भांगरभूंय | प्रतिनिधी
विधवा भेदभाव बंद करपी विधेयकाच्या अस्तित्वाचेर प्रस्नचिन्न
भांगरभूंय । समीप नार्वेकार
पणजीः गोंयांत विधवा बायले आड जावपी भेदभाव बंद करपा संदर्भांतलें विधेयक
अजून अस्तिवांत येवपाची वाट पळयता. ह्या विधेयकाचो मसुदो तयार जाला आनी
फक्त मंजुरे खातीर तो बायलां आनी भुरगे उदरगत संचालनालयांत आडकून उरला. हें विधेयक केन्ना मंजूर जातलें हाचेर प्रस्नचिन्न लागलां.
गोंयांत विधवा बायलां कडेन जावपी भेदभाव बंद करपा खातीर गोंय बायलां आयोगान मसुदो तीन म्हयन्यां पयलीं दिल्ल्या वेळा भितर पुराय केल्लो. हो मसुदो फुडले कारवाये खातीर खात्या कडेन धाडिल्लो. पूण तीन म्हयने जाले, तो मसुदो अजून तसोच पडून आसा. ह्या मसुद्याचें विधेयकांत रुपांतर करपा खातीर अजून कसलींच पावलां उखलूंक ना, अशी म्हायती गोपांनी दिली.
घरकार भायर पडले उपरांत ताच्या निमण्या संस्काराक ताचे बायलेक विधवा म्हूण थारोवपाक जे विधी जातात तांकां विरोध करून ही प्रथा बंद जावची म्हूण गोंयच्या ग्रामसभांनी आवाज काडिल्लो.
हालींच जाल्ल्या विधानसभा अधिवेशनांत खात्यान हे विशीं लेखी जापेंत सांगलां, विधवा प्रथे आड कायदो हाडपा खातीर गोंय बायलां आयोगा वरवीं मसुदो तयार केला. हो मसुदो तयार करपा खातीर तीन वांगड्यांची समिती स्थापन केल्ली. हे समितीन हो मसुदो तयार केला आनी बेगिनात बेगीन हाचें कायद्यांत रुपांतर जातलें.
हे विशीं बायलां आनी भुरगीं उदरगत खात्या कडेन संपर्क केलो तेन्ना गोपांनी सांगलें, घरकार भायर पडले उपरांत ताचे घरकान्नीची कपाळा वयली तिकली पुसप, काकणां फोडप, मंगळसुत्र काडप हे सारकिल्ल्यो प्रथा अजून लेगीत गोंयांत चलतात, त्यो बंद करून तांकां सन्मान मेळचो म्हूण हो मसुदो तयार केल्लो. हो मसुदो तयार करपा खातीर समितीक एक म्हयन्याची मुजत दिल्ली. लोकसभा वेंचणुकेची आचारसंहिता सोंपले उपरांत 5 जूनाक मुजती भितर मसुदो तयार जावन खात्या कडेन धाडलो, अशी म्हायती गोपांनी दिली. हो मसुदो बायलां आनी भुरगीं उदरगत खात्या कडेन पावला. हाचें विधेयकांत रुपांतर करपा खातीर हो मसुदो कायदो खात्या कडेन मंजुरे खातीर धाडचो पडटा आनी उपरांत सुचोवण्यो तशेंच आक्षेपा खातीर एनजीओ मुखार सादर करच्यो पडटा. अजून मेरेन ही प्रक्रिया चालीक लागूंक ना. ते खातीर केन्ना मेरेन हें विधेयक अस्तिवांत येतलें हें स्पश्ट सांगपाक शकना, अशें गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
