायत वा पालिका वाठार जावं, एकल्याक एकूच सोरो विक्री दुकान, बार्रां घालूंक मेळटात. मात मोपा, दाबोळी विमानतळाचेर हो नेम आसचो ना. थंय गोंयांतलो वा उत्तर भारतांतलो कोणूय येवन बार्रांचो आंकडो थारला, तितलीं बार्रां एकलोच घालूं शकता. 15 वर्सांच्या राबित्याची अटूय नाका. ह्या बार्रांचें परवानो शुल्क चड आशिल्ल्यान सरकाराक चड येणावळ मेळटली. गोंयकार बारधनयांक हे नेम मान्य नात. ते तिडकल्यात. दोनूय विमानतळां वयले ‘मयखाने’ गोंयकारांच्या नांवार जाल्यार घडये ते शांत जायत. नाजाल्यार आंदोलन चालू जातलें, अशें चित्र दिसता.
सोऱ्याच्या विखारी विळख्याक लागून घरां-दारां उध्वस्त जाल्यांत. संवसार मातये भरवण जाल्यात. पूण गोंयांत बार्रांचो आंकडो उणो जावंक ना. 1998 त कितले बार आशिल्ले आनी आयज 25 वर्सां उपरांत तांचो आंकडो कितलो वाडला, ताचो प्रत्येकान अभ्यास करचो. भयानक चित्र दिश्टी पडटलें. खरें म्हणल्यार गोंयांत ‘बार बार देखो, हजार बार देखो’ अशी परिस्थीती आसा. म्हणटकूच 10 वर्सां पयलींच नव्या बार्रांक परवाने दिवप बंद करपाक जाय आशिल्लें. पूण आयज पसून शारांनी नवो बार चालू जाता. गोंय पर्यटन राज्य जाल्ल्यान हांगां सोरो खूब खपताच, पूण आतां खानदानी पयशेकार आनी नवश्रीमंतां मदीं ताळ्यांत पेगार पेग ओतपाची सर्त लागल्या. व्हडल्यो संस्था, क्लब तर म्हयन्याक एकतरी ओली पार्टी करतात. बायलोय दादल्यांच्या ग्लासाक ग्लास लावन पियेवपाक शिकल्यात. स्टेटसा खातीर पिवचेंच पडटा खंय. पडूं. मात गोंयांत सोऱ्याचे व्हाळ व्हांवतात, हें कोणाकूच न्हयकारपाक मेळचें ना. सोऱ्याचे नशेंत व्हडले अपघात पसून जाल्यात. निश्पाप लोकांक चूक नासतना जीव व्हगडावचो पडला.
सोरो विक्रेत्यांचे संघटणेन गोंयकार सोरो वेवसायिकांचेर परिणाम जातलो अशें म्हणलां तें बरोबर आसा आनी चुकय! विमानतळा वयल्या बार्रांचो हेर बार, सोरो विकपी रॅस्टोरंण्टांक व्हडलोसो धपको बसचो ना. पूण जे होलसेल सोरो विकतात, तांचे येणावळीचेर परिणाम जावं येता. कारण शारांनी परमिटाचेर बाटल्यो व्हरपाक घिट्टी घालपी पर्यटक वजें घेवन भोंवपाक नाका म्हूण आतां विमानतळा वयल्यान परस्पर सोरो व्हरपाक शकतात. पूण सगलेच पर्यटक विमानान येनात, हाचोय विचार गोंयच्या वेवसायिकांनी करचो.
गोंयांत खासा सोरो पियेवपाक, जुगार खेळपाक…. कांय पर्यटक येतात. सोऱ्या पसून भरपूर येणावळ येता. सोरो पियेवपी ड्रायव्हरां कडल्यान तालांव मेळटा. अपघातूय वाडल्यात. तरीय सरकारान विमानतळांचेर नवे बार सुरू करपाचो निर्णय कांय जाणांक आवडूंक ना. गोंयांत दर 500 मिटरांचेर (शारांनी 200 मिटरांचेर) एक बार आसतना पर्यटकांक बाटली व्हरपाक वा पियेवपाक व्हडलेशे त्रास पडचे नाशिल्ले, अशें तांचें म्हणणें…. घडये ‘अतिथी देवो भवः’ हो विचार विमानतळा वयल्या बार्रां
फाटल्यान आसुये.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
