भांगरभूंय | प्रतिनिधी
बलराम शिक्षण संस्थेच्या स्थापणूक दिसा विद्यार्थ्यांचो भोवमान
काणकोण: आयच्या सर्तीच्या युगांत तिगोवन उरपा खातीर विद्यार्थ्यांनी सतर्क आसपा बगरूच शिक्षकांनीय स्वता अद्ययावत रावप गरजेचें आसा. फुडारांत संस्थे वतीन शंबर विद्यार्थ्यांक रोबोटिक्साचें शिक्षण दिवपा खातीर प्रयत्नशील आशिल्ल्याचें उलोवप बलराम शिक्षण संस्थेचे संस्थापक अध्यक्ष आनी सभापती रमेश तवडकार हांणी केलें.
आमोणें-पैंगीणी बलराम शिक्षण संस्थे वतीन स्थापणूक दिसाचें औचित्य सादून आयोजीत केल्ल्या धावी आनी बारावीच्या परिक्षेंतल्या गुणेस्त विद्यार्थ्यांच्या भोवमान सुवाळ्यांत ते मुखेल सोयरे म्हूण उलयताले.
बलराम निवासी विद्यालयाच्या सभाघरांत ही कार्यावळ जाली. ह्या वेळार तांचे बरोबर संस्थेचे अध्यक्ष अंकूश गांवकार, उपाध्यक्ष रमेश गांवकार, सचीव जानू तवडकार, भांडारी गणेश गांवकार, वेवस्थापक राजेंद्र वेळीप, मुख्याध्यापिका सविता तवडकार, बलराम डे केअर विद्यालयाचे मुख्याध्यापक अशोक गांवकार, बलराम उच्च माध्यमीक विद्यालयाच्यो प्रभारी प्राचार्य कविता नायक गांवकार, प्रभारी मुख्याध्यापिका वंदना गांवकार, बलराम मुळावे शाळेचे चंद्रकांत वेळीप, निशी काणकोणकार, पालक शिक्षक संघाच्यो अध्यक्षा वृंदा वेळीप, रेखा काणकोणकार, सोनाली नायक, देवेंद्र गांवकार हाजीर आशिल्ले.
सुरवातेक बलराम अ डे केअर विद्यालयाच्या विद्यार्थ्यांनी येवकार गीत सादर केलें. उपरांत मानेस्तांचे हस्तुकीं गुणेस्त विद्यार्थ्यांचो भोवमान केलो. तातूंत प्रणवी तुबकी देसाय, रिशा गांवकार, पुजा गांवकार (बलराम निवासी विद्यालय), श्रेया मेस्त्री, मकरंद वेळीप, रिया भंडारी (बलराम डे केअर), सोनाक्षी वेळीप, संघर्ष वेळीप, अमृता गांवकार (कला फांटो), स्वरांगी नायक, आश्विनी वेळीप, अविरत नायक (वाणिज्य फांटो, बलराम उच्च माध्यमीक) ह्या विद्यार्थ्यांचो आस्पाव आसा.
ह्या वेळार अंकूश गांवकार, गणेश गांवकार हांचींय उलोवपां जालीं. सविता तवडकार हांणी मानेस्तांक येवकार आनी वळख करून दिली. सुत्रसंचालन शिक्षिका रेषा खोलकार हांणी केलें. जाल्यार जानू तवडकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
