भांगरभूंय | प्रतिनिधी
राष्ट्रकूल संसदीय संघाच्या परिशदेचो समारोप
पणजी: सभाघराच्या कामकाजांत सेगीत आडमेळीं हाडल्यार वा विधीमंडळाक उणो काळ दिल्यार लोकप्रतिनिधींक तांचे घटनात्मक कार्य करपाची संद मेळना. हाका लागून फावोश्या काळा खातीरचें अधिवेशन आसप गरजेचें आशिल्ल्याचें मत राज्यपाल पुसापती अशोक गजपती राजू हांणी उक्तायलें. राष्ट्रकूल संसदीय संघाच्या परिशदेच्या समारोप सुवाळ्यांत ते उलयताले. ह्या वेळार लोकसभा अध्यक्ष ओम बिर्ला, सभापती गणेश गांवकार, उपसभापती ज्योशुआ डिसोझा हाजीर आशिल्ले.
राज्यपालांनी मुखार म्हणलें, चर्चा, मतभेद हीं लोकशायेचीं लक्षणां आसात. अश्यो चर्चा नेमा प्रमाण आनी सन्मानपूर्वक पद्दतीन जावप तितलेंच म्हत्वाचें आसा. धोरणां तयार करपा खातीर विधीमंडळ संस्था म्हत्वाच्यो आसात. हाका लागून तांच्या कामकाजाचो काळ फावोसो आसप गरजेचें आसा. सभाघरांत दिल्ल्या वेळेचो वापर लेगीत योग्य कारणा खातीर जावंक जाय. विधीमंडळ वांगड्यांनी योग्य पद्दतीन वादविवाद करप हें लेगीत तितलेंच म्हत्वाचें आसा.
तांणी मुखार म्हणलें, विधीमंडळ वांगड्यांनी सभाघरांत लोकांच्यो समस्या मांडच्यो. विरोधी पक्ष हे फक्त राजकी विरोधक नात. ते लोकशायेच्या साच्यातले एक घटक आसात. प्रस्न उपस्थीत करप, वेगळो दृश्टीकोन मांडप हे वरवीं विरोधी पक्ष लोकशायेक आनीक घटमूट करतात. सत्ताधारी आनी विरोधकांनी घटताम्क जबाबदाऱ्यो पार पाडल्यो, तांणी नेमा प्रमाण एकवटीतपणान काम करीत जाल्यार ते लोकशाये खातीर उपेगी थारता. हे परिशदेंत मांडिल्ल्यो संकल्पना विधीमंडळ संस्थे सयत लोकशाय आनीक घटमूट करपा खातीर उपेगी थारतल्यो.
गोंयच्यो दर्यादेगो, सुंदर सैम हाका लागून हांगा आयले उपरांत वेगळीच उर्जा मेळटा. गोंयांत पार पडिल्ली ही परिशद इतिहासीक थारतली. हांगा जाल्ल्या संवादांतल्यान फुडारांतलीं धोरणां थारतलीं. हांगा मेळिल्ल्या अणभवाचो वापर लोकप्रतिनिधींनी आपल्या मतदारसंघाचो विकास करपा खातीर करून घेवचो अशें लोकसभेचे अध्यक्ष ओम बिर्ला हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
