भांगरभूंय | प्रतिनिधी
एमईएस विद्यालयांत विद्यार्थी मंडळाचो सोपूत सुवाळो
वास्को: विद्यार्थ्यांनी दरेक मळार फुडारपण करपाची गरज आसा. फुडारपणाक लागून विद्यार्थी तांच्या व्यक्तीमत्वाचो विकास करूंक शकता. तशेंच हेरांकूय मजत करूंक शकता अशें तरणाटे उद्देजक मांगिरीश सालेलकार हांणी म्हणलें.
एमईएस वसंत जोशी म्हाविद्यालयाच्या विद्यार्थी मंडळाच्या सोपूतविधी सुवाळ्यांत ते मुखेल सोयरे म्हूण उलयताले. ह्या वेळार माचयेर म्हाविद्यालयाच्यो प्राचार्य डॉ. मनस्वी कामत, विद्यार्थी मंडळाचे अध्यक्ष प्रा. सत्यवान नायक, विद्यार्थी सरचिटणीस शॉन फर्नांडीस, विद्यार्थी प्रतिनिधी खुशी चव्हाण हाजीर आशिल्ले.
आपल्या उद्देगांतल्या प्रवासा विशीं उलयतना सालेलकार हांणी म्हणलें, विद्यार्थ्यांक तांच्या आवडीच्या मळार बरें योगदान दिवपाचें आवाहन केलें. म्हाविद्यालयांतल्यो आपल्यो यादी जागयतना सालेलकार हांणी म्हणलें, म्हविद्यालयांतूच आपल्या फुडाराची दिका थारावंक जाय.
प्राचार्य डॉ. मनस्वी कामत हांणी आपल्या येवकाराच्या उलोवपांत मानेस्तांक येवकार दिलो. प्रा. सत्यवान नायक हांणी विद्यार्थी संघटणेचे म्हत्व सांगून अंदूंच्या विद्यार्थी संघटणेचो नियाळ घेतलो. उपप्राचार्य डॉ. आशीश जोशी हांणी मुखेल सोयर्यांची वळख करून दिली. मिशेल डिमेलो हांणी सुत्रसंचालन केलें. शॉन फर्नांडीसान उपकार मानले.
म्हाविद्यालयाच्या विद्यार्थी मंडळाचे मुखेल पदाधिकारी मुखार दिल्ले प्रमाण: शॉन फर्नांडीस (सरचिटणीस), खुशी गोपाळ चव्हाण (विद्यार्थी प्रतिनिधी), मिहीर कृष्ण पणजीकार (वादविवाद विभाग सचीव), सिद्धार्थ श्यामसुंदर नायक (कला आनी संस्कृती सचीव), अवंतिका राजीव ओझा (साहित्य सचीव) आनी अली गवंडी (खेळा सचीव).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
