भांगरभूंय | प्रतिनिधी
विजय सरदेसायः जनता दरबाराक उत्स्फूर्त प्रतिसाद
भांगरभूंय । प्रतिनिधी
मडगांवः फातोड्डें आनी मडगांवचें नातें पोरणें आसा. पालिका मंडळ एक आसा. मडगांवां परतून एकदां उदरगतीचे दिशेन वच्चें, अशें लोकांक दिसता. ते खातीर पक्ष विरयतपणान एकठांय येवपाची गरज आसा. भाजपांतल्या कार्यकर्त्यांक सुवात नाशिल्ल्यान ते पक्ष सोडीत आसात. जे प्रस्न लोकांनी जनता दरबारांत मांडल्यात, ते विधानसभा अधिवेशनांत मांडटलों. हे मुखार दर प्रभागांतल्या लोकां कडेन संवाद सादतले, अशें आमदार विजय सरदेसासय हांणी सांगलें.
आमदार सरदेसाय हांणी सांगलें, जनता दरबारांत लोकांच्यो समस्या समजून घेतल्यो. ते उपरांत तांणी सांगलें, मडगांवां खूब समस्या आसात. पालिकेंतल्यो फायली गायब जातात. व्होटबँक सांबाळचे खातीर नाका थंय उड्डाणपूल बांदपाक प्राधान्य दितात. पालिकेंतल्या नगरसेवका वतीन चल्याक, घरकान्नीक नोकरी दिवचे खातीर एलडीसी भरतीची एकूच फायल फुडले प्रक्रिये खातीर धाडल्या. नगराध्यक्षपदाचो आदर आनी सन्मान जावपाची गरज आसा. पालिका मंडळ उजोवपाक आपणाक वेळ नाका, पूण आपूण तशें करचों ना, ते आपसूक पडटलें.
कोसळपाक पाविल्ले इमारतींत दुकानाक परवानो दिलो. मुख्याधिकाऱ्याच्या मतान परवानो रद्द केला, तरी लेगीत दुकान अजून चालू आसा. जिल्होधिकाऱ्याच्या आदेशा उपरांत फातोड्डेंच्या रस्त्या कुशीक पार्क करतात त्या गाडयांचेर, बेकायदो गाडयांचेर कारवाय जाली. मडगांवां कायदो लागना?, असो प्रस्न सरदेसाय हांणी केलो.
मडगांव पालिकेंतल्या महसुलाच्या पयश्यांचे भानगडीक कोणाचो तरी तेंको आसले बगर तें शक्य ना. पुलीस कागाळ जाले उपरांत लेगीत फुडली कारवाय करिनात, अशें सरदेसाय हांणी सांगलें. जनता दरबारांत भाजपा वांगडा आशिल्ले भाई नायक हांणी लेगीत हाजीर रावून मारुती मंदिरा लागसार उबारिल्ल्या पुतळ्याचो विशय मांडलो. तशेंच हॉटेल वेवसायिकांनी गाराणीं मांडलीं.
पर्यटन धोरणांत सगळ्यांचीं मतां समजून घेवचीं
पर्यटन धोरणाच्या नांवा खाला रॅस्टोरंण्ट, तावर्न अशे पर्यटन वेवसाय करपी सगळ्या आस्थापनांचेर 2 टक्के कर लावपाचो सरकारा कडल्यान कर लावपाचो आनी भरूंक ना जाल्यार 10 लाखांच्या दंडाची तजवीज करपाचे यत्न चल्ल्यात. गोंयांत शाश्वतताय सांबाळचे खातीर पर्यटन खातें कितें करतां, तें सांगचें. ह्या वेवसायिकांक 28 टक्के जीएसटी भरतना नाकापुरो जाता. पर्यटन विधेयक तयार करतना सगळ्या घटकांची मतां समजून घेवचीं, अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
