भांगरभूंय | प्रतिनिधी
भांगरभूंय । प्रतिनिधी
दिवचलः शिक्षण फकत पदवी मेळोवा खातीर न्हय जाल्यार फुडार घडोवपा खातीर घेवपाक जाय. गोयांत तंत्रीक आनी तत्सम मळार सुमार अडेज लाख नोकऱ्यो आनी वेवसायाची संद आसात. त्यो विद्यार्थ्यांक मेळच्यो हे खातीर उच्च शिक्षण मळा वयल्या शिक्षकांनी विद्यार्थ्यांक फावो तें मार्गदर्शन करपाक जाय अशें मुख्यमंत्री डॉ प्रमोद सावंत हांणी सांगलें.
साखळी सरकारी म्हाविद्यालया लागीं गोंय राज्य साधन सुविधा उदरगत म्हामंडळा वतीन सुमार 6 कोटी रुपये खर्च करून उबारल्ल्या 90 खांटींच्या चलयांच्या हॉस्टेलाचें उक्तावण केल्या उपरांत मुख्यमंत्री उलयताले. ह्या वेळार माचयेर साखळेची नगराध्यक्ष रश्मी देसाय, राज्याचो शिक्षण सचीव प्रसाद लोलयेंकार, उच्च शिक्षण संचालक भूषण सावयकार, साधन सुविधा म्हामंडळाचो संचालक गिरीश अडकोणकार, दत्ताराम चिमुलकार आशिल्लो.
गोयांत दोट्टी डिग्री शिक्षण सुरू जातले. तातूंत तंत्रीक आनी कुशळ शिक्षणा कडेन विद्यार्थ्यांचो कल आसपाक जाय. राज्यांत सद्या सौर उर्जा उर्जेची गरज आसा. त्या मळार एसी बसोवपाच्या मळार बऱ्योच संद आसा. ताचे कडेन विद्यार्थी गंभीरपणान कित्याक पळयनात व्हो म्हाक पडिल्लो एक प्रस्न आसा. हे विशीं विद्यार्थ्यांक मार्गदर्शन करपाची गरज आसा. ती जापसालदारी शिक्षकांनी घेवपाक जाय अशें मुख्यमंत्री डॉ सावंत हांणी सांगलें.
राज्यांत उच्च शिक्षण घेवपाची वेवस्था आसा मात ह्या शिक्षणा विशीं चडश्या गोंयकारांक म्हायती ना. भायल्या राज्यांतले विद्यार्थी गोंयांत येवंन हें शिक्षण घेतात. हाचे फुडली परिस्थिती आव्हानाची आसा. अश्या वेळार आपलें अस्तित्व तिगोवन दवोरपा खातीर फुडाराक तंत्रीक आनी कुशळतायेच्या शिक्षणाची गरज आसतली हे मतींत दवोरून आतां सावन यत्न सुरू करपाक जाय अशें मुख्यमंत्र्यांनी सांगलें.
गोंयांत जायते जाण कोंकणींतल्यान उच्च शिक्षण घेतात. पीए.डी लेगीत करतात. मात संसदेंत कोंकणी अणकार करपाचें काम करपा खातीर गोंयांतल्यान एकलोय अर्ज करना हाचे वायट दिसता. सुमार 55 हजार रुपये पगाराच्या हे नोकरे खातीर गोयांतल्यान कोणूच अर्ज करना ही खंत करपाची गजाल आसा अशे तांणी सांगलें. साखळे सुरू केल्ल्या चलयांच्या हॉस्टेलाचो उपेग गांवगिऱ्या वाठारांतल्यान शिक्षण घेवपाक येवपी चलयांक जातलो. हॉस्टेल ही सगल्यांची मालमत्ता समजून तें बरें दवोरपा कडेन लक्ष दिवचें अशें तांणी मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
