भांगरभूंय | प्रतिनिधी
विपूल फडकेची गोंय क्रिकेट असोसिएशनाच्या (जीसीए) अध्यक्षपदाचेर निवड जाली. अध्यक्षपदा खातीर जाल्ले लडतींत ताणें चेतन देसाय पॅनलाच्या महेश देसायाक तीन मतांनी हारयलो. जीसीए कडेन संलग्न 107 क्रिकेट क्लबांनी हे वेंचणुकेंत मतदान केलें.
विपूल फडके हाचे पयलीं जीसीएचे सचीव म्हूण कार्यरत आशिल्ले. संघटनेच्या सचीवपदाचेर खोर्ली इलेव्हनाचे रोहन गांवस देसायाची बिनविरोध निवड जाली. जाल्यार भांडारी पदाचेर दया पागी, राजेश पाटणेंकार आनी रुपेश नायक हांची जोड सचीवपदाचेर निवड जाली.
उपाध्यक्षपदा खातीर शांबा देसाय हांची निवड जाली. 27 ऑक्टोबराक गोंय क्रिकेट असोसिएशनाची वेंचणूक जाली. हातूंत फडके पॅनलाचे विपूल फडके आनी रोहन गांवस देसाय वेंचून आयले. जाल्यार चेतन देसायाच्या पॅनलांतले शांबा देसाय, रुपेश नायक, दया पागी आनी राजेश पाटणेंकार हे वेंचून आयले.
आमी कशें काम करतात हाचो अणभव फाटल्या तीन वर्सांनी जीसीए कडेन संलग्न आशिल्ल्या असोसिएशनांनी घेतला. आपूण सचीवपदाचेर आसतना सगल्यो सर्ती वेवस्थीत जाल्ल्यो अशें वेंचणुके आदीं विपूल फडकेन म्हणिल्लें. सुरज लोटलीकार हांच्या अध्यक्षतायेखाला मंडळाचो कारभार पारदर्शक आनी जापसालदारकेन पुर्ण जाला. आमच्या पॅनलाक सुरज लोटलीकाराचो तेंको आसा अशें तांणी मुखार म्हणलें.
वेंचिल्ले पदाधिकारी
अध्यक्षः विपूल फडके
उपाध्यक्षः शांबा देसाय
सचीवः रोहन गांवस देसाय
जोड सचीवः रुपेश नायक
भांडारीः दया पागी
वांगडीः राजेश पाटणेंकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
