भांगरभूंय | प्रतिनिधी
सुभाष शिरोडकार: कामाक्षी उच्च माध्यमिकाचें स्नेहसंमेलन दबाज्यान
पणजी: दरेक विद्यार्थ्यां मदीं सामान्य ज्ञान व्हड प्रमाणांत आसूंक जाय. विद्यार्थ्यां मदीं वेगळ्यावेगळ्या प्रकारच्यो कला आसतात, तांणी त्यो बरे तरेन सांबाळून ज्ञानांत भर घालची. विद्यार्थ्यांनी सरकारी नोकरीचेर निंबून रावनासतना स्वता वेवसाय सुरू करून येस मेळोवचें अशें उदका स्रोत मंत्री सुभाष शिरोडकार हांणी सांगलें.
ते कुट्टी फोंडेंच्या कामाक्षी उच्च माध्यमीक विद्यालयाच्या स्नेहसंमेलनांत उलयताले. ह्या वेळार तांचे हस्तुकीं दिवली पेटोवन स्नेहसंमेलनाचें उक्तावण केलें.
ह्या वेळार माचयेर खासा आमंत्रीत सोयरे आदले प्राचार्य फ्रान्सीस फर्नांडीस, कामाक्षी उच्च माध्यमीक विद्यालयाचे अध्यक्ष विनायक सदा नायक, उपाध्याक्ष उल्हास गाड केरकार, वांगडी श्रध्दा विनायक नायक, प्राचार्य परमेश्वर भट, पालक शिक्षक संघाचे प्रतिनिधी अजय सावंत, विद्यार्थी मुखेली अदिती बागायतदार हाजीर आशिल्ल्यो. हें स्नेहसंमेलन सहकार भावनांत आयोजीत केल्लें.
गांवगिऱ्या वाठारांतल्या भुरग्यां मदीं विवीध प्रकारचे कलागूण लिपिल्ले आसतात हें कामाक्षी उच्च माध्यमिकाच्या विद्यार्थ्यांनी दाखोवन दिलां. तेच प्रमाण विद्यार्थ्यांनी खेळ आनी हेर गजालींचो आस्वाद घेवन वाचनाक प्राधान्य दिवचें. भुरग्यांनी सेगीत सकारात्मकताय बाळगून कश्ट घेवचें अशें उलोवप आदले प्राचार्य फ्रान्सीस फर्नांडीस हांणी केलें.
कामाक्षी शिक्षणीक संस्थेचे अध्यक्ष विनायक सदा नायक हांणी प्रास्तावीक आनी सोयऱ्यांक येवकार दिलो. प्राचार्य परमेश्वर भट हांणी सगल्यांची वळख करून दिली.
ह्या वेळार विद्यालयांतल्या विवीध फांट्यांतल्या विद्यार्थ्यांक वेगळ्यावेगळ्या शिक्षणीक मळार उत्कृश्ट कामगिरी केल्ले खातीर इनामां भेटयलीं.
वर्सुकी अहवाल पीपीटी वरवीं दाखयलो. कामाक्षी उच्च माध्यमीक विद्यालयांत कार्यावळीची निसुवार्थीपणान उत्कृश्ट कामगिरी केल्ले खातीर शिक्षिका निशा चेरियन हांचो मुखेल सोयऱ्यां हस्तुकीं भोवमान केलो.
ही कार्यावळ येसस्वी करपा खातीर लुईज वाज, वरदा गाड केरकार, वनिता देसाय, अनील रावत, शैला पै, रंजना नायक, नामदेव नायक, माधवी नायक, तशेंच रामदास नायक आनी हेर शिक्षक आनी शिक्षकेत्तर कर्मचार्यांनी हातभार लायलो.
पुराय कार्यावळीचें सुत्रसंचालन शिक्षिका निशा चेरियन आनी उपकार शिक्षिका सुरेखा नायक हांणी मानले. सांस्कृतीक कार्यावळीन संमेलनाची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
