विधानसभा म्हळ्यार सरकाराचे लोक लागणुकेची माची

भांगरभूंय | प्रतिनिधी

‘ना खाऊंगा, ना खाने दुंगा’ ह्यो वेंचणूक घोशणा म्हूण बर्‍यो लागतात आयकुपाक. पूण प्रत्यक्षांत भ्रश्टाचार आपणें ना करप आनी भोंवतणच्यांक करपाक ना दिवप, करतात तांकां ‘म्हजो- तुजो’ म्हणी नासतना ख्यास्त दिवप हें जावंक जाय. तें जायना हें जनतेचें खरें दुख्ख!!!

अठरा दिसांच्या कामकाजाचें वर्सांतलें व्हडलें विधानसभा अधिवेशन निकतेंच सोंपलें. हालींच्या काळांतलें हें चड दिसांचें पावसाळी अधिवेशन. फाटलीं कांय वर्सां हें अधिवेशन 11-14 इतल्या दिसांत सरकार आटपी. पूण अंदूं हें अधिवेशन 18 दीस मेरेन चल्लें. कामकाज ह्या अधिवेशनांत म्हत्वाचें म्हळ्यार मार्च म्हयन्यांत मांडिल्लो अर्थसंकल्प मंजूर करप. ताचे पासत अर्थसंकल्पी मागण्यांचेर विस्तारान सभाघरांत भासाभास जाली. विरोधरांनी सरकार विधानसभा अधिवेशनां उण्यांत उणे दिसांत आटपिता म्हणून सातत्यान टिका केल्ल्यान सरकाराक हे खेपो अधिवेशन काळ वाडोवचो पडलो हें विरोधकांचें जैत. सरकाराचें म्हणणें आसता, सरकारी कामकाज चड ना. देखून अधिवेशनाचे दीस उणे आसतात. सरकार जर गंभीर तर नवे कायदे, दुरुस्त्यो, नवे विशय, अश्यो जायत्यो गजाली सरकार गंभीरपणान अधिवेशनांत हाडूंक पावता. हे खेपे अशें घडलां.
मुदलांत विधानसभा म्हळ्यार सरकाराचे लोक लागणुकेची माची. अर्थसंकल्पाक धरून ज्यो अनुदान मागण्यो खातेवार मांडप, विधानसभेची खर्चाक मंजुरी घेवप, खर्चिल्ल्या पयशांची लागणूक, ऑडीट विधानसभे मुखार दिवप, अश्यो गजाली लोकप्रतिनिधीक लोकशायेच्या नेमा प्रमाणें घडटात. सरकार जेन्ना हें उक्तेपणान करता तेन्ना तें सरकार लोकांचे परिक्षेक पास थारता. मंत्री जेन्ना प्रश्नोत्तराच्या वराक वेवस्थीत अभ्यास करून जापो दितात तेन्ना ते लोक-परिक्षेक पास जातात, ना तर लजेक पडटात. नवे कायदे, विधेयकां सरकार हाडटा तेन्ना तांचेर भासाभास जाता आनी तांतल्यो चुको, उणीं-दुणीं भासाभाशेंतल्यान भायर येतात. सरकाराक कितें लिपोवन करपाचें आसत तर ताचो ‘पडदा-फास’ जाता. विरोधी आमदारांक खाजगी दिसांच्या कामकाजाच्या थारावांतल्यान सरकाराक बरे विशय हाडपाक, कायदे करपाक, सुचोवण्यो दिवपाक संद मेळटा. भ्रश्टाचाराचेर बडी मारूंक मेळटा. विधानसभेंत लक्ष ओडपी थाराव सारके विशय चालंत गंभीर विशयांचेर सरकाराक शिटूक करपाक, कामाक लावपाक, जापसालदारकेची जाणीव दिवपाक उपकारा पडटा. जशे राज्यांत वाडत वचपी जीवघेणे रस्तो अपघात.
विधानसभा जाली म्हणजे सरकार, मुख्यमंत्री – मंत्री एक सुस्कार सोडटात, ‘सुटले एकदांचे…’ असो. पूण तें समा न्ही. खरी सरकाराची कसोटी ताचे उपरांतच आसता. ह्या म्हत्वाच्या अधिवेशनांत म्हालेखपालांचो सरकाराच्या अर्थीक कामाच्या ऑडीटाचो 2022 वर्साचो अहवाल मांडिल्लो आसा. तातूंत सरकाराच्या नश्ट खर्च, चुकीचे खर्च, अर्थीक गैर कारभार हांचेर उजवाड घाला. हांचेर सरकारान जापो दिवंक जाय. हें काम गंभीरपणान जावंक जाय.
अर्थसंकल्प मंजूर जालो. आतां वर्सभर तो चालीक लायता तसो-तसो ताचो ‘एक्शन टेकन रिपोर्ट’ सरकाराक दर खेपो सादर करचो पडटलो.
हे खेपे सरकारान ‘इन्वेण्टरी इन्हॅरीटन्स’ कायद्याक दुरुस्त्यो मंजूर करून घेतल्यात. व्यक्तीच्या मरणा उपरांत कुटुंबांत मालमत्तेची वांटणी जातना फकत घोवांच्या वारसांकच ही वांटणी जाताली, आतां बायलेच्या वारसांकय हक्क मेळपाची तजवीज आसतली. तेच प्रमाणें, मालमत्तेची नोंद कायद्यांतय दुरुस्त्यो जाल्यात. नवे कायदे विधानसभेंत मंजूर जातकच ते राज्यपाल आनी गरज थंय राष्ट्रपतीं कडेन मंजुरेक वचून सय जावन येवपाक सरकाराक वावुरचें पडटा. मागीर तांचे नेम तयार करून ते प्रत्यक्षांत चालीक लावचे पडटात. ना तर ते दप्तरांत बंदिस्त उरपाचे. ताका अर्थ ना. तें कल्याणकारी प्रशासन न्ही. लोकांचो, विरोधकांचो कायद दबाव कसो सरकाराक चुकीच्या गजालीं पसून मागीर हाडटा ताची देख ह्या अधिवेशनांत ठळकपणान मेळ्ळी ती सरकारान आदीं वाजयत – गाजयत हाडिल्लें भूमीपुत्र हें विधेयक सरकारान फाटीं घेतलें तेन्ना.
ह्या अधिवेशनांत अर्थसंकल्पी कामकाजाचीं धरून 19 विधेयकां मंजून जाल्यांत, तीं सगळीं चालीक लावपाचें काम फुडेंच आसा. ताचेर विरोधी आमदार आनी लोकांची नदर जाय. गोंयच्या सरकारान 1990त जुगारा आडचो कायदो दुरुस्त करून कॅसिनो हाडले. ह्या अधिवेशनांत ताचेर बेकायदा गँबलिंगांक आळो घालपाक कायद्यांत दुरुस्ती हाडून मंजूर करची पडली. ही कसली विसंगती पळयात. ऑनलायन अर्थीक वेव्हार लोकांची जीण सोंपी करतात तितलेच ते घातकी. फ्रॉडस्टर्स, स्कॅमर्स ऑनलायन गेमी, तरेकवार येवजण्यो हाडून लोकांक नाडटात. ताचे आड कारवाय करपाक सरकाराक सायबर कायदे घट करचे पडटात. ह्या अधिवेशनांत कला अकादमीच्या इमारतीचो बांदकाम चलपी भाग घोss करून कोसळ्ळो आनी हो विशय गाजलो. जेन्ना दुरुस्ती काम चालू जाल्लें तेन्ना लोक, विरोधक, बिगर सरकारी संस्था सरकारा कडेन तें योग्य तरेन चलना म्हूण आवाज करी. सरकारान लक्षच दिलें ना. आतां मंत्र्यांक फाटीं घालप, कोणाक बळीचे बकरे करप हाचे खातीर विधानसभेंत आनी भायर सरकार आटापिटा करता.
अधिवेशनांत मुख्यमंत्री डॉ. प्रमोद सावंत गंभीरपणान जापो दितात आनी संयम खळूंक न दितां वागतात, हें दिसून आयलें. ही बरी गजाल. कांय मंत्री गंभीरपणान जापो दितात, गंभीर आसात म्हणपाचें जाणवलें. कांय जाण फकांडां मारून वेळ पासार करतात ही गजाल सरकाराक बर्‍याची न्ही.
विरोधक हे विधानसभेंत लोकांनी चड प्रमाणांत वेंचून हाडिल्ले. पूण काँग्रेसचे जायते आमदार सत्ते कडेन वचपाक आशिल्ले आशिल्ल्यान थंय धांवले. आज विधानसभेच्या एकूण बळांत 17 टक्के विरोधक उरल्यात. पूण विजय सरदेसाय धरून विरोधी आमदारांनी प्रभावीपणान काम केलें. ‘आप’ आनी ‘आर.जी’ ते आमदार अभ्यासू आनी प्रभावी आसले. विरोधी पक्ष फुडारी युरी आलेमांव अजून शिकतात. ते संयमी, प्रभावी आसात. अभ्यासूपणान काम करतात. पूण तांच्यांत आक्रमकपणाची कालेत ना.
अधिवेशन जालें, अर्थसंकल्प जालो. आतां खरी कसोटी हें सगळें प्रत्यक्षांत येवपाचेर लक्ष दिवपांत आसतली. ज्यो जापो, ‘एश्युरन्सीस’ सरकारान दिल्यात त्यो गजाली प्रभावीपणान चालीक लागतात काय ना हाचेर लक्ष जाय. विधानसभा वांगड्यांच्यो वेग-वेगळ्यो समिती हे पासत आसतात. त्यो शिटूक, कार्यरत आनी अभ्यासूपणान अहवाल करपी आसत तर सरकाराक फुडल्या अधिवेशनांत परतून ‘कानाक धरून’ लोकां मुखार उक्तें करपाक तांकां जमतलें. ना जाल्यार परतून सरकार सुस्त आनी आमदार मंत्री सुस्त!
ह्या अधिवेशनांत आमदारांची पगार-भत्ते वाड जाल्या ताचे आड आवाज जालो. म्हज्या कोतान मंत्री, आमदार हांचे पगार, भत्ते वाड जातात ताचेर जनतेक हुस्को आसना. पूण ह्या निमतान रासवळ वाठारांतलो भ्रश्टाचार उणो जाता काय? हो प्रस्न खरो हुस्क्याचो… ‘ना खाऊंगा, ना खाने दुंगा’ ह्यो वेंचणूक घोशणा म्हूण बर्‍यो लागतात आयकुपाक. पूण प्रत्यक्षांत भ्रश्टाचार आपणें ना करप आनी भोंवतणच्यांक करपाक ना दिवप, करतात तांकां ‘म्हजो- तुजो’ म्हणी नासतना ख्यास्त दिवप हें जावंक जाय. तें जायना हें जनतेचें खरें दुख्ख!!!

प्रकाश वामन कामत
9422443093