भांगरभूंय | प्रतिनिधी
अशा कार्यावळींतल्यान विद्यार्थ्यांक भावनीक स्थिरताय, सुरक्षीतताय आनी योग्य मार्गदर्शन मेळटा, जें तांच्या एकंदर उदरगती खातीर म्हत्वाचें.
शिक्षण फकत परिक्षा वा पुस्तकी गिन्याना पुरतें मर्यादीत आसूंक फावना, तें विद्यार्थ्यांच्या सर्वांगी उदरगतीची बुन्याद घालपी आसपाक जाय. विद्यार्थ्यांक फक्त शिक्षणीक गिन्यान दिवप पुरो न्हय, तर तांचे मदीं आत्मविस्वास निर्माण करपाक, सृजनशीलताय, भावनीक स्थिरताय वाडोवपाक आनी जिणेंतल्या कुशळटायेचें प्रशिक्षण दिवपाक प्रोत्साहन दिवप लेगीत म्हत्वाचें. शाळेच्या दरेका उपक्रमांतल्यान तांचें व्यक्तिमत्व विकसीत जातलें, तांचे प्रतिभेक नवी दिका मेळटली आनी जिणेंतल्या आव्हानांक सक्षमपणान तोंड दिवपाक तीं तयार जातलीं हे खातीर यत्न करप गरजेचें.
एक प्राचार्य म्हूण हांवें शाळेंत विद्यार्थ्यां खातीर वेगवेगळ्यो शिकोवपाच्यो पद्दती प्रभावीपणान चालीक लायल्यात. नव्या राष्ट्रीय शिक्षण धोरणाच्या (एनईपी) मार्गदर्शना खाला शाळा विद्यार्थ्यांच्या प्रतिभेक चालना दिवपी आनी तांच्या सर्वांगीण उदरगती वांगडाच शास्त्रीय अभ्यासक्रमाक येसस्वीपणान चालीक लायता.
आत्मविस्वासा खातीर एक मंच
सगळ्या शाळांनी शिक्षकांच्या मार्गदर्शना खाला विद्यार्थ्यांक ल्हान पिराये सावन भौशीक भाशणाचे धडे दिवचे. इंग्लीश वक्तृत्व सर्त, वर्गांत विवीध सादरीकरणां, इंटरकॉम विधानसभा सारकिल्ले उपक्रम घडोवन हाडून भुरग्यांचो आत्मविस्वास निर्माण करप आनी भौशीक भाशणाची कुशळटाय वाडोवप म्हत्वाचें.
अभ्यासक्रमांत कलेचो आस्पाव
सगळ्या शाळांनी संगीत शिक्षणाक खाशेलें म्हत्व दिवचें, विद्यार्थ्यांक पयले यत्ते सावन वेगवेगळीं संगीत वाद्यां शिकपाक प्रोत्साहन दिवचें. शारदा मंदिर कदंब शाळेंत संगीत स्वर (नोट्स) वाचपाचो एक अभिनव उपक्रम ह्या वर्सा सुरू केला, जाका लागून विद्यार्थ्यांक संगीत चड खोलायेन शिकपाची संद मेळटा. ते भायर जिमनास्टीक, शिल्पकला, आनी बेगीनूच रोबोटिक्स आनी खगोलशास्त्र प्रयोगशाळा अशे आधुनीक अभ्यासक्रम विद्यार्थ्यां खातीर सुरू जातले. शाळेच्या शिल्पकला क्लबान हालीं सरस्वती देवीचें शिल्प तयार करपाचें काम हातांत घेतलां, जें विद्यार्थ्यांच्या सृजनशीलतेचें एक व्हड उदाहरण आसा.
भावनीक, समाजीक उदरगती खातीर आदार
शाळांच्या समुपदेशन विभागान विद्यार्थ्यांच्या भावनीक गरजेचेर खासा लक्ष दिवपाची गरज आसा. ल्हान भुरग्यांक ‘बरें स्पर्श- वायट स्पर्श’ शिकोवप, नेण्ट्यां विद्यार्थ्यांक वयार येता तेन्ना प्रभावी मार्गदर्शन दिवप, समस्या सोडोवपा खातीर कार्यशाळा घडोवन हाडप अत्यंत म्हत्वाचें. अशा कार्यावळींतल्यान विद्यार्थ्यांक भावनीक स्थिरताय, सुरक्षीतताय आनी योग्य मार्गदर्शन मेळटा, जें तांच्या एकंदर उदरगती खातीर म्हत्वाचें.
ऑरिया फर्नांडीस,
प्राचार्य, शारदा मंदिर,
कदंब- गवाळी मौळा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
