भांगरभूंय | प्रतिनिधी
भारताची कुस्ती खेळगडी विनेश फोगाट हिच्या रुप्या पदका वयलो निर्णय आतां आयज (11 ऑगस्ट) येतलो. ही म्हायती कोर्ट ऑफ आर्बिट्रेशन फॉर स्पोर्ट्सान (सीएएस) दिल्या.
काल शेनवारा भारताच्या वेळा प्रमाण रातच्या 9.30 वरांचेर सीएएस आपलो निर्णय दितलो अशी चर्चा आशिल्ली. पूण, कोर्टान निर्णय मुखार धुकल्लो. 9 ऑगस्टाक सीएएसान तीन वरां मेरेन ह्या प्रकरणाची सुनावणी केल्ली. भारतीय ऑलिम्पीक असोसिएशना (आयओए) वतीन वरिश्ठ वकील हरीश साल्वेन विनेशाची बाजू मांडली.
फायनल मॅची पयलीं विनेशाचें वजन 100 ग्राम चड आशिल्ल्यान अयोग्य घोशीत केल्ली. सुरवातीच्या मॅचीं वेळार विनेशाचें थारायिल्ल्या 50 कील वजना परस उणें आशिल्लें. ताका लागून विनेशान जोड रितीन रुप्या पदकाची मागणी केल्ली.
सीएएसान सांगलें, आमी विनेशाचे केशींतली प्रक्रिया जलद रितीन करीत आसात. पूण, तिच्या अपिलाचेर एका वरान निर्णय दिवप शक्य ना. हाचे पयलीं युनायटेड वर्ल्ड रेसलिंगाची बाजू आयकून घेवप गरजेचें आसा. निर्णय डॉ. अॅनाबेल बेनेट घेतली.
एका गटांत दोन रुप्यां पदकां दिवप शक्य आसा व्हय. असो प्रस्न विनेशाच्या प्रकरणांत आंतरराष्ट्रीय ऑलिम्पीक समितीचे अध्यक्ष थॉमस बाक हांकां विचारिल्लो. ताका जाप दितना तांणी म्हणलें, सामान्यपणान जाप ना अशी आसा.
आंतरराष्ट्रीय फॅडरेशनाच्या नेमाक पाळो दिवपाक जाय. पूण, सीएएस जो निर्णय दितले तो मानतले अशें तांणी मुखार सांगलें.
पॅरीस ऑलिम्पिकांत बायलांच्या 50 कील वजन गटाचे फायनली पयली विनेश फोगाटाक अयोग्य थारायिल्ल्या उपरांत तिणें कुस्तीतल्यान निवृत्ती जाहीर केल्ली.
6 ऑगस्टाक विनेशाक फायनलींत खेळपाचें आशिल्लें. पूण, कुस्तीच्या नेमां प्रमाण जे दिसा मॅच आसता त्या दिसा सकाळीं खेळगड्यांचें वजन तपासतात. विनेशाचें वजन तपासलें त्या वेळार 50 कील वजन गटा खातीर थारायिल्ल्या मातदंडा परस तिचें 100 ग्राम वजन चड आशिल्लें. ते उपरांत तिका फायनली खातीर अयोग्य थारायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
