भांगरभूंय | प्रतिनिधी
समाज कल्याण खात्या वतीनूच जातली कार्यवाही
पणजी : दयानंद सगाजीक आनी गृह आधार मेळून विधवांक आतां म्हयन्याक ४ हजार रूपयांची पेन्शन मेळटलें. मात तिच्या पुताची पिराय २१ वर्सां परस उणी आसप गरजेचें. मुख्यमंत्री डॉ. प्रमोद सावंत हांणी ही घोशणा केली.
ह्या वेळार समाज कल्याण मंत्री सुभाष फळदेसाय हजर आशिल्ले. मंत्री फळदेसाय हांणी हे नवे येवजणेची म्हायती दिली. उपरांत मुख्यमंत्र्यान येवजणेची चड म्हायती दिली.
जायत्यो बायलो गृहआधार येवजणेचो लाव घेतात. घोवाक मरण आयले उपरांत गृह आधार येवजणेचो लाव सोडून विधवां खातीर आशिल्ल्या पेन्शनचो तांकां लाव मेळटा. हाका लागून तांकां पयलीं गृहआधार येवजणेचो लाव बंद करपा खातीर सोपस्कार करचे पडटात. नवे येवजणेंत विधवांक म्हयन्याक ४ हजार रूपयांची अर्थीक मदत दितले. गृहआधार येवजणेचो लाव बंद करपाक तांकां बायलां आनी बाल कल्याण खात्यांत अर्जूय करचो पडचो ना. भुरग्यांचो जल्म दाखलो तशेंच हेर प्रमाणपत्रां अर्जा सयत समाज कल्याण खात्याक सादर करचीं पडटलीं. उपरांत अर्थीक मजत मेळपाक सुरवात जातली.
सध्या विधवां खातीर म्हयन्याक २५०० रूपयांची मदत मेळटा. २०४९ विधवांक ताचो लाव मेळटा. राज्यांत ३६ हजार विधवा आशिल्ल्याची म्हायती मंत्री फळदेसाय हांणी दिली. चलो २१ वर्सांचो जाय मेरेन हे येवजणेचो लाव विधवेक घेवपाक मेळटलो, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
