भांगरभूंय | प्रतिनिधी
म्हणणे सादर करपाक 7 दिसांची मुजत
पणजी ः चरावणे घसघशाचेर विद्यार्थ्यांक व्हरून तांच्या जिवाक धोको निर्माण केल्ल्यान शिवोलेंतल्या सेंट फ्रान्सिस झेवियर उच्च माध्यमिक विद्यालयाच्या वेवस्थापकांक शिक्षण खात्यान कारणां दाखयात नोटीस जारी केली. तांचे म्हणणे सादर करपाक 7 दिसांची मुजत दिल्या. सेंट झेवियर विद्यालय, शिवोलीचे विद्यार्थी आनी कांय शिक्षक २३ सप्टेंबराक चरावणे घसघशाचेर आडकून उरिल्ले.
गोंय विद्यालय शिक्षण नेम 1986 च्या नेम 43 आनी 56 खाला 37 (6), 56 (ऐ), 56 (ब) आनी 56 (सी) खाला ही नोटीस जारी केल्या. हवामान खात्या उटंगाराच्या पावसाची सुचोवणी आसतना आनी खंयच्याच सरकारी यंत्रणेक कळयनासतना पावसांत पर्यावरण भोंवडी आनी नितळसाण मोहीम घडोवन हाडपाचो हेतू कितें आशिल्लो? विद्यार्थी आनी शिक्षकांच्या जिवाक धोको निर्माण करपाचो हो मुद्दाम यत्न आशिल्लो असो निश्कर्श काडून शिक्षण संचालकान वेवस्थापनाक नोटीस जारी केली.
उटंगाराचो पावस आसतना शिवोलेंच्या सेंट फ्रान्सिस झेवियर उच्च माध्यमीक शाळेन सत्तरीतल्या चरावणे घसघशाचेर भोंवडी घडोवन हाडली. हवामान खात्यान व्हड पावसाची शिटकावणी दिल्ली. व्हड पावसाक लागून घसघशाचेर उदकाची पातळी वाडली आनी भोंवडेर गेल्ले 47 विद्यार्थी आनी 5 शिक्षक आडकून उरले. उजो पालोवपी दळ आनी रान खात्याच्या अधिकाऱ्यांनी घडणूक सुवातेर वचून आडकून उरिल्ल्या विद्यार्थ्यांक आनी शिक्षकांक सोडयले. नेमा प्रमाण फावो ती सुरक्षा नासतना आनी हवामान खात्यान व्हड पावसाची शिटकावणी दिली आसून लेगीत भोंवडी आनी नितळसाण मोहीम कशी घडोवन हाडली हाचेर खात्यान हाचे पयलींय स्पश्टीकरण मागिल्लें. वेवस्थापनान 30 सप्टेंबर 2024 दिसा पत्र बरयलें आनी जाप दिवपाक एक सप्तकाचो वेळ मागिल्लो.
वेवस्थापनान धाडिल्ल्या स्पश्टीकरणांत भोंवडेची म्हायती सरकारी यंत्रणेक दिली काय? हे संबंदीं कसलीच जाप दिवंक ना. उजो पालोवपी दळ आनी रान खात्याच्या कर्मचाऱ्यांचे उपकार मानचे बदला विद्यार्थ्यांनी स्वता सुटका करुन घेतली. उजो पालोवपी दळ आनी रान खात्यान हे मजतीचें श्रेय घेवपाचो यत्न केल्ल्याचो उल्लेख स्पश्टीकरणांत केला. वेवस्थापनाच्या ह्या जापेक शिक्षण खात्यान हरकत घेतल्या.
आडकून उरिल्ल्या मदल्या एका विद्यार्थ्यान उजो पालोवपी दळाक संदेश धाडून मजतीची मागणी केल्ली. ह्या वेळार रान खात्याचे दोन जवान घडणूक सुवातेर पावले आनी मजत केली. तशेंच पुलीस आनी उजो पालोवपी दळाचे कर्मचारीय थंय पावलें आनी मजत केल्ल्याचो उल्लेख वेवस्थापनान धाडिल्ल्या पत्रांत आसा.
वेवस्थापनाकडल्यान विद्यार्थ्यांचे सुरक्षे कडेन दुर्लक्ष
भोंवडी आनी नितळसाण मोहिमेक मंजुरी दिवचे पयलीं वेवस्थापनान नेमा प्रमाण गरजेची सुरक्षेची जतनाय घेवंक ना. खात्यान वेळोवेळ जारी केल्ल्या परिपत्रका प्रमाण सुरक्षेची जतनाय घेवप सक्तीचें आसा. तशेंच मजती खातीर उजो पालोवपी दळ, रान खात्याचे उपकार मानचे परस वेवस्थापनान श्रेय घेवपाचो यत्न केलो असो उल्लेख पत्रांत केला. सरकारी यंत्रणेक दोश दिवप धोरणांत ना अशें शिक्षण खात्यान कारणां दाखयात नोटीसीत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
