भांगरभूंय | प्रतिनिधी
भारताची कुस्ती खेळगडी विनेश फोगाट हिका पॅरीस ऑलिम्पीक सर्तींत हक्काचें रुप्या पदक मेळटलें काय ना, हाचो निर्णय मंगळारा लागतलो अशी आस्त आशिल्ली. पूण, तिसरे खेपे निर्णय मुखार धुकल्लो.
कोर्ट ऑफ आर्बिट्रेशन फॉर स्पोर्ट्सान (सीएएस) काल नवीन तारीख दिली. निर्णय आतां 16 ऑगस्टाक रातच्या 9.30 वरांचेर जाहीर जातलो अशें सीएएसान सांगलें.
हाचे पयलीं 10 ऑगस्टाक सीएएसान निर्णय मुखार धुकलिल्लो. कोर्टान 9 ऑगस्टाक सुमार तीन वरां मेरेन ह्या प्रकरणाची सुनावणी केल्ली. ह्या वेळार विनेश ऑनलायन पद्दतीन उपस्थीत आशिल्ली. भारतीय ऑलिम्पीक असोसिएशना (आयओए) वतीन वरिश्ठ वकील हरीश साळवेन विनेशाची बाजू मांडली.
फायनली पयलीं विनेशाचें 100 ग्राम वजन चड आशिल्ल्यान तिका अपात्र थारायिल्ली. पूण, सुरवातीच्या मॅचीं पयलीं घेतिल्ल्या वजनांत विनेशाचें वजन श्रेणीच्या निर्धारीत मर्यादे परस 50 कील उणें आशिल्लें. ताका लागून विनेशान जोड रितीन रुप्या पदकाची मागणी केल्ली.
दिसाक तीन बावट खेळ्ळ्या उपरांत विनेश फोगाटाक वजन 2 कील वाडिल्ल्याचें कळ्ळें. ते उणें करपा खातीर विनेशान आदले रातीं कडेन व्यायाम करून वजन उणें करपाचेर भर दिलो. कांय मिडिया रिपोर्टा प्रमाण तिणें कुडींतलें रगत काडले आनी केस लेगीत कापले. इतकें करून लेगीत तिचें वजन 100 ग्राम चड उरलें. ताका लागून तिका फायनली खातीर अपात्र थारायली.
सीएएसान म्हणिल्लें की, आमी विनेशाच्या खटल्यातले प्रक्रियेक गती दीत आसात, पूण, तिच्या अपिलाचेर एका वरांत निर्णय दिवप शक्य ना. ह्या प्रकरणांत पयलीं युनायटेड वर्ल्ड रेसलिंगाची बाजू आयकून घेवप गरजेचें आसा.
विनेशाच्या प्रकरणांत रिपेचेजाचेर प्रस्न चिन्न
विनेश प्रकरणांत जपानाची कुस्ती खेळगडी युई सुसाकी हिचे रेपेचेज सर्तींत कांश्या पदकाच्या सहभागाचेर प्रस्न चिन्न उप्रासपाक लागल्यात. 50 कील वजन गटांत संवसारीक वस्ताद आनी ऑलिम्पीक पदक जैतिवंत युई सुसाकी प्री-क्वॉर्टरफायनलींत विनेश कडल्यान हारिल्ली. विनेशाक फायनली पयलीं अपात्र थारायली. तिचें कारण म्हणल्यार 50 कील परस चड 100 ग्राम आशिल्लें.
विनेशाचे सुवातेर सेमी फायनलींत तिच्या कडल्यान हारिल्ली क्युबाची युस्नेलिस गुझमन ही फायनलींत अमेरिकेचे सारा हिल्डब्रॉट हिच्या आड खेळ्ळी. अशे परिस्थितींत सुसाकीक रिपेचेजांत खेळपाची परवानगी दिल्ले खातीर युनायटेड वर्ल्ड रेसलिंगेचेर (यूडब्ल्यूडब्ल्यू) प्रस्न उप्रासपाक लागल्यात. कारण विनेशाक अपात्र थारावन तिका फायनलींत खेळपाक दिवंक ना जाल्यार सुसाकी कशी खेळटली असो प्रस्न मुखार आयला.
यूडब्ल्यूडब्ल्यूच्या नेमा प्रमाण, एखाद्रो खेळगडो फायनलींत पावपी खेळगड्या कडल्यान आदीं हारला आसत जाल्यारूच तो रेपेचेजांत कांश्या पदका खातीर पात्र थारपाक शकता. ताका लागून विनेशाक अपात्र थारावन निमाणी सुवात दिली. जाल्यार प्री-क्वॉर्टरफायनलींत विनेशा कडल्यान हारपी सुसाकी रेपेचेजांत कशी पावली आनी कांश्या पदक कशी जिखली असो प्रस्न उप्रासता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
