भांगरभूंय | प्रतिनिधी
डॉ. जयंती नायक हांच्या ‘तिची काणी’ पुस्तकाक पुरस्कार
पणजी: अंदूंचो विमला व्हि. पै पुरस्कार गोंयची नामनेची साहित्यीक डॉ. जयंती नायक हिका जाहीर जाला. तिच्या ‘तिची काणी’ ह्या पुस्तकाक हो पुरस्कार मेळ्ळो.
‘तिची काणी’ हें तीन व्हडल्या कथांचें पुस्तक. आवय, चली, घरकान्न ह्या रुपांत बायलेन खूब कितें सोसलां. ह्याच विशयाचेर हें पुस्तक जावन आसा.
डॉ. जयंती नायक ही केपें म्हालांतल्या आमोण्यां गांवांत रावता. ती आपल्या लिखाणा वांगडा लोकवेद संशोधिका म्हणूनय फामाद आसा. तिणें म्हैसूर विद्यापिठांतल्यान समाजशास्त्र आनी लोकवेद विशयांत पद्वूत्तर पद्वी मेळयल्या. गोंय विद्यापिठांतल्यान तिणें लोकवेदांत पिएचडी घेतल्या. कोंकणी विशयांत पीएचडी मेळोवपी ती पयली.
कोंकणी, मराठी, हिंदी भासांनी कथा, कविता, नाटक, निबंध, अनुवाद, बालसाहित्य अश्या विवीध प्रकारांनी तिणें लिखाण केलां. तिचीं 49 पुस्तकां प्रकाशीत जाल्यांत. भांगरभूंय, गोवनवार्ता वांगडा विवीध दिसाळ्यांनी ती नेमान बरयता. गोवा कोंकणी अकादमींतल्यान ती निवृत्त जाली. अकादमीच्या ‘अनन्य’ ह्या अर्द वर्सुकी कॅलेंडराची ती संपादक. इंग्लीश, मराठी, हिंदी, तेलगू, मल्याळी, कन्नडांत तिच्या साहित्त्याचो अणकार जाला. लोकवेद विशयांतलीं तिचीं 21 पुस्तकां प्रकाशीत जाल्यांत.
डॉ. जयंती नायक हांचे वांगडा माणिकराव गावणेकार हांकां कोंकणी भास, साहित्य, अनुवाद आनी चळवळ ह्या मळार मोलादीक योगदान दिल्ले खातीर श्रीमती विमला व्ही. पै विश्व कोंकणी जीवन गौरव पुरस्कार फावो जाला. तशेंच वल्ली क्वाद्रोस हांकां श्रीमती विमला व्ही. पै विश्व कोंकणी कविता कृती पुरस्कार जाहीर जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
