भांगरभूंय | प्रतिनिधी
दामू नायक : 27 परस अदीक सुवातांची मोख आशिल्ल्याचें स्पश्ट
भांगरभूंय । प्रतिनिधी
पणजी : फुडले विधानसभा वेंचणुकेंत भाजपाक 52 टक्क्यां परस अदीक मतां आनी 27 परस अदीक सुवातो मेळोवपाच्यो आसात. हे खातीर कार्यकर्त्यांनी आतां सावनूच तयारी करप गरजेचें आसा, अशें मत प्रदेशाध्यक्ष दामू नायक हांणी उक्तायलें. बुधवारा पणजे जाल्ल्या उत्तर गोंय सक्रीय कार्यकर्त्यांच्या मेळाव्यांत ते उलयताले. ह्या वेळार मुख्यमंत्री डॉ. प्रमोद सावंत, केंद्रीय मंत्री श्रीपाद नायक, खासदार सदानंद शेट तानावडे, मंत्री आनी आमदार हाजीर आशिल्ले.
दामू नायक हांणी सांगलें, कांय दिसां आदीं आपल्याक प्रधानमंत्री नरेंद्र मोदी हांचे कडेन उलोवपाची संद मेळ्ळी. ह्या वेळार तांणी आपले कडेन गोंयांत फुडें कितें अशी वासपूस केली. तांकां आपणे फुडले विधानसभा वेंचणुकेंत भाजपाच्या मतांची टक्केवारी आनी सुवातो वाडोवपाचो निश्चेव केला, अशें सांगलें. भाजपाक 33.36 टक्क्यां वयल्यान 52 टक्क्यां फुडें वचपाचें आसत जाल्यार कार्याकर्त्यांनी वावराक लागप गरजेचें आसा. गुजरात राज्यान मतांची टक्केवारी वाडोवन दाखयल्या. आता आमीय तशें करून दाखोवया.
आमकां 52 टक्के मतां जाय जाल्यार चोळिसूय मतदारसंघांत वेंचणूक लडोवची पडटली. ते खातीर आपल्याक सगळ्या तरेच्या कार्यकर्त्यांचो सांगात जाय. 2027 त 27 परस अदीक सुवातो जिखपाच्यो आसत जाल्यार पोरण्या, ज्येश्ठ कार्यकर्त्यांक घेवन मुखार वच्चें पडटलें. पक्ष सोडून गेल्लो कार्यकर्तो हो मूळ पक्षाचोच आसा, हें लक्षांत घेवचें पडटलें. पक्षांत शिस्तीक म्हत्व आसा. श्यामा प्रसाद मुखर्जी, दीनदयाळ शर्मा हांणी घालून दिल्ले शिस्तीच्या मार्गाचेरूच पक्ष चलतलो, अशें दामू नायक हांणी सांगलें. मुख्यमंत्री डॉ. प्रमोद सावंत हांणी सांगलें. भाजपाच्या कार्यकर्त्यांनी केंद्र आनी गोंयांतल्या डबल इंजीन सरकारान केल्लीं उदरगतीचीं कामां, येवजण्यो, निर्माण केल्ल्यो साधन सुविधा सामान्य लोकां मेरेन पावोवप गरजेचें आसा. आतां सावन काम सुरू केलें जाल्यार 2027 त 27 परस अदीक सुवातो जिखप सहज शक्य आसा. वेंचणुकेंत जैत मेळोवपा खातीर कार्यकर्त्यांची भुमिका म्हत्वाची थारतली. नकारात्मक गजाली उलोवचे परस सरकाराच्यो सकारात्मक गजाली लोकां मेरेन पावोवच्यो, अशें तांणी सांगलें.
सोशल मिडियाचेर सक्रीय रावात : मुख्यमंत्री
भाजप कार्यकर्त्यांनी लोकां मदीं वावुरपा वांगडाच सोशल मिडियाचेर सक्रीय रावप लेगीत तितलेंच गरजेचें आसा. सरकाराचीं उदरगतीचीं कामां सोशल मिडियाच्या माध्यमांतल्यान लोकां मेरेन पावोवपाक जाय. सोशल मिडिया वयल्या नकारात्मक टिकेक योग्य पद्दतीन जाप दिवपाक जाय, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
