भांगरभूंय | प्रतिनिधी
देशभरांत सुमार 38 पक्षांची इंडिया आघाडी भाजपाक आनी पर्यायान एनडीएक विरोध करपा खातीर उबी रावल्या. तांच्यो
कितल्योशोच बसका जाल्यो. पयली बसका पाटणा, दुसरी बंगळुरू आनी तिसरी मुंबयंत जाली. पूण फाटल्या तीन म्हयन्यां सावन तांची बसकाच जाली ना. तशेंच फुडारी म्हूण कोणाकूच जाहीर केल्लो ना. सुवातो वांटपा खातीर खूबश्यो चर्चा जाल्यो, पूण प्रत्यक्षांत पांच राज्यांचे विधानसभेंत कितें जालें? आतां पांच राज्यांच्यो विधानसभा वेंचणुको पार पडल्यो आनी तातूंतल्यान भाजपा तीन राज्यांनी व्हड मतांनी सत्तेर आयला. विरोधी आघाडीची वाताहात जाली.
आयतारा विधानसभेचे वेंचणूक निकाल जाहीर जातकूच आपचे अरविंद केजरीवाल हांणी आम आदमी पक्ष हो सगल्यांत मोटो विरोधी पक्ष आशिल्ल्याचें जाहीर करून उडयलें. संयुक्त जनता दलाचे के.सी. त्यागी हांणी लेगीत काँग्रेसीक हिणसायलें. ‘इंडिया’ कडेन आडनदर केली म्हूण काँग्रेस हारली, तेच बरोबर काँग्रेस स्वबळार जिखूंक शकना अशेंय तांणी म्हणिल्ल्याची खबर आसा. मार्क्सवादी पक्षान लेगीत टिका केल्या. एके वटेन इंडिया आघाडीत प्रवेश घेवपाचो आनी दुसरे वटेन भाजपा विरोधांत काँग्रेस स्वबळार लढली हांणी हारली. काँग्रेसींत सत्तेक भुकिल्ले लोक खूबशे आशिल्ल्यान तांची हार जाल्ल्याचें तांणी सांगलें. आतां इंडिया आघाडीचे बसकेंत काँग्रेसीक बॅकफुटार वचचें पडटलें अशें दिसता. आतां प्रादेशीक पक्ष चड सुवातो मागपाची शक्यताय आसा.
मध्य प्रदेशांत समाजवादी पक्ष आनी आप पक्षाक खातें लेगीत उक्तें करूंक जमलें ना. राजस्थान, मध्य प्रदेश आनी छत्तीसगड हांगासरल्या विधानसभेचे हारीक लागून काँग्रेस पक्षान काल म्हळ्यार बुधवारा बसका आपल्या. (हो लेख बरोवंक घेतलो तेन्ना, बसका जावपाची आशिल्ली.) हे बसकेंत इश्ट पक्षा कडल्यान काँग्रेस पक्षाची कोंडी जावपाची दाट शक्यताय आसा. हे हारीक लागून ममता बॅनर्जी आनी केजरीवाल हांची पत वाडटली. हार खाल्ल्या तीन राज्यांत काँग्रेस पक्षाची भाजपा कडेन थेट लडत आशिल्ली. तिवूय जर काँग्रेस जिखूंक शकना, जाल्यार इंडिया आघाडींत काँग्रेसीचें वजन उणें जातलें. देशांत अशे 186 मतदारसंघ आसात की जंय काँग्रेस आनी भाजपा अशी थेट लडत जाता.
फाटल्या लोकसभा वेंचणुकेंत काँग्रेस पक्षाक हे लडटींत फक्त डझनभर सुवातो मेळिल्ल्यो. ताका लागून ह्या वेळार आघाडींत काँग्रेसीची बाजू कमकुवत दिसता. हे वेंचणुकेंत आप पक्ष सुवात मेळोवंक शकलो ना. चार राज्यांत दोनशे परस चड उमेदवार पक्षान उबे केल्ले. पूण एकेय सुवातेर पक्षाक जैत मेळ्ळें ना. इंडिया आघाडींत आप हो मुखेल पक्ष आशिल्लो. समाजवादी पक्षाची लेगीत जादू चल्ली ना. ह्या इंडिया आघाडीच्या कमकुवताचो फायदो हालींच्या काळांत भाजपा आनी तांच्या एनडीएक जातलो अशी दाट शक्यताय आसा.
काँग्रेस फुडार्यांनी ह्या वेंचणुकांनी लागीं लागीं दरेक माचये वेल्यान ह्या आस्वासनाचो पुनरुच्चार केलो की तांचो पक्ष सत्तेर येत जाल्यार जातनिहाय जनगणना करतलो. हो लेगीत विरोधी पक्षांच्या ‘इंडिया’ आघाडीचो मुखेल मुद्दो आसा. ह्या वर्सा 18 जुलय दिसा बंगळुरूंत जाल्ले बसके उपरांत ‘इंडिया’ आघाडीन एक जोड निवेदन प्रसिद्ध करून जातनिहाय जनगणना करपाची मागणी केल्ली. अशे मानतात की अशी जनगणना करपा विशीं भाजपांत अस्वस्थाता आसा, कारण तांकां भिरांत आसा की ताका लागून उच्च जातीतले परंपरीक हिंदू मतदार निरशेवंक शकतात.
2024 चे लोकसभा वेंचणुके खातीरूय विरोधी पक्ष पयलींच जातनिहाय जनगणना हो म्हत्वाचो मुद्दो तयार करीत आसात. अशे स्थितींत ह्यो वेंचणुकोय ह्या मुद्या खातीर लिटमस टेस्ट आशिल्ल्यो काय कितें, कारण ह्या राज्यांनी ओबीसी मतदारांची संख्या चड आसा? एकूणच विधानसभेच्या हालींच जाल्ल्या निकालाक लागून सत्ताधारी एनडीए घटमूट जाल्यार विरोधी इंडिया आघाडी कमकुवत जातली अशींच चिन्नां दिसूंक लागल्यांत.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
