भांगरभूंय | प्रतिनिधी
मुख्यमंत्री : सांखळे विज्ञान दीस कार्यावळींत उलो
भांगरभूंय । प्रतिनिधी
दिवचल : संवसारीक पांवड्याचेर विज्ञान आनी तंत्रज्ञानाचो गाजोवाजो आसा. तो भारतांत संवसारीक म्हासत्तेचे दिशेन वाटचाल करता. आयच्या विद्यार्थ्यांनी विज्ञानीक दिश्टीकोन आत्मसात करचे खातीर गिन्यानाची उमळशीक वाडोवप, कुशळटाय विकसीत करप तशेंच सदांच सपनां पळोवन तीं पुराय करपाचो ध्यास बाळगिल्यार विकसीत भारताचें सपन सहजतायेन साकार जावप शक्य आसा, अशें मुख्यमंत्री डॉ. प्रमोद सावंत हांणी सांगलें.
सांखळी सरकारी म्हाविद्यालय, रवीन्द्र भवन आनी शिक्षण खात्याच्या पालवान सांखली म्हाविद्यालयांत राष्ट्रीय विज्ञान दीस कार्यावळ आयोजीत केल्ली. ह्या सुवाळ्यांत मुख्यमंत्री उलयताले. ह्या वेळार माचयेर ज्येश्ठ शास्त्रज्ञ डॉ. शरद काळे, भूषम सावयकार, दत्ताराम चिमुलकार तशेंच म्हाविद्यालयाचे प्राचार्य, शिक्षक हाजीर आशिल्ले.
आयच्या विद्यार्थ्यांनी स्वता आत्मचिंतन करतना आपूण खंय आसा ताचें भावन दवरून नवीं नवीं सपनां पळोवन तांचो फाटलाव करचे खातीर चौफेर ज्ञान आत्मसात करचें. विज्ञानाचें म्हत्व खूब व्हड आसा. भारतान संवसारीक पांवड्याचेर खूबशें नवें संशोधन केलां. चंद्राचो डोम गोंयांत निर्माण जाला, हे विशींचें कुतुहल विद्यार्थ्यांक आसपाक जाय. तें आसले बगर नाविन्य आत्मसात करपाक जावचें ना. ते खातीर विद्यार्थ्यांचें विज्ञान तंत्रज्ञानाची कुशळटाय विकसीत करपाक शिक्षकांनी विशेश लक्ष दिवचें, अशें मुख्यमंत्र्यान सांगलें.
गोंय सरकार शिक्षणीक मळार क्रांतिकारक बदल करता. नव्या शिक्षण धोरणाच्या माध्यमांतल्यान खूबशे उपक्रम चालीक लावन सगळ्याच मळांचेर विद्यार्थ्यांक नव्यो नव्यो संदीत उपलब्ध करतात. समाजाचे, गोंयचे, देशाचे उदरगतीक दिशा दिवपी शिक्षण घेतना विज्ञान आनी तंत्रज्ञानाची गोडी लावन घेवप गरजेचें आसा. ते नदरेन शिक्षणाची बुन्याद अदीक घटमूट करचे खातीर विज्ञान शिक्षण आपणावप गरगजेचें आसा, अशें मुख्यमंत्र्यान सांगलें.
दर्यादेगेर पिकनीक नाका
गोंयांत खूबश्यो दर्जेदार विज्ञान संस्था आसात. कोयर प्रकल्प संशोधन केंद्रां आसात. थंय विद्यार्थ्यांक पिकनिकेच्या निमतान व्हरात. तांची गिन्यान वाडोवपाची उमळशीक वाडयात. हाचे मुखार दर्यादेगेर पिकनिकी व्हरपाची संवय बंद करात, अशें मुख्यमंत्री डॉ. सावंत हांणी सांगलें.
‘मन की बात’ नेमान आयकात
प्रधानमंत्री नरेंद्र मोदी फाटलीं 10 वर्सां ‘मन की बात’ कार्यावळीच्या माध्यमांतल्यान नेमान नवी नवी म्हायती दितात. ही म्हायती भारतांत, संवसारांत कितें चल्लां हे विशींची आसता. ताचें ज्ञान विद्यार्थ्यांक, पालकाक, शिक्षकांक मेळपाक म्हत्वाची थारता. दुर्दैवान शिक्षक आनी विद्यार्थी ही कार्यावळ आयकना. कांय जाणांक हे कार्यावळीची खबर पसून ना. हे मुखार सगळ्याच विद्यार्थ्यांनी, पालकांनी, शिक्षकांनी ‘मन की बात’ की कार्यावळ मुजरत आयकुची, समजून घेवची, असो उलो मुख्यमंत्र्यान मारलो.
मुख्यमंत्र्यान सांगलें, ‘मन की बात’ कार्यावळ आमकां मतां दिवचे खातीर तुमी आयकुची अशें आमी सांगिनात, जाल्यार तुमची ज्ञान मेळोवपाची उमळशीक वाडोवचे खातीर संवसारांत कितें चल्लां हाची म्हायती मेळोवचे खातीर आयकुची, अशें मागतात.
‘एनएसई’ कडेन समजिकाय कबलात
गोंयांतल्या तरणाट्यांक बँकींग, वित्तीय सेवा आनी विमो मळा वयल्या उद्देगा कडेन संबंदीत कुशळटायांनी सुसज्ज करचे खातीर ‘विद्यार्थी कुशळटाय कार्यावळ’ सुरू करचे खातीर राष्ट्रीय शॅर बाजार (एनएसई इंडिया) आनी गोंय सरकारान समजिकाय कबलात केल्या, अशें मुख्यमंत्र्यान स्पश्ट केलें.
‘दीसपट्टे जिणेंत विज्ञान’ ह्या विशयाचेर डॉ. शरद काळे हांणी उलोवप केलें.
राष्ट्रीय विज्ञान दिसाची संकल्पना
अंदूंच्या राष्ट्रीय विज्ञान दिसाची संकल्पना ‘विकसीत भारता खातीर विज्ञान आनी नल्या उपक्रमांत संवसारीक फुडारपणा खातीर भारतीय तरणाट्यांक सक्षम करप’ ही आसा. भारत खूबश्या काळा सावन विज्ञानीक नव्या उपक्रमांचें केंद्र आसा. अंतराळ संशोधन, अणू तंत्रज्ञान आनी कृत्रीम बुद्धीमत्तेंत उल्लेख करपा सारकी उदरगत करता, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
