भांगरभूंय | प्रतिनिधी
मुख्यमंत्रीः स्मार्ट क्लासरुमा परस स्मार्ट शिक्षक आसप गरजेचें
भांगरभूंय । प्रतिनिधी
पणजीः विद्यार्थ्यांक मारपेट करप हो प्रकार हुस्क्याचो आसा. तशें पळोवपाक गेल्यार अशे प्रकार जावपाकूच जायनात. जी व्यक्ती मनांतल्यान शिक्षक आसा, ती अशें करपाकूच शकना. कांय शाळांक आपलो आनी सरकाराचो संबंद ना अशें दिसता, मात तांणी तांकां मेळटा ते अनुदान सरकारा कडल्यान मेळटा, हें मतींत दवरप गरजेचें आसा. एकेकदा संस्थाचालक शिक्षकांचो पगार उसरां घालतात. जाल्यार कांय शिक्षक संस्थाचालकां कडेन दादागिरी करतात. अश्या प्रकारांक लागून विद्यार्थ्यांचेर परिणाम जातात जाल्यार शाळांचेर कारवाय करतले, अशें मुख्यमंत्री डॉ. प्रमोद सावंत हांणी सांगलें.
बिरेस्तारा शिक्षण खात्या वतीन आयोजीत शिक्षक दिसाचे कार्यावळींत मुख्यमंत्री उलयताले. ह्या वेळार प्रसाद लोलयेंकार, शैलेश झिंगडे, मेघना शेटगांवकार, डॉ. शंभू घाडी आनी हेर अधिकारी हाजीर आशिल्ले. ह्या वेळार सात शिक्षकांक मुख्यमंत्री वसिष्ठ गुरू पुरस्कार भेटयले.
शिक्षण खात्या कडेन अनुदानीत शाळांतले शिक्षक वा वेवस्थापना विशीं कागाळी आयल्यात. हाचेर खर कारवाय सुरू केल्या. हे मुखार शाळेंतली कसलेच तरेची अनियमितता खपोवन घेवचे नात, अशी शिटकावणी मुख्यमंत्र्यान ह्या वेळार दिली.
सध्या शिक्षण मळार तंत्रज्ञानाचो वापर वाडला. ताचो वापर करचे खातीर शिक्षण खात्यान गोंयांतल्या शाळांत सगळे तरेची मजत केल्या. अशें आसलें तरीय स्मार्ट क्लासरुमा परस स्मार्ट शिक्षक आसप गरजेचें आसा. शिक्षकांनी विद्यार्थ्यांक फक्त पुस्तकी ज्ञान शिकयनासतना वेव्बारीक ज्ञान दिवचें. विद्यार्थी भावनीक नदरेन सक्षम नासत जाल्यार फुडारांत आत्महत्या, व्यसनां अशे प्रकार सुरू जातात. ते खातीर शिक्षकांनी विद्यार्थ्यांक कसलेय तरेची भावनीक परिस्थितींत स्वताक सांबाळपाक शिकोवपाक जाय. विद्यार्थ्यांची आवड पळोवन ताका योग्य करिअर मार्गदर्शन करचें, अशें मुख्यमंत्र्यान सांगलें.
बंद पडिल्ले शाळेन घडयली एक पिळगीः लोलयेंकार
सरकारी मुळाव्यो शाळा बंद पडपा फाटल्यान खूबशीं कारणां आसात. आपल्या वाड्या वयली एक मुळावी शाळा बंद पडली. ते शाळेंत खूबशे विद्यार्थी शिकल्यात. थंय आतां विद्यार्थ्यांची संख्या उणी जाल्ल्यान ती बंद पडली. मात आपूण म्हजी शाळा बंद पडली अशें म्हणचे परस म्हजे शाळेन घडयल्ली एक पिळगी आतां संवसारभरांत काम करता, अशें म्हणन, अशें प्रसाद लोलयेंकार हांणी सांगलें.
शिक्षकांनी हातांत पट्टी लेगीत घेवची न्हयः झिंगडे
शिक्षण खात्याचे संचालक शैलेश झिंगडे हांणी कार्यावळी उपरांत प्रसार माध्यमां कडेन संवाद सादलो. तांणी सांगलें, खंयच्याच शिक्षकाक विद्यार्थ्याक मारपाचो अधिकार ना. आमी वेळावेळार विद्यार्थ्यांक अशी ख्यास्त दिवची न्हय, असो आदेश काडटात. शिक्षकांनी हातांत पट्टी लेगीत घेवची न्हय, अशी सुचोवणी दिल्या. कामुर्लेचो प्रकार धपको दिवपी आसा. त्या शिक्षिकांच्या निलंबनाचेर 12 सप्टेंबराक सुनावणी घेतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
