विद्यार्थ्यांची आत्महत्याः शाळा, म्हाविद्यालयां आनी कोचिंग संस्थां खातीर 15 निर्देश जारी
भांगरभूंय | प्रतिनिधी
नवी दिल्ली, खबरां संस्थाः विद्यार्थ्यांच्या आत्महत्या विशीं गंभीर हुस्को उक्तायतना सर्वोच्च न्यायालयान देशभरांतल्या शाळा, म्हाविद्यालय आनी कोचिंग संस्थां खातीर 15 मार्गदर्शक तत्वां जारी केल्यांत. केंद्र वा राज्य सरकार कायदो करनात तो मेरेन दरेक शिक्षणीक संस्थेंत हीं मार्गदर्शक तत्वां सक्तीचीं आसतली अशें न्यायालयान सांगलें. विशाखापट्टणमांतल्या वसतीघरांच्या छप्परा वयल्यान पडून नीटाची तयारी करपी 17 वर्सां पिरायेच्या चलयेक दुबावीत मरण आयिल्ल्या प्रकरणांत न्यायाधीश विक्रम नाथ आनी संदीप मेहता हांच्या खंडपिठान हो आदेश दिला.
सगळ्या राज्य सरकारांनी आनी केंद्रशासित प्रदेशांनी दोन म्हयन्यां भितर खाजगी कोचिंग सेंटरांची नोंदणी, विद्यार्थ्यांचे सुरक्षेचे नेम आनी तक्रारी निवारणा संबंदी अधिसुचोवण्यो जारी करच्यो अशें खंडपिठान सांगलां. दरेका जिल्ल्याच्या जिल्लोधिकाऱ्याच्या अध्यक्षते खाला एक निरिक्षण समिती स्थापन करची. जी मार्गदर्शक तत्वांचें पालन करपाचेर नियंत्रण दवरतली. न्यायालयान 90 दिसां भितर केंद्रा कडल्यान प्रतिज्ञापत्र मागलां.
- दरेक शिक्षणीक संस्थे खातीर एक समान मानसीक भलायकी धोरण तयार करचें. जें ‘उम्मीद’ मार्गदर्शक तत्वां, ‘मनोदर्पण’ मोहीम आनी राष्ट्रीय आत्महत्या प्रतिबंध धोरणांतल्यान प्रेरित आसतलें.
- जंय शंबरां परस चड विद्यार्थी आसात थंय प्रशिक्षीत सल्लागार, मानसशास्त्रज्ञ आनी समाजसेवकांची नेमणूक करची. ल्हान संस्था भायल्या तज्ञां कडेन संपर्क करतली.
- दर एका विद्यार्थ्यांच्या पंगडाक एक मार्गदर्शक वा सल्लागार आसचो, खास करून परिक्षेच्या वेळार वा अभ्यासक्रम बदलतना.
- प्रशिक्षण संस्थांनी विद्यार्थ्यांच्या कामगिरीचेर आदारून तांचो कसलेंच तरेचो अपमान करचो न्हय.
- मानसीक भलायकी सेवा, थळावे हॉस्पिटल आनी आत्महत्या प्रतिबंधक हेल्पलायनी कडेन संपर्क करपाची वेवस्था संस्थेन करची. हेल्पलायन क्रमांक प्रदर्शीत करपाक जाय.
- दरेका संस्थेंतल्या शिक्षकांक आनी कर्मचाऱ्यांक मानसीक भलायकी, आत्महत्येचीं लक्षणां आनी प्रथमोपचार हांचे विशीं वर्साक दोन फावटीं प्रशिक्षण दिवचें.
- अनुसुचीत जाती/ जमाती, हेर मागास वर्ग, अर्थीक नदरेन दुबळे गट, एलजीबीटीक्यू+, दिव्यांग, अनाथ वा मानसीक त्रासांतल्या विद्यार्थ्यां कडेन भेदभाव करचो न्हय.
- लैंगीक त्रास, रॅगिंग, जात आनी धर्म हांचेर आदारून जावपी भेदभाव हांचे आड कारवाय करपा खातीर अंतर्गत समिती आसची. कागाळदाराक त्रासापसून संरक्षण मेळपाक जाय.
- पालकांक जागृताय शिबिरां घडोवन हाडचीं, जाका लागून तांणी आपल्या भुरग्यांचेर दबाव हाडचो न्हय.
- संस्थेन दर वर्सा एक अहवाल तयार करचो जातूंत विद्यार्थ्यांच्या मानसीक भलायके कडेन संबंदीत समुपदेशन, सत्रां, कार्यावळीं विशीं म्हायती आसतली. हो अहवाल यूजीसी वा सीबीएसई सारक्या मंडळांक सादर करचो.
- अभ्यासक्रमा वांगडाच खेळ, कला आनी व्यक्तीमत्व उदरगतीचेर लक्ष केंद्रीत करपाक जाय. परिक्षेचें स्वरूप अशें आसचें की तातूंतल्यान विद्यार्थ्यांचेर चड भार पडचो ना.
- विद्यार्थी आनी पालकांक नेमान करियर समुपदेशन आसपाक जाय. तातूंत वेगवेगळ्या करिअर पर्याया विशीं म्हायती आसपाक जाय आनी विद्यार्थ्यांक तांच्या आवडी प्रमाण निर्णय घेवपाक मजत करची.
- वसतीघर वेवस्थापनान कॅम्पस ड्रग्साचो वापर करनात, हिंसाचार वा त्रासा पसून मुक्त आसा आनी विद्यार्थ्यांक सुरक्षीत वातावरण मेळचें हाची खात्री करची.
- हॉस्टेलांनी छप्पर, बाल्कनी, पांखे अशीं सुरक्षेचीं साधनां लावचीं.
- कोटा, जयपूर, चेन्नय, दिल्ली ह्या प्रशिक्षण केंद्रांनी नेमान समुपदेशन आनी शिक्षणीक येवजणेचेर नियंत्रण दवरपाचे खाशेले यत्न करचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
