भांगरभूंय | प्रतिनिधी
आयज बार्देस उपजिल्होधिकाऱ्यां मुखार करतले हजर
म्हापशें: विधानसभा अधिवेशना वेळार सभाघरांत मिराबाग बंधाऱ्या आड फलक दाखोवपाचो प्रकार घडलो. ह्या प्रकरणांत सभापती गणेश गांवकार हांच्या कागाळीच्या आदारान आपा नायक, उपेंद्र नायक, उमेश नायक आनी हेमंत भंडारी (रा. मिराबाग) ह्या चार चाणांक प्रतिबंधात्मक कारवाये खाला पर्वरी पुलिसांनी अटक केली. ह्या प्रकारा वेल्यान विधानसभेच्या सुरक्षीततायेचो प्रस्न उप्रासला.
ही घडणूक काल (शुक्रारा) सकाळीं 11.30 वरांच्या सुमाराक घडली. अर्थसंकल्पी अधिवेशनाक सभापतींनी सुरवात करतकच विधानसभेचे गॅलरीत हाजीर आशिल्ल्या वयल्या दुबावितांनी ‘आमकां नाका बंधारा’ अशे तरेचे फलक दाखयले.
ह्या प्रकाराक लागून थोडो वेळ सभाघरांत गोंदळ जालो. विधानसभा सुरक्षा कर्मचाऱ्यांनी ह्या चारूय जाणांक गॅलरीतल्यान भायर काडले आनी तांकां ताब्यांत घेतले.
उपरांत दनपारां सभापती गणेश गांवकार हांणी ह्या प्रकारा विशीं रितसर पुलिशेंत कागाळ दाखल केली आनी दुबावितांक पुलिसांच्या ताब्यांत दिले.
पुलिसांनी दुबावितांक प्रतिबंधात्मक कारवाये खाला गुन्यांव नोंद करून अटक केली.
मजगतीं, चारूय दुबावीत विधानसभा अधिवेशनाचो अधिकृत पास घेवन भितर आयिल्ले. तांणी फलक आपले कुडीचेर लिपोवन हाडिल्ले आसुये असो दुबाव पुलिसांक आसून फुडलो तपास पुलीस निरिक्षक राहुल परब हांच्या मार्गदर्शना खाला पुलीस करतात.
मजगतीं, आयज (शेनवारा) दुबावितांक बार्देस उपजिल्होधिकाऱ्यां मुखार हजर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
