भांगरभूंय | प्रतिनिधी
राजन कोरगांवकारः पेडणेंच्यो समस्यां विशीं आमदाराचें मौन
भांगरभूंय । प्रतिनिधी
पेडणें: विधानसभा अधिवेशनांत पेडणेंचे आमदार प्रवीण आर्लेकार हांचो आवाज कोणें चेपलो असो प्रस्न मिशन फॉर लोकलचे राजन कोरगांवकार हांणी आमदार आर्लेकार आनी सरकाराक पत्रकार परिशदेंत विचारलो.
आमदार आर्लेकार हांणी विधानसभेंत कसले प्रस्न विचारले? पेडणें मतदारसंघांत ज्वलंत प्रस्न आनी विशय आसतना आमदारान ताचेर कित्याक लक्ष दिले ना? पेडणें मतदारसंघांत उदकाची गंभीर समस्या आसून लेगीत आमदारान ताचेर कसलोच आवाज काडूंक ना. मोपा विमानतळाचेर व्हड प्रमाणांत रोजगार दिल्यात अशें सरकार सांगता. पूण ते रोजगार कितल्या जाणांक आनी कोणाक दिल्यात, हाचेरूय आमदारान विधानसभेंत सरकाराक प्रस्न विचारूंक ना. मोपा विमानतळाचेर थळाव्यांक टॅक्सी स्टॅण्ड दितले अशें आमदारान पत्र दाखयिल्लें, त्या पत्राचें फुडें कितें जालें? सरकारान दिल्लें आस्वासन अजून मेरेन पाळूंक ना, हे विशीं आमदारान विधानसभेंत सरकाराक कित्याक विचारूंक ना, अशे प्रस्न कोरगांवकार हांणी उपस्थीत केले.
धारगळेच्या नियोजीत आंतरराष्ट्रीय क्रिकेट स्टेडियमा विशीं आमदारान विधानसभेंत कित्याक प्रस्न विचारूंक ना? सावळवाड्या वयलें इनडोर स्टेडियम पेडणेंच्या खेळगड्यां खातीर बांदिल्लें. मात तें जीएमआर कंपनीक भाड्याक दिलां, ते विशींय आमदारान कित्याक विचारूंक ना? धारगळेच्या आयुष हॉस्पिटलांत आतां मेरेन भुंयपुतांक कित्याक नोकऱ्यो मेळूंक ना, ते विशीं आमदारान सरकाराक कांयच विचारूंक ना. धारगळेचे डेल्टीन कोर्प कंपनीच्या प्रकल्पाचेर 90 टक्के रोजगार थळाव्यांक दिल्ल्याची चुकीची म्हायती येरादारी मंत्री मॉवीन गुदिन्हो हांणी दिली. अजून मेरेन तो प्रकल्प सुरू जावंक ना. घडये चार जाणांक सुरक्षारक्षक म्हूण दवरल्यात आसतले, म्हूण 90 टक्के नोकऱ्यो दिल्यात अशें मंत्र्यान सांगलां आसतले, ताचेरूय आमदार आर्लेकार हांणी तोंड उक्तें करूंक ना, अशें कोरगांवकार हांणी सांगलें. पीएफाच्या विशयाचेर मात आमदार आर्लेकार उलयले. मात हो विशय जरी व्हड आसलो तरीय ताचे परस पेडणेंकारांच्या हिताचे नदरेन व्हड आशिल्ल्या विशयांचेर मात ते तोंड धांवून ओगी बसले. पेडणेंच्यो समस्या आनी विशय विधानसभेंत मांडपाक आमदार आर्लेकार उणे पडले, ताका लागून आपल्याक पत्रकार परिशद घेवन उलोवचें पडटा. पेडणेंकारांक हें कळपाक जाय आनी सरकारान ह्या विशयांचेर गंभीरपणान लक्ष दिवपाक जाय, अशें कोरगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
