भांगरभूंय | प्रतिनिधी
एक तेंप आसलो. शाळेंत मास्तर आसतालो. ताच्या हातांत सदांच छडी आसताली. खंयचोय भुरगो अभ्यास करिना वा मस्तीपणां करूंक लागलो वा मास्तराचें आयकना जालो वा वर्गांत बेशिस्त वागूंक लागलो जाल्यार मास्तर त्या भुरग्याक तापयतालो, ताचेर तिडकतालो आनी गरज पडल्यार आपल्या हातांतली छडीय मारतालो. ती छडी बरीच दुखताली. मास्तराची छडी पडटली ह्या भंयान आमी वर्गांत मास्तरान सांगिल्लो अभ्यास चुकनासतना करताले, शिस्तीन वागताले. मास्तराची छडी आमचेर पडची ना हे खातीर आमी खूब जतनाय घेताले. आमकां शाळेंत मास्तरा परस ते छडयेचोच चड भंय दिसतालो. मास्तर आमची जितली अपुरबाय करतालो तितलोच आमचेर तिडकूय काडटालो. ताका बेशिस्त सोंसनासली. फटींगपणां मानवनासलीं. दुसर्याची कॉपी केल्लीय ताका आवडनासली. खंयच्याय भुरग्यान दुसर्याची कॉपी केल्या अशें कळ्ळें तर ताचेर मास्तराची छडी पडटालीच. तेन्ना मास्तराचो आमकां खूब राग येतालो. कळना जाल्यार दुसर्याची इल्ली कॉपी केल्यार कितें जालें? अशें मास्तराक विचारिनशें दिसतालें, पूण मास्तराचे छडयेक पळोवन उतरांच फुटनासलीं. तोंड धांपून सोंसचें पडटालें. मास्तराचो मार खावचो पडटालो. घरा कडेन सांगपाचीय माणसुकी नासली. कारण घरांतलीं आवयबापूय मास्तराचीच बाजू घेतालीं आनी दुसर्याची कॉपी करप ना अशें आमकां शिटकायतालीं. आयज तो मास्तर ना आनी ती छडीय ना, पूण त्या मास्तराक लागून आनी मास्तराचे ते छडयेक लागून आमी सुसंस्कारीत आनी शिस्तप्रीय जावंक पावले हाचो आमकां अभिमान आसा आनी कॉपी करिनासतनाच सगल्यो यत्ता पास जाले हाचो आमकां गर्व आसा.
आयज शिक्षणांत चल्ल्या ती बजबजपुरी आनी मनमानी पळयल्यार आमचो तेंप खूब बरो आसलो अशें दिसूंक लागता. आयचीं भुरगीं शिकनात अशें न्हय, शिकतात. जीव ओतून शिकतात, आपलें करियर बरें जावचें म्हणून रातीचो दीस करतात. रगताचें उदक करतात. आपणाक शिकोवपा खातीर आपल्या आवयबापायन खूब कश्ट काडल्यात, खूब त्रास सोंसल्यात, खूब परिश्रम केल्यात हाची जाण आशिल्ले भुरगे आवयबापायच्या कश्टाचें चीज जावचें म्हणून धडपडटात. पयलो क्रमांक मेळोवपा खातीर तान – भूक विसरून खूब अभ्यास करतात, पदवी मेळयतात आनी उपरांत नोकरे खातीर धडपडटात. म्होंवीं सपनां बाळगितात. पूण नोकरी तर मेळच ना, वयल्यान कोण तरी पेपर फोडून तांचीं सगलीं सपनां मातये भरवण करता. तांचे उमेदीचेर विरजण पडटा. ताण सोंसूंक नजं जावन तांच्या मनाचेरय भयंकर परिणाम जाता. प्रामाणीकपणान अभ्यास करून पयलो क्रमांक मेळोवपाचो काय पेपर फोडून दोतोर, इजनेर जावपाचो असो प्रस्न तांकां पडटा आनी वर्गांत ‘बॅकबॅन्चर’ म्हणून बसपी भुरगें जेन्ना फटींगपणां करून वयल्या पदार पावतात तेन्ना ह्या प्रामाणीक भुरग्यांच्या मनाचेर खोल परिणाम जाता आनी तांच्या मनांत आत्महत्या करपाचे विचारय घोळूंक लागतात. तांणी मनांत आंखून दवरिल्ली दिशाच बदलता आनी तांची दशा जाता.
पेपर फुटपाचीं प्रकरणां हालीं खुबूच वाडूंक लागल्यांत. अभ्यास करिनासतना पास जावपाची आनी त्रास काडिनासतनाच पयलो क्रमांक मेळोवपाची मानसीकताय वाडल्या. तूं कितलोय अभ्यास कर, प्रामाणीकपणान पास जावपाचो यत्न कर, तूं थंयच उरतलो. तुका जर तुजो फुडार घडोवपाचो आसत तर प्रामाणीकपण खुंटयाळ्याक लाय आनी फटीचीं प्रमाणपत्रां, फटीच्यो पदव्यो मेळय. पयशे आसल्यार आयज कसल्योय पदव्यो मेळटात. ह्यो पदव्यो मेळयल्यार तूं वयल्या पदाक पावतलो अशें कोण तरी प्रामाणीक भुरग्याक सांगता आनी ‘अभ्यासा कडेन प्रामाणीक रावात’ हो मास्तराचो उपदेश विसरून तोवूय त्याच वांकड्या मार्गान चलूंक लागता. वयल्या पदार पावता. स्वता फटींगपणां करून वयलें पद मेळयिल्लो मनीस आपलेच शिक्षणीक संस्थेंत जाल्ल्या पेपरफुटीच्या प्रकरणाची चवकशी कशी कितें करतलो? न्याय कसो मेळोवन दितलो?
हालींच ‘नीट’ परिक्षेचो पेपर फुटलो. ‘नीट’ परिक्षेचे पेपर लीक करपांत हात आशिल्ल्यांक अटक जाली. अशीं प्रकरणां करपी लोकांक मेकळे सोडचे नात अशें संबंदीत मंत्र्यांनी जाहीर केलें. ताचें फुडें कितें जालें तें तांकांच खबर. हे फुडें अशे पेपर फुटचे नात हाची गारांती आसा? ज्या मनशांनी हें कर्तूब केलां तें अशें परत करचे नात हाची खात्री आसा? पेपर फुटपाच्या प्रकरणांत परत लक्ष घालचे नात अशें ते म्हणटले अशी हमी कोण दिवंक शकता? पेपर फोडून जर पास जावंक मेळटा आसत तर कश्ट, पयसो, वेळ आनी शक्त खर्चून अभ्यास तरी कित्याक करचो? अशें प्रामाणीकपणान अभ्यास करपी विद्यार्थ्यांक दिसप सभाविकूच!
खरें म्हणल्यार परिक्षेंतले हे वायट प्रकार आडावपा खातीर कायदे आसात. ह्या कायद्या प्रमाण पेपर फोडप्यांक उणींच तीन वर्सां आनी चडांत चड धा वर्सां मेरेनची बंदखण फर्मावपाची तजवीज आसा. पूण खंयचे कडेन कांयच ना. नाय म्हणल्यार लोकांच्या दोळ्यांक उदक लावपा खातीर दोन दीस अश्या प्रकरणांनी हात आशिल्ल्यांक धरिल्ले भशेन करप आनी उपरांत तांकां मेकळे सोडून दिवप. अशें जेन्ना जाता तेन्ना भ्रश्टाचार वाडटा. वाडटी बेकारी, सरकारी नोकरेचें हांयस, गरिबी आनी फोल्गां मारपाची वाडटी वृत्ती अश्या पेपरफुटींक कारणीभूत आसता. ताचीं पाळांमुळां खोल रुतिल्लीं आसतात आनी तीं दिसानदीस अदीकादीक मजबूत जायत आसात. पेपरफुटीच्या प्रकरणांत कोणा कोणाक धरतले? हे प्रकार कशे आडायतले? भ्रश्टाचाराचें हें जाळें केन्ना आनी कशें सोंपतलें? काय हें अशेंच चलत रावतलें?
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
