विधानसभेचें पावसाळी अधिवेशन सुरू
भांगरभूंय | प्रतिनिधी
पणजी: विधानसभेचें पावसाळी अधिवेशन आयज सुरू जालें. २१ जुलय ते ८ ऑगस्ट ह्या काळांत तें चलतलें. अधिवेशना खातीर ७८९ तारांकीत, जाल्यार ३,३३० अतारांकित प्रस्न आसात. लॉटरी पद्धतीन ह्या प्रस्नांचेर चर्चा जातली. मजगतीं, मुख्यमंत्री कामकाज सल्लागार समितीचो अहवाल सभाघरांत सादर करतले. मुख्यमंत्र्यांनी सादर केल्ल्या अर्थसंकल्पाचेरूय चर्चा जातली.
आयज ११.३० वरांचे सुरू जाल्ल्या पावसाळी अधिवेशनांत कितें घडलें तें पळयात:
-सुरवातेकूच कोळशाच्या प्रस्नाचेर विधानसभेंत बोवाळ जालो. तारांकीत प्रस्न अतारांकीत केल्ल्यान विरोधी फुडारी युरी आलेमांव जाले आक्रमक. ही ३- ४ हजार कोटींची भानगड आशिल्ल्याचो युरी आलेमांव हांचो गंभीर आरोप.
-गृह निर्माण मंडळाच्या प्रश्नाचेर जाप दितना मुख्यमंत्री डॉ. प्रमोद सावंत हांणी सांगलें, २०११ चे जनगणने प्रमाण पीएम आवास येवजणे खातीर कांय जाण पात्र थारतले. ताचेर फेरविचार करपाक केंद्राक सांगलां. परवडपी घर येवजणे खाला पेडण्यां सुवात सोदपाक जिल्लोधिकार्यांक कळयलां.
-आमदार उल्हास तुयेंकार हांणी गोंयकारांक दर परवडा सारकें नाशिल्ल्यान हावसिंग बोर्डाच्या पावणी पद्दतींत बदल करपाची मागणी सभाघरांत केली. तांचे मागणेक जाप दितना मुख्यमंत्री डॉ. सांवत हांणी सांगलें, हावसिंग बोर्डाच्या सुवातीं खातीर ३० वर्सांचें गोंय राबितो प्रमाणपत्र आसपाक जाय. सध्या फकत गिरेस्तांक ई-पावणेंत सुवाती मेळटात जाल्यारूच धोरणांत बदल करतले.
-रो रो फेरी विशीं उलयतना न्हंय येरादारी मंत्री सुभाष फळदेसाय हांणी सांगलें, चोडण पंचायत आनी थळाव्यांचो रो रो फेरयेक विरोध आसल्यार आदल्योच ६ फेरीबोटी चालोवपाची सरकाराची तयारी आसा. मात पंचायत आनी थळाव्यां कडल्यान सरकारा कडेन तसो प्रस्ताव येवप गरजेचें.
– सरकारी खात्यांत, म्हामंडळांत, पालिकेंनी काम करपी सगल्या दिसपट्ट्या पगारी (रोजंदारी) कर्मचाऱ्यांक मेळटलो ‘टेम्पररी स्टेटस’ . 1 ऑगस्ट सावन मेळटलो लाव. ह्यान फुडें दिसपट्ट्या पगाराचेर भरती ना: मुख्यमंत्री
-गोंयांत जबरदस्तीन धर्मांतर करपा आड कायदो हाडपाची येवजण आसा. सगळ्यांनी हाका तेंको दिवचो. भाडेकरू बेकायदेशीर कारवायेत सांपडल्यार घर धनयांचेरूय कारवाय जातलीः मुख्यमंत्री
-आयेशा उर्फ निक्कीचे आवय-बापूय गोंयांत रावताले. ह्या प्रकरणांत गोंय पुलीस उत्तर प्रदेश पुलिसांच्या संपर्कांत आशिल्ले. ह्या प्रकरणाचो फुडलो तपास सुरू आसा. पूण सध्या हे विशीं फुडली म्हायती दिव शकनाः मुख्यमंत्री
-दर वर्सा हजारांनी भक्त वेलंकिणीक वतात. सरकारान थंय जमीन घेवन भक्तां खातीर ‘गोंय सदन’ बांदचे : डिलायला लोबो, आमदार
(अपडेटा खातीर पेज रिफ्रेश करची)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
