भांगरभूंय | प्रतिनिधी
‘यंग बर्ड्स वॉक’ उपक्रमांतल्यान भुरग्यांनी दिलो सैम संवर्धनाचो संदेश
भांगरभूंय । प्रतिनिधी
दिवचल : वानोशी- दोडामार्गार ‘यंग बर्ड्स मंथ’ निमतान आयोजीत ‘यंग बर्ड्स वॉक’ हो निरिक्षण उपक्रम उमेदीन जालो. हो उपक्रम विवेकानंद पर्यावरण जागृती फौज- गोंय, नेचर कॉन्झर्वेशन फावंडेशन- महाराष्ट्र, वानोशी होम स्टे- वानोशी, सरकारी मुळावें विद्यालय पुनर्वसन, साळ दिवचल आनी सरस्वती विद्यालय नी कनिश्ठ म्हाविद्यालय- कुडासे दोडामार्ग हांच्या जोडपालवान आयोजीत केल्लो.
ह्या उपक्रमाचें मुखेल वैशिश्ट म्हणल्यार साळ पुनर्वसन शाळेंतल्या भुरग्यांनी स्थलांतरीत सुकण्यांक येवकार दिवचे खातीर आकर्शक तकटे तयार केल्ले. तातूंत ‘स्थलांतरीत सुकण्यांक उर्बेभरीत येवकार’, ‘आयलीं रे आयलीं! स्थलांतरी सुकणीं आयलीं’ अश्या आशयाचे संदेश आशिल्ले तकटे आनी स्थलांतरीत सुकण्यांचें फोटो हातांत घेवन भुरग्यांनी वानोशीचे न्हंयेदेगेर सुकण्यांचें निरिक्षण केलें. ह्या उपक्रमांतल्यान भुरग्यांनी स्थलांतरीत सुकण्यां विशीं आत्मियता उक्तायतना सैम संवर्धनाचो संदेश दिलो.
विवेकानंद पर्यावरण जागृती फौजचे सुकणीं अभ्यासक गजानन शेट्ये आनी संकेत नायक हांणी भुरग्यांक वानोशीचे न्हंयेदेगेर थळाव्या आनी स्थलांतरीत सुकण्यांचें प्रत्यक्ष निरिक्षण मार्गदर्शन केलें. निरिक्षणांत ‘राखी कोतवाल’, ह्या स्थलांतरीत सुकण्या सयत कावळो, रान सातभाई, दयाळ, शनिपाय बुलबूल, टोई पोपट, भारद्वाज, पारवो, ठिपक्यांचो होला, हळद्या, सूर्यपक्षी, टिटली, धिवर, गाय बगळो, समुद्री घार हीं सुकणीं पळोवपाक मेळ्ळी.
साळ पुनर्वसन शाळेचे उपक्रम समन्वयक शिक्षक संकेत नायक हांणी ‘आपल्या वाठारांतलीं सुकणीं’ ह्या विशयाचेर म्हायतीपूर्ण ‘पी.पी.टी.’ सादर केली. तांणी ओलसाणीचे सुवाते वयले, शिकारी, जमनीचेर खाण सोदपी, हवेंत खाण मेळोवपी, झाडार रावपी आनी रातच्या वेळार भोंवपी सुकणीं अशा गटांतल्यान सुकण्यां विशीं खोलायेन म्हायती दिली.
गजानन शेट्ये हांणी भुरग्यां खातीर सुकण्यां वयली प्रस्नमंजुशा आनी सैमखेळ आयोजीत करून कार्यावळ अदीक मजेची केली. साळ पुनर्वसन शाळेची शिक्षिका निकिता गांवस, सरस्वती विद्यालय कुडासेची शिक्षिका दिप्ती शेटकार, वानोशी हाम स्टेचे धनी प्रवीण देसाय, नेचर कॉन्झर्वेशन फावंडेशनाचे वांगडी विशाल सडेकार, श्रावणी देशपांडे, प्रशांत जाधव, जितीन वियजन हाजीर आशिल्ले. पुराय उपक्रम साळ पुनर्वसन शाळेचे प्रभारी मुख्याध्यापक धाकटू पाटील आनी नेचर काँन्झर्वेशन फावंडेशनाचे डॉ. रोहीत नानिवडेकार हांच्या फुडारपणा खाला जालो. ह्या ‘यंग बर्ड्स वॉक’ उपक्रमांतल्यान विद्यार्थ्यां मदीं सुकणीं निरिक्षणाची आवड, सैम संवर्धनाची जाणीव आनी स्थलांतरीत सुकण्यां विशीं आत्मियता वाडीक लागली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
