भांगरभूंय | प्रतिनिधी
पणजी: 2024 चे लोकसाभा वेंचणुकेंत गोंयच्या लोकांनी राज्यांतल्या भाजप उमेदवारांक 51.68 टक्के मतां दिल्लीं. प्रधानमंत्री नरेंद्र मोदी हांच्या फुडारपणा खाला केंद्रांतलें आनी डॉ. प्रमोद सावंत हांच्या फुडारपणा खाला गोंयांतलें भाजप सरकार बरी कामगिरी करीत आसा. ताका लागूनच 2027 चे विधानसभा वेंचणुकेंत भाजपाक 52 टक्क्यां परस चड मतां मेळटलीं हाचेर आपलो ठाम विस्वास आशिल्ल्याचें भाजप प्रदेशाध्यक्ष दामू नायक हांणी आयतारा ‘भांगरभूंय’ कडेन उलयतना सांगलें.
भाजप प्रदेशाध्यक्षपद म्हूण शंबर दीस पुराय जाल्ल्याच्या निमतान दामू नायक हांचे कडेन संपर्क सादलो तेन्ना पक्ष संघटणेक घटाय दिवपा खातीर आपूण राबयत आशिल्ल्या खूबशा उपक्रमांचो तांणी नियाळ घेतलो. प्रदेशाध्यक्ष ह्या नात्यान पक्षाक दरेक मतदारसंघांत घटसाण दिवप हें आपलें पयलें कर्तव्य आसा. तेच खातीर आपणे दरेक मतदारसंघांत कार्यकर्त्यांचो मेळावो घेवपाक सुरवात केल्या. कार्यकर्त्यांच्या मेळाव्या निमतान आपूण दरेक मतदारसंघांतल्या तळागाळांतल्या भाजप कार्यकर्त्यां मेरेन पावून म्हजी आनी पक्षाची भुमिका तांचे मुखार मांडत आसा. ताका लागून भाजप कार्यकर्त्यां मदीं परतून एकदां उमळशीक वाडल्या. येता त्या काळांत जिल्हो पंचायत, पालिका आनी विधानसभा वेंचणुकांक आमकां सामकार वचपाचें आसा. ह्यो सगल्यो वेंचणुको स्वबळार जिखपाच्या निश्चेवानूच आमी काम करीत आसात अशें दामू नायक हांणी स्पश्ट केलें.
पयसाविल्ल्यांक परतून पक्षांत हाडटलों!
विवीध कारणांक लागून पक्षा पसून पयस जाल्ल्या पोरण्या कार्यकर्त्यांक परतून पक्षांत हाडपाचो यत्न आपूण करीत आसां. 2027 वर्सा घसघशीत येस मेळोवन गोंयांत परतून भाजपाचें सरकार स्थापन करपाचो निश्चेव सगल्या कार्यकर्त्यांनी केला. तातूंत पोरण्या कार्यकर्त्यांचें योगदानूय म्हत्वपूर्ण थारतलें अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
