भांगरभूंय | प्रतिनिधी
एखादी गजाल जेन्ना मेळना आनी ती मेळची हे खातीर विद्यार्थी हट्ट धरतात, आनी तांकां तातूंत अपेस येत जाल्यार आत्महत्येचो मार्ग स्विकारतात.
हालींच्या काळांत विद्यार्थ्यांच्या आत्महत्यांच्या घडणुकांनी सुमारा भायर वाड जाल्या. दीसपट्ट्या दिसाळ्यांतल्या खबरांनी शालेय वा म्हाविद्यालयीन विद्यार्थ्यान आत्महत्या केल्ल्याची एखादी तरी खबर आसताच. विद्यार्थी आत्महत्यांच्या वाडट्या घडणुकां विशीं सगली कडेन हुस्को उक्तायतात. भारतांतल्या विद्यार्थ्यांच्या आत्महत्ये विशीं भारतांतूच न्हय जाल्यार संवसारभर हुस्को उक्तायतात. फाटल्या वर्सा भारतांतल्या विद्यार्थ्यांच्या वाडट्या आत्महत्या विशीं एक अहवाल उजवाडायिल्लो. नॅशनल क्रायम ब्युरोच्या डेटाचेर आदारीत स्टुडंट्स सुसायड: अन अपेडेमीक स्विपींग इंडिया नांवाचो अहवाल वर्सुकी आयसी 2 परिशद आनी एक्स्पो 2024 वर्सा जाहीर केल्लो. हो अहवाल सामको धक्को दिवपी आसा. कारण ह्या अहवालांत आमच्या देशांतल्या आत्महत्यांचें वास्तव मांडलां. ह्या अहवाला प्रमाण देशांतल्या आत्महत्यांच्या दारांत सुमारा भायर वाड जाल्या. दर वर्सा देशभरांत 70 हजारां परस चड नागरीक आत्महत्या करीत आसात आनी हातूंत सगल्यांत चड महाराष्ट्रांत जायत आसात. तातूंतय धक्को दिवपी आनी हुस्को करपी गजाल म्हणल्यार हातूंत सगल्यांत वड आत्महत्या विद्यार्थ्यांच्यो आसात. तातूंत महाराष्ट्राचो पयलो क्रमांक लागता. महाराष्ट्रांत सगल्यांत चड विद्यार्थ्यांनी आत्महत्या केल्यात. महाराष्ट्रा उपरांत तामीळनाडू, मध्य प्रदेश, उत्तर प्रदेश, झारखंड ह्या राज्यांचो क्रमांक लागता.
आयज संवसारांतली सगल्यांत चड लोकसंख्या भारतांत आसा आनी हातूंत सगल्यांत चड तरणाट्यांची संख्या आसा. भारतांत तरणाट्यांची संख्या सुमार 60 टक्के इतली आसा. इतले तरणाटे संवसारांत आनीक खंयच्याच देशांत ना. म्हणून भारता कडेन महासत्ता म्हणून पळयतात. भारताचे आदले राष्ट्रपती डॉ. एपीजे अब्दुल कलाम हांचो जाल्यार तरणाट्यांचेर खूब विस्वास आशिल्लो. तरणाट्यांच्या बळार भारत संवसारीक महासत्ता जातलो असो विस्वास तांकां आशिल्लो. ज्या तरणाट्यांच्या बळार आमी महासत्ता जावपाचे सपन पळयतात तोच तरणाटो जर असो आत्महत्या करूंक लागलो जाल्यार देशाच्या फुडाराचेरूच प्रस्न निर्माण जावंक शकता. म्हणून विद्यार्थ्यांच्यो आत्महत्या देशांतल्या राज्य सरकारांनी गंभीरतायेन घेवच्यो आनी आत्महत्या आडावपा खातीर ठोस धोरण आंखचें. अर्थांत विद्यार्थी आत्महत्या कित्याक करतात हाचोय विचार जावंक जाय. विद्यार्थ्यांच्या वाडट्या आत्महत्या फाटल्यान खूबशीं कारणां आसात. तातूंतलें मुखेल कारण म्हणल्यार पालकांच्यो भुरग्यां कडल्यान व्हड प्रमाणांत आनी गरजे भायल्यो अपेक्षा. शिक्षणांतली सुमारा भायली सर्त. गुणांची जिवघेणी चडाओड, शिक्षण घेवन लेगीत नोकरी न मेळप, प्रेमभंग ह्यो आनी अश्या खूबशा कारणांक लागून तरणाटो आत्महत्या करपाक प्रवृत्त जाता.
म्हाविद्यालय हो एक म्हत्वाचो संक्रमणाचो काळ आसा. खूबशे विद्यार्थी पयलेच फावटी घरा पसून पयस रावतात आनी तांकां कुटुंब आनी इश्टां कडल्यान उण्या प्रमाणांत मजत मेळटा. वाडट्या स्वातंत्र्या बराबरच, विद्यार्थ्यांक विवीध स्रोतां कडल्यान चड ताण येता. जशें, वाडट्यो शिक्षणीक मागण्यो, नव्या वातावरणा कडेन जुळोवन घेवप आनी नव्यो आधार प्रणाली विकसीत करप. म्हाविद्यालय, आल्कोहोल आनी हेर ड्रग्सा सयत प्रयोग करपाची संद देखील प्रदान करता. जाका लागून मुडांत समस्या निर्माण जावंक शकतात आनी आत्महत्येचो घात वाडूंक शकता. खूबशे विद्यार्थी मानसीक भलायकी समस्या वा उपचारांचो पयलींचो इतिहास घेवन म्हाविद्यालयांत येतात. मानसीक भलायकी समस्या अणभवपाची प्रवृत्ती आनी पर्यावरणीय ताण हाका लागून आत्महत्येचो घात वाडूंक शकता.
हालींच्या राष्ट्रीय सर्वेक्षणांत 16 टक्के म्हाविद्यालयीन विद्यार्थ्यांक फाटल्या वर्सभरांत निरशेवणीच्या विकाराचें निदान जाल्ल्याचें नोंद केलां. आत्महत्या करपी 90 टक्के परस चड व्यक्तीं मदीं निदान करपा योग्य मानसीक दुयेंस आसता. सामान्यपणान निरशेवणेचो विकार वा पदार्थांचे सेवन विकार. दादल्यांक चड करून पुराय आत्महत्येचो घात आसता. म्हाविद्यालयीन पिरयेच्या दादल्यां मदीं बायलां परस आत्महत्येन मरण येवपाची शक्यताय चार ते स पट चड आसता. बायलां मदीं दादल्यां परस जिवघेणो नाशिल्ल्या मार्गांनी आत्महत्या करपाचो यत्न करपाची शक्यताय दोन ते तीन पट चड आसता.
पयरूच एक बातमी वाचली आनी काळजाक पीळ पडली. वैयक्तीक कारणा खातीर तणावग्रस्त आशिल्ल्या हैद्राबाद बिट्स पिलानी कॅम्पसांतल्यान बिट्स पिलानी गोंय कॅम्पसांत आयिल्लो 20 वर्सां पिरायेच्या विद्यार्थी आपले कुडींत मरण अवस्थेंत सांपडलो. हो विद्यार्थी वैयक्तीक कारणाक लागून ताका निरशेणी आयिल्ल्यान तो तणावा खाला आशिल्लो. ताका लागून ताचेर मानसोपचार तज्ञां कडल्यान उपचार लेगीत सुरू आशिल्ले. थंय उरत जाल्यार ताचो ताण आनीक वाडपाची भिरांत आशिल्ल्यान त्या मानसोपचार तज्ञान ताच्या पालकांक ताची दुसरी कडेन शिक्षणाची सोय करपाची सुचोवणी केल्ली. ताका लागू ताणें हैद्राबाद बिट्स पिलानी कॅम्पसांतल्यान गोंय कॅम्पसांत प्रवेश घेतिल्लो. पूण थंय लेगीत तो तणावा खाला आशिल्लो आनी ह्या तणावांतूच ताणें आत्महत्या केल्ली आसुये असोय निश्कर्श काडटात.
समाज माध्यमांचो वाडटो प्रभाव हें लेगीत विद्यार्थी आत्महत्यांच्या कारणां मदलें एक म्हत्वाचें कारण आसा. समाज माध्यमांच्या आहारी गेल्ल्यान भुरगीं खूब भावनीक जाल्यांत. आपल्या भावनांक आळो घालूंक येवंक नाशिल्ल्यान भुरगीं आत्महत्येचो मार्ग स्विकारतात. ब्लू व्हेल, पोकोमन ह्या सारक्या हिंसक गेम्साक लागून लेगीत खूबश्या भुरग्यांनी आत्महत्या केल्ल्याचें मुखार आयलां. विद्यार्थ्यांक पालकां कडल्यान हालीं खूबश्यो गजाली सहजतायेन मेळूंक लागल्यात. ताका लागून एखादी गजाल जेन्ना मेळना तेन्ना ती मेळची हे खातीर विद्यार्थी हट्ट धरतात आनी तांकां तातूंत अपेस येत जाल्यार आत्महत्येचो मार्ग स्विकारतात. म्हणून पालकांनी भुरग्यांक नकार पचोवंक शिकोवंक जाय. पालकांनी भुरग्यांचेर अपेक्षांचें वजें घालचें न्हय. विद्यार्थ्यांची आत्महत्या म्हणल्यार देशाचें व्हड लुकसाण ताका लागून विद्यार्थ्यांच्यो आत्महत्या आडावपा खातीरची जापसालदारकी फक्त पालकांचीच आसा अशें न्हय जाल्यार शाळा, कॉलेज, शिक्षक, समाज आनी सरकाराचीय आसा. ह्या सगल्या घटकांनी एकठांय यवन विद्यार्थ्यांच्यो आत्महत्या आडावपा खातीर प्रामाणीकपणाक यत्न करूंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
