भांगरभूंय | प्रतिनिधी
पणजीः भाजपाच्या पदाधिकाऱ्यांनी भोवमतान गोंय विधानसभा वेंचणूक जिखपाची येवजण तयार केल्या. कार्यकर्ते, बूथ पांवड्यावेल्या पदाधिकाऱ्यांनी ताची अंमलबजावणी करची. 2027 चे वेंचणुकेंत दरेका बूथाचेर उण्यांत उणीं 50 टक्के मतां मेळोवपाचो संकल्प करचो असो सल्लो भाजपाचे राष्ट्रीय अध्यक्ष नितीन नबिन हांणी दिलो. शेनवारा पणजेंत जाल्ल्या कार्यकर्ता संमेलनात ते उलयताले. ह्या वेळार मुख्यमंत्री डॉ. प्रमोद सावंत, प्रदेशाध्यक्ष दामू नायक, केंद्रीय मंत्री श्रीपाद नायक, नगर नियोजन मंत्री विश्वजीत राणे आनी हेर मंत्री आनी आमदार हाजीर आशिल्ले.
नितीन नबीन हांणी सांगलें, गोंय भाजपा खातीर शुभ आसा. 2012त भाजप हांगा सत्तेर आयली आनी 2014 वर्सा केंद्रांत सत्ता मेळ्ळी. हाचे उपरांत लेगीत हो क्रम चालूच आसा. 2027 चे राज्याच्या आनी 2029 वर्साचे राष्ट्रीय वेंचणुकेंतूय भाजपाचें कमळ फुलतलें. फाटल्या 14 वर्सांत भाजपान गोंयांत जायती उदरगतीची कामा केल्यांत. हांगा विमानतळ, म्हामार्ग, फ्लायओव्हर बांदल्यात. भाजपा सरकार अंत्योदय तत्वाचेर काम करीत आसा. सुशासन दिवपा वांगडाच भाजपा राष्ट्र निर्माणाचें कामूय करता.
डबल इंजिन सरकारान केल्ली उदरगत भाजपा कार्यकर्त्यांनी लोकां मेरेन पावोवची. गोंयांत भाजपा सरकारान 33 हजार कोटी रुपयांची उदरगत कामां केल्यात हें लोकांक सांगपाक जाय. तेच बरोबर तांकां आदल्या काँग्रेस सरकारान केल्ल्या भ्रश्टाचाराची म्हायती दिवची. भारताच्या स्वातंत्र्या उपरांत खंयच्या फुडाऱ्यान गोंयची सुटका करपाक 14 वर्सां कळाव केलो तेंय सांगपाक जाय.
शिस्त, समर्पण आनी निर्धारान पक्ष संघटने वांगडाच देश मुखार व्हरपा खातीर वावुरया. राजकारण ही मॅरेथॉन, जंय गती परस स्टॅमिना चड म्हत्वाचो अशें नबीन हांणी सांगलें.
मुख्यमंत्री डॉ. प्रमोद सावंत हांणी सांगलें, नितीन नबीन हे भाजपाचे नवे बिग बॉस आसात. तांच्या गोंय भेटीक लागून गोंयांतल्या भाजपा कार्यकर्त्यां मदीं नवी उमेद आयल्या. भाजपाच्या डबल इंजिनान केल्ल्या उदरगतीच्या कामांक लागून आनी अंत्योदय तत्वाचेर केल्ल्या वावराक लागून 2027त गोंयांत भाजपा परतून सत्तेर येतली हाची आमकां खात्री आसा. महारपालिका, नगरपालिका आनी फोंडें पोटवेंचणूक लेगीत भाजपूच जिखतली.
2027त 27 जाग्यांचें ध्येय
दामू नायक हांणी सांगलें, नितीन नबीन हांणी केल्ल्या मार्गदर्शना प्रमाण कार्यकर्त्यांनी मुखार वच्चें. 2027 चे विधानसभा वेंचणुकेंत भाजपाक 27 जागे जिखोवन दिवचे हे आमचे ध्येय आसा. सेगीत चवथे फावट गोंयांत भाजपा सरकार हाडून प्रधानमंत्री नरेंद्र मोदीजी हांकां भेट दिवंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
