भांगरभूंय | प्रतिनिधी
नवी दिल्ली, खबरां संस्था: कांय दिसां पयलीं दिल्लींच्या कांय शाळांक धमकावपी ईमेल आयिल्ले. शाळांनी बॉम्बस्फोट करपाची ती धमकी आशिल्ली. आतां दिल्ली पुलिसांनी हे विशीं धक्को दिवपी खबर उक्तडार हाडल्या. सुमार ३ शाळांक धमकावपी ई-मेल आयल्यात अशें पुलिसांनी सांगलें. हो ई-मेल त्याच शाळेंतल्या विद्यार्थ्यांनी केल्लो.
मेळिल्ले म्हायती प्रमाण, ज्या शाळांनी बॉम्ब स्फोट करपाची धमकी दिल्ली, तातूंत एक व्यंकटेश्वर ग्लोबल शाळेचोय आसपाव आशिल्लो. २८ नोव्हेंबराक रोहिणी प्रशांत विहार पीव्हीआर मल्टिप्लेक्सांत स्फोटाची घडणूक घडले उपरांत दुसर्या दिसा व्यंकटेश्वर शाळेक धमकेचो ईमेल आयलो. पुलीस अधिकार्यांनी दिल्ले म्हायती प्रमाण, शाळेंतूच शिकपी विद्यार्थ्यांनी हो इमेल केल्लो. परिक्षा मुखार धुकलपा खातीर तांणी हो ईमेल केल्लो.
अधिकार्यांनी सांगलें, समुपदेशना वेळार दोनूय विद्यार्थ्यांनी हें उक्तें केलें. शाळेक धमकावपाचो हो विचार ताचे तकलेंत फाटल्या कांय घडणुकां वयल्यान आयलो. विद्यार्थ्यांच्या पालकांक हे विशीं म्हायती दिवन हे शाळे प्रमाणूच रोहिणी आनी पश्चिम विहार हांगच्या दोन शाळांकूय विद्यार्थ्यांनीच धमकी दिल्ल्याचें मुखार आयलें. शाळा बंद उरची, हाचे खातीर विद्यार्थ्यांनी हें केल्ल्याचें मुखार आयलें.
शाळेंत बॉम्ब आशिल्ल्याचे धमकेक लागून ११ दीस दिल्लीच्या शाळांनी बरोच व्हड बोवा निर्माण जाल्लो. पुलिसांनी म्हणलें, ईमेल व्हीपीएना वरवीं धाडिल्लो. ताका लागून अधिकार्यांक हें सोदून काडप आव्हानाचें थारिल्लें. अंदूं मे म्हयन्यां उपरांत दिल्लीक ५० परस चड बॉम्बस्फोटाच्यो धमक्यो मेइयल्ल्यो. फकत शाळोच न्हय तर हॉस्पिटलां, विमानतळ आनी एअरलायन कंपन्यांकूय अश्यो धमक्यो दिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
