भांगरभूंय | प्रतिनिधी
पणजी: शिक्षण खात्यान सरकारी मुळाव्या शाळांतली यत्ता पयली आनी तिसरेच्या विद्यार्थ्यांक शाळेचो गणभेस आनी रेनकोट विकत घेवपा खातीर ११०० रुपया इतलो निधी सरळ लावार्थ्यांच्या बँक खात्यांत जमा करपाची प्रक्रिया सुरू केल्या. हें दर आधार क्रमांक जोडिल्ल्या बँक खात्यांनी घालतले. ‘रेनकोट आनी गणभेस पुरवण’ हे येवजणे खाला हो निधी दितले, हे पयशे सरळ लावार्थ्यांच्या खात्यांत पावचे खातीर ही प्रक्रिया पयलेच फावट राबयता.
सरकाराचे सुचवणे प्रमाण, १ कोटी १ लाख २० हजार रुपया इतलें दर शिक्षण खात्यान मंजूर केलां. गोंयच्या १२ म्हालांतल्या सुमार ९,२०० विद्यार्थ्यांक हाचो लाव मेळटलो.
निधी असो आसा:
रेनकोट विकत घेवपाक ५०० रुपया
गणभेस विकत घेवपाक ६०० रुपया
सर्व तालुका शिक्षण अधिकारी आनी शाळांचे मुख्याध्यापक हांकां १५ जुलय मेरेन निधी वाटपाची प्रक्रिया पुराय करपाचे निर्देश दिल्यात. शासन परिपत्रका प्रमाण पालकांनी आपल्या आधार नंबराक जोडिल्ल्या बँक खात्यांची म्हायती संबंदीत शाळेंत सादर करची, हाका लागून तें दर सरळ तांच्या खात्यांत जमा करपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
