भांगरभूंय | प्रतिनिधी
दोन दिसांत 1400 बायलांनी केली कुंकुमार्चन सेवा
केरळचे राज्यपाल राजेंद्र आर्लेंकार, आदले केंद्रीय मंत्री शहानवाज हुसेन हांणी दिली भेट
पणजी: स्वामी अभिषेक ब्रह्मचारी हांच्या मार्गदर्शना खाला पणजे महालक्ष्मी मंदिरांत विद्या कोटी कुंकुमार्चन महायज्ञाचो सोमारा समारोप जालो. दोन दीस चलिल्ल्या ह्या महायज्ञांत 1400 बायलांनी कुंकुमार्चनाची सेवा केली. सोमारा दुसरे दिसा केरळचे राज्यपाल राजेंद्र आर्लेंकार, आदले केंद्रीय मंत्री शहानवाज हुसेन, भाजपाचे राष्ट्रीय म्हणयारे संजय मयूख, प्रदेश भाजप अध्यक्ष दामू नायक हांणी महायज्ञाक भेट दिली. दोन दिसांत हजारांनी भाविकांनी यज्ञाचें दर्शन घेवन प्रसाद ग्रहण केलो.
गोंयची उदरगत, शांतिकाय, देशाची उदरगत ह्या हेतान ह्या महायज्ञाचें आयोजन केल्लें. विद्या कोटी कुंकुमार्चन महायज्ञ आयतारा आनी सोमारा अशे दोन दीस महालक्ष्मीच्या देवळांत जालो. दक्षीण भारत आनी वाराणसी हांगाच्या विद्वान पुजाऱ्यांचे हाजेरींत कुंकुमार्चन तशेंच ललिता सहस्रनामाचो जप केलो. स्वामी अभिषेक ब्रह्मचारी हांच्या मार्गदर्शना खाला 23 शारांनी हो महायज्ञ जालाे. आतां हाचें फुडें 15 ते 18 जून मेरेन मुजफ्फरनगर (बिहार) हांगा हो महायज्ञ जातलो, अशी म्हायती आयोजन समितीचे वांगडी रोहित चौधरी हांणी दिली.
गोंय हें एक पर्यटन थळ आसा. कुंकुमार्चन महायज्ञा सारके उपक्रम गोंयच्या आध्यात्मीक पर्यटनाक उर्बा दिवपी आसा, अशें आदले केंद्रीय मंत्री शहानवाज हुसेन हांणी भेट दिले उपरांत सांगलें.
पयल्या दिसा आयतारा मुख्यमंत्री डॉ. प्रमोद सावंत, गोंयचे राज्यपाल पी. एस. श्रीधरन पिल्लई हांणी महायज्ञाक भेट दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
