भांगरभूंय | प्रतिनिधी
धर्म आनी अधर्माचें चॅटिंग करतना व्यक्तीचें नांव घेवन आरोप नाकात. सोशल मिडियाची भास, मिम्स सांबाळात. कित्याय कितें छापल्यार, अर्थाचो अनर्थ केल्यार, गाडव, वाग, बुकलो, माकड, मोर, बैल म्हणून विधानसभेंत मंत्री, आमदारांनी एकामेकां कडेन बोटां दाखयल्यार पत्रकारय हांसतात, पूण छापतात? छापपाचेर, विधानसभा लायव्हचेर मर्यादा आयल्या. फाटल्या घडणुकांचे देखींतल्यान माफी मागत साडे तीन दसकांतले तुमी आमी पत्रकार शिकले, सुटले. शिमो घट मतींत दवरल्यार भिवपाची गरज ना, आपसूक लिखाण, कम्पोजिंग, टॅक्स्टिंग, खबरेचें संपादन सादूर रावन जाता. चुको दाखोवपी, चुकांची माहिती लोकप्रतिनिधीं कडेन पावयल्यार सभाघर माथ्यार घेवपी आसात कितले? व्हिज्युवल मिडियाकय संपादीत केल्ल्यो लायव्ह खबरो दाखोवच्यो पडटात.
आदिलशहाच्या राजवाड्यांतलें विधानसभेचें सभाघर, लखोबा लोखंडे आनी बांकाच्या यादींचें गांठवल बांदलां? तिगलां? साडे तीन दसकांतले पत्रकार आमदार, मंत्र्यांच्या फाटल्यान पणजे सावन पर्वरे गेले, प्रॅस रूमय मेळ्ळो, नव्यो सुविधाय जाल्यो, बोवाळ वाडलो पूण दाखय, लिपय अती जालें, सॅक्युरिटी तपासप खर जालां. नो टॅन्शन म्हणपी पत्रकारांकय आयज केन्ना एकदां पावसांतलें विधानसभा अधिवेशन सोंपता अशें जाता तें कित्याक? एअरकण्डिशन गॅलरींत, प्रॅस रूमांत कुडकुडत बसून खबरो दितना पत्रकारय नाकाक लेंस लावन बसतात. त्या भायर म्हुट्ट्यांचो वास येता अशे थोमणे मारपी पयलींचे सभापती, उपमुख्यमंत्री दयानंद नार्वेकार, थोमण्यांनी जापो दिवपी आदले केंद्रीय कायदो मंत्री रमाकांत खलप, आदले मुख्यमंत्री मनोहर पर्रीकार, स. काशिनाथ जल्मी विधानसभेंत नात. खबरोय भौमाध्यमांतल्यान खिणांत सत्तरी ते काणकोण मेरेन पावोवपी पत्रकार लौकीक शिलकार, महेश घाडी, वासुदेव पागी, पुजा नायक, गणेश जावडेकार, संपादपी पांडुरंग गांवकार, किशोर नायक गांवकार, अवित बगळे आनी हेर ज्युनियर, सिनियर आसात. दुसर्य़ा दिसा दिसाळ्यां खातीर त्योच खबरो माथाळे फिरोवन दिवपीय तेच.
मांडवी न्हंयचे देगे वयल्या आदिलशहाच्या राजवाड्यांतले माळयेर आशिल्लें विधानसभेचें सभाघर ए सी विना देखणे जातालें आमदारांचे डिबेटी खातीर. उंचेल्या पांवड्याचे डिबेटीची परंपरा उणी जायत गेली तरी पणजे, पर्वरे विधानसभा संकुलांतलें विधानसभेचें सभाघर विधायक. राज्याचे कायदे थंयच जातात, केंद्रीय कायद्यांचेर गरजे वेळार म्होर थंय मारची पडटा. लोकांक जांच करपी प्रस्नाचेर, भ्रश्टाचेर माहिती मेळोवप, आवाज उठोवपाचें साधनय विधानसभाच. आदले वरी सभाघराचे बांयंत धांवत वचपी आमदार आलेक्स रेजिनाल्ड लॉरेन्स आयज सरकारांत आसा. विरोधी पक्ष मुखेलीपद मेळिल्लें नासत, बोवाळय कमी जाला आसत, पूण आमदार विजय सरदेसाय स्ट्रॅटेजिस्ट जातात. बांयंत चड उडयो मारप ना पूण चडांत चड माहिती मेळोवप, उदरगती पासत सरकारी निधी मेळोवपाची कला तांकां कळ्ळ्या. विरोधी पक्षाक तांचोच आयज व्हड आदार. पत्रकारांनी हालीं न पळयल्ली, आडनदर केल्ली कला अकादमी, मडगांवचें रवींद्र भवन ते विधानसभे मुखार हाडटले? फातोड्डेंय नॅशनल गेम्स जावच्यो, ग्रावंड सारको जावचो म्हणून ते खेळामंत्र्यांच्या फाटल्यान लागतलेच. मुख्यमंत्री डॉ. प्रमोद सावंत तांच्यो मागण्यो मान्य करपाक हरकत ना अशें तरी म्हणटलेच. आदले काँग्रेसवाले मंत्री, आमदार तांकां मार्गदर्शन करपी तांचे वांगडा आशिल्ल्यान सरकार आनी विरोधकांचें भितरलें राजकारण पत्रकारांक, कार्यकर्त्यांक खबर नासता? दिसाळ्यांतल्यान तें सांगपी संपादपी सदगुरु पाटील आयज एकादरेच. प्रुडंट मिडियांतल्या हेड ऑनांतल्यान भितरल्यो खबरी काडून घेवपाची, दिल्ले खबरेंतलें राजकारण सत करून दाखोवपी विश्वास जोडिल्ले संपादपी प्रमोद आचार्य एकलेच.
वाऱ्यार (आकाशवाणी) वचून विधानसभेचो नियाळ करपीय आसतले, वाचपी आनी आयकुपीय आसात. आकाशवाणी खातीर नियाळ बरोवपाचो वावर करपी ज्येश्ठ पत्रकार र वी प्रभुगांवकार हांचीं पुस्तकां परत प्रकाशीत जायत? सरकाराचें बजेट फोडपी तेय एकसुरेच, टीमवर्क आसुंये. पयलींच्या मुख्यमंत्र्यांचे सत्तरीच्या खाशेंचे प्रतापसिंह राणे हांचे कडल्यान एक्सक्लुजिव खबरो मेळोवपी पत्रकार म्हणून तांकां वळखताले.
सत्तेंतल्या विरोधांतल्या राजकारणांत हात भाजून घेवपी पत्रकारय आसात. भायर बेकी, भितर एकी हें राजकारण वळखुपाची तांक पत्रकारांक अणभवांतल्यान येता. महाराष्ट्रांतले पक्षांतरांचे वारें व्हांवता तेन्ना गोंयचीं पक्षांतरां पत्रकारांक दिसतात पूण ज्या राज्यांत गोंयचे आदीं पक्षांतरांनी इतिहास घडयला, कायद्यांनी बांदून दवरला तो विसरायेर पडटा. गोंयांतलें पयलें व्हड पक्षांतर घडोवन हाडपी फुडारी शेतकाम मंत्री रवी नायक विधानसभेंत आयजय आसात, जैत आनी हार (पराभव) खावनूच तांणी आपले वारसदार घडयल्यात. तांचे आड झुजपी भाई खलप हेय रवीबाबांच्या राजकारणाची तोखणाय करतले. पक्षांतरा वेळार पत्रकाराच्या घराय आलाशिरो घेवपी आमदार आसतात. ती काणी विखुरिल्ल्या पानांनी वाचुया. पावस घसघशांनी येतलोच, विधानसभेंतल्या खबर्य़ांच्या पावसांत भिजतना सांबाळात.
सभाघरांत मोसमी म्हुट्ट्यांचो वास येता हें विधानसभेंत हांसत हांसत अविश्वास थारावा वेळार सांगपी नार्वेकारबाब राजभास विधेयक मंजूर करून घेवपी सभापती. पत्रकारांनी तांचे आडच खबरी चड दिल्यो, पूण ते सुटले. तांचेंय बंड खाशें आड पूण शिस्तीन, कायद्यान. आदवोगाशीच केल्ली जाल्यार ते तशेंच खलपबाब सर्वोच्च न्यायाधीश जावपाचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
