भांगरभूंय | प्रतिनिधी
पणजी ः नव्या वर्सांच्या पयल्या अधिवेशनाचे कामकाज निश्चित करपा खातीर विधानसभा कामकाज सल्लागार समितीची 23 जानेवारीक सकाळीं 11.30 वरांचेर विधानसभा संकुलांत बसका जातली. दोन दिसांच्या अधिवेशनाचे कामकाज बसकेंत चर्चा करुन थारायतलें.
विधानसभा सचीव नम्रता उल्मन हांणी ही म्हायती दिली. 6 आनी 7 फेब्रुवारी अशें दोन दीस विधानसभा अधिवेशन जातलें. हें वर्साचें पयलेंच अधिवेशन आशिल्ल्यान राज्यपालांच्या अभिभाशणान ताची सुरवात जातली. बिरेस्तारा 6 फेब्रुवारीक राज्यपालांचे अभिभाशण जातलें. हेर कसलेंच कामकाज जावचें ना. दुसरो दीस खाजगी कामाचो दीस आसतलो. आमदारांचे खाजगी थाराव चर्चे खातीर घेतले. शून्य प्रहर, लक्षवेधी सुचोवण्यो तशेंच खाजगी थाराव हांचे विशीं हे बसकेंत चर्चा जातली. मुख्यमंत्री डॉ. प्रमोद सावंत हांचे सयत वीज मंत्री सुदीन ढवळीकार, आमदार विजय सरदेसाय, विरोधी फुडारी युरी आलेमांव, आमदार वेंझी व्हिएगस हे कामकाज सल्लागार समितीचे वांगडी आसात.
दोन दिसांचें अधिवेशन घेवपाच्या निर्णयाचेर काँग्रेस, गोवा फॉरवर्ड आनी आप हांणी टिका केल्ली. अभिभाषणाक लागून फकत एका दिसाचें अधिवेशन जातलें देखून प्रस्न उप्रासपाची संद मेळची ना अशें मत विरोधी पक्षांनी मांडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
