भांगरभूंय | प्रतिनिधी
विधानसभेंत प्रवेश करपाक तांकां घाली बंदी
पणजीः गोंय विधानसभेच्या अर्थसंकल्पीय अधिवेशनाचो पयलोच दीस खूब वादळी आनी नाटकी थारलो. मिराबागा प्रस्तावीत बंधार्याक विरोध करपी आंदोलकांनी विधानसभेच्या प्रेक्षक गॅलरींतल्यान तखटे दाखोवन सरकारा आड निशेध केलो. हे अनपेक्षीत घडणुकेक लागून सभाघरांत बरोच बोवाळ निर्माण जालो. सध्या खातीर ह्या चार जाणांक वयक्तीक हमी आनी सशर्त अटींचेर सोडल्यात. हे घडणुकेची गंभीरतायेन दखल घेवन प्रशासनान सध्याच्या अधिवेशनांत त्या चार आंदोलकांक विधानसभेंत प्रवेश करपाक बंदी घाल्या. तशेंच दर दिसा सकाळीं कुडचडें पुलीस स्टेशनांत येवन हाजेरी लावपाचेय तांकां निर्देश दिल्यात.
मजगतीं, शुक्रार अधिवेशनाचे सुरवातेक राष्ट्रगीत जाले उपरांत कामकाजाक सुरवात जातांच प्रेक्षक गॅलरींतल्या आंदोलकांनी अचीक तक्टे दाखोवन घोशणा करपाचो यत्न केलो. हाका लागून सभाघरांतल्या सुरक्षा वेवस्थेचेर व्हड प्रस्नचिन्न उबें जालां. हे घडणुके उपरांत पुलिसांनी आंदोलकांक ताब्यांत घेतले. चवकशे वेळार आंदोलकांनी आमदार विजय सरदेसाय हाचे कडल्यान विधानसभा पास मेळयल्यात अशें स्पश्ट केलें. पूण आमदाराक तांचे कृतीची कल्पना नाशिल्ली. तक्टे दाखोवन प्रलंबीत आशिल्ल्या प्रस्नांचेर सरकाराचें लक्ष ओडपा खातीर हें धाडसी पावल उबारलें अशें प्रसार माध्यमां कडेन उलयतना आंदोलकांनी सांगलें.
गांवांतले जायते लोक ह्या प्रकल्पाक विरोध करताले तरी सुरवातेक थोडेच मुखार येवपाक तयार आशिल्ले. प्रशासन चेंपण हाडपाक शकता हाचो भंय आशिल्ल्यान जायते जाण ओगी रावले. मात कोणेंय तरी मुखार सरून आवाज काडपाक जाय, हाका लागून चार जाणांनी आंदोलनाचो फुडाकार घेतलो. कसलेच तरेच्या वयक्तीक फायद्या खातीर न्हय, जाल्यार गांवच्या फायद्या खातीर उबे आसात अशें तांणी स्पश्ट केलें. धरण बांदल्यार न्हंयचो सैमीक प्रवाह बदलूं येता अशें मीराबाग वाठारांतले लोक सांगतात. हाका लागून शेती, नुस्तेंमारी आनी थळाव्या उदका स्त्रोतांचेर परिणाम जावपाची शक्यताय उक्तायल्या.
ह्या विशयाचेर सत्ताधारी आनी विरोधी पक्षां मदीं विधानसभा सभाघरांत खर वाद जातना दिसलो. फातोड्डेंच आमदार विजय सरदेसाय हांणी मिराबागांतल्या शेतकारांक जाल्ल्या लुकसाणाचो प्रस्न मांडलो. थळावे फाटल्या कितल्याशाच दिसां सावन मडगांवच्या लोहिया मैदानार निदर्शनां करतात. सरकार तांचे मागणे कडेन मुद्दम आडनदर करता असो आरोप तांणी केलो. हाचेर जलस्रोतमंत्री सुभाष शिरोडकार हांणी जाप दितना, विरोधक राजकीय फायद्या खातीर आंदोलकांना फूस लावन प्रकल्पा विशीं संभ्रम निर्माण करतात.
मुख्यमंत्री डॉ. प्रमोद सावंत हांणी हे घडणुकेचेर खर तिडक उक्तावन सभाघरांत हक्कभंगाचो प्रस्ताव मांडलो. आंदोलक गॅलरी मेरेन पावलेच कशें, हाची खोलायेन चवकशी करपाची मागणी तांणी सभापतींकडेन केली. तशेंच, ह्या प्रकल्पाक लागून कोणाचेच वयक्तीक लुकसाण जावचें ना, अशें आस्वासन आपणें ह्यान पयलींच आंदोलकांक दिल्लें, अशेंय मुख्यमंत्र्यांनी स्पश्ट केलें. सभापती गणेश गांवकार हांणी ह्या प्रकरणाचे चवकशेचे आदेश दिले.
मजगतीं, सभापतींनी उदका स्रोत विभागाक ह्या प्रकल्पाचें सविस्तर सादरीकरण लोकां मुखार मांडपाचे निर्देश दिल्यात, जाका लागून थळाव्यांच्या मनांतलो भंय पयस जातलो. शेनवार, १४ मार्चाक हे विशींचें सादरीकरण मिराबागच्या ग्रामस्थां मुखार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
