भांगरभूंय | प्रतिनिधी
केरी-सत्तरी: स्वातंत्र्य सैनीक जगन्नथराव जोशी सरकारी मुळावी शाळा सांखळी हावसींग बोर्डाच्या विद्यार्थ्यांनी हरवळ्यां विष्णू मळीक हांच्या गणपती चित्र शाळेक भेट दिली.
गणपती तयार करपा खातीर लागपी चिकण माती फुगत घालप, माती मळप, माती साच्यांत भरप, साच्यांची वेवस्थीत रचणूक करप, गणपतीची मूर्त तयार जाले उपरांत रंगोवप हे विशींचीं प्रात्यक्षिकां वरवीं विस्तारान म्हायती मळीक हांणी विद्यार्थ्यांक दिली.
विद्यार्थ्यांक अदीक म्हायती दितना तांणी म्हणलें, हे प्रक्रियेक सुमार तीन म्हयने लागतात. मूर्त तयार करपा खातीर जून म्हयन्या सावन सुरवात करची पडटा. मूर्त करतना एकाग्रतायेन काम करूंक जाय जाल्यारूच ताची निर्मिती बरे तरेन जाता. ही पुराय प्रक्रिया पळोवन गणपतीची मूर्त तयार करपाचो आनंद कितें आसता हें समजलें. दरेकाच्या कामाक कितलें म्हत्व आसता हें भुरग्यांक प्रत्यक्ष अणभव घेतले उपरांत समजलें. चित्र शाळेक भेट दिवन भुरग्यांनी श्रीगणपतीची आकर्शक मुर्तींचें दर्शन घेवन स्वताय अशे तरेच्यो मुर्ती तयार करपाचो निश्चेव केलो, आनी खंयचेंय काम एकाग्रतायेन करीत जाल्यार तातूंत नक्कीच येस मेळटा हें तांकां होलमलें.
विष्णू मळीक हांचो हो परंपरीक वेवसाय आसा. फाटल्या कितल्याशाच वर्सां सावन तांणी हो वेवसाय सांबाळ्ळा. ह्या वेवसायांत तांची भुरगीं लेगीत तांकां मजत करतात. ह्या वर्सा तांणी 250 गणपतीच्यो मुर्ती तयार केल्यात. तांचो हो परंपरीक वेवसाय हाचे मुखारूय असोच चालू दवरतले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
