भांगरभूंय | प्रतिनिधी
जसपाल सिंग: सी. ई. एस. म्हाविद्यालयाचो वर्सुकी इनामां भेटवण सुवाळो उमेदीन
पणजी: विद्यार्थ्यांनी नागरी सेवेची परिक्षा दिवंक यत्न करूंक जाय. विद्यार्थ्यांनी समाज कल्याणा खातीर समाजाची सेवा करूंक मुखार येवंक जाय. म्हाविद्यालयान इत्सूक विद्यार्थ्यां खातीर आयपीएसचे परिक्षे खातीर प्रशिक्षण दिवपाची वेवस्था करची. ताचे खातीर आपूण स्वता मार्गदर्शन करूंक तयार आसा अशें गोंयचे नव्यानूच नेमिल्ले पुलीस महासंचालक जसपाल सिंग (आयपीएस) हांणी म्हणलें.
कुंकळ्ळेंच्या सी. ई. एस. म्हाविद्यालयाचो वर्सुकी इनामां भेटवण सुवाळो व्हडा उमेदीन जालो. ह्या सुवाळ्याक जसपाल सिंग (आयपीएस) मुखेल सोयरे म्हणून उलयताले. तशेंच कुंकळ्ळी शिक्षण संस्थेचे अध्यक्ष विरेंद्र (विदेश) देसाय, सी. ई. एस. म्हाविद्यालयाचे प्राचार्य प्रो. संजय सावंत देसाय, म्हाविद्यालयाच्यो उप- प्राचार्य डॉ. सरळा कटगेरी, विद्यार्थी मंडळाच्यो संयोजक सहाय्यक प्रा. टिना दे सांता तेरेझा, राष्ट्रीय सेवा येवजण कार्यावळ समन्वयक सहाय्यक प्रा. यश्मिता घाटवळ, शारिरीक शिक्षण आनी खेळां विभागाचे संचालक सहाय्यक प्रा. पर्वत नायक, विद्यार्थी मंडळाची सरचिटणीस स्नेहा पडवळकार, सांस्कृतीक मंडळाची सांस्कृतीक सचीव फिलोमिया फेर्नांडीस, खेळां सचीव अॅलंट कुलासो माचयेर हाजीर आशिल्ले.
ह्या वेळार जसपाल सिंग हांणी आपल्या उलोवपांत शिक्षणाचें म्हत्व पटोवन दितना जायत्या गजालींचो उल्लेख केलो. तांणी फुडें म्हणलें, शिक्षण मनशाक शिस्तबध्द करता. विद्यार्थ्यांच्या शिक्षणीक उत्कृश्टताये खातीर गोंयांत अनुकूल वातावरण आसा ताचो विद्यार्थ्यांनी फायदो करून घेवंक जाय. निमणेकडेन शिक्षणीक उदरगतीच्या मळार बरें काम करता देखून तांणी म्हाविद्यालयाची खासा तोखणाय ह्या वेळार केली.
शिक्षणीक वर्स 2022-23 वर्साचो उत्कृश्ट विद्यार्थ्यी पुरस्कार तन्मयी कृष्णा नाईक हाका फावो जालो. हो पुरस्कार सर्गेस्त विठू उर्फ बाळसो कोप्रे देसाय हांच्या उगडासान तांची धूव ज्योत्स्ना सारिपल्ली हिणें पुरस्कृत केल्लो. स्टूडंट ऑफ द इयर म्हूण भोवमान स्टल डिसौजा (चलो) आनी वॅलनी अँड्रिया डायस (चली) हांकां फावो जालो. हे दोनूय पुरस्कार उषा वैद्य आनी तांच्या घरच्यांनी सर्गेस्त प्रभाकर वैद्य कुंकळ्ळी शिक्षण संस्थेचे आदले अध्यक्ष आनी सचीव हांचे यादीन पुरस्कृत केल्यात. उत्कृश्ट क्रिडापटूचो पुरस्कार रामानंद देऊ वेळीप (चलो) आनी तेरेजो सावियोला एस्तेफानिया पेरैरा (चली) हांकां फावो जालो. जो सर्गेस्त ऑस्कर ग्राशियस हांच्या घरच्यांनी पुरस्कृत केल्लो. उत्कृश्ट एन. सी. सी. कॅडेट म्हणून फरजाना शेख आनी एनायडा वालंका डायस हांचो भोवमान केलो. तशेंच राष्ट्रीय सेवा येवजणेचो उत्कृश्ठ विद्यार्थी पुरस्कार दिपक सिंग आनी उत्कृश्ठ विद्यार्थिनी पुरस्कार जॅस्लीन सिल्वा हांकां फावो केलो. शिक्षणीक कामगिरी खातीर चडांत चडांत गूण मेळयिल्ल्या विद्यार्थ्यांचो भोवमान ह्या वेळार केलो आनी बी. ए. आनी बी. कॉम.च्या शिक्षकांनी आपल्या विशयांत चडांत चड गूण मेळयिल्ल्या विद्यार्थ्यांक शिश्यवृत्त्यो प्रदान केल्यो.
मुखेल सोयर्यांची वळख सहयोगी प्रा. चतुरा साकोर्डेंकार हिणे केली, कार्यावळीचें सुत्रसंचालन सहाय्यक प्रा. साईली मोरजकार आनी सहाय्यक प्रा. ऑल्विटा ग्राशियस हांणी केलें. जाल्यार सहाय्यक प्रा. टिना दे सांता तेरेझा हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
