विद्यार्थ्यांक आतां ‘अपार’ सक्ती

भांगरभूंय | प्रतिनिधी

शिक्षण खात्या कडल्यान परिपत्रकांत निर्देश

भांगरभूंय । प्रतिनिधी

पणजीः शाळेंतल्या सगळ्या वेव्हारां खातीर शिक्षण संचालनालयान आपार कार्ड विद्यार्थ्यां खातीर सक्तीचें केलां. शाळा बदलप, माधान्य आहार आनी हेर सरकारी येवजणेचो लाव आपार कार्डच्या माध्यमांतल्यानूच मेळटलो. देखून सगळ्या शाळांक विद्यार्थ्यांचें आपार कार्ड करपाक गती दिवपाचे निर्देश शिक्षण संचालनालयान दिल्यात.

शिक्षण मळार डिजिटायजेशन करपा खातीर गोंय सरकारान विद्यार्थ्यांक बारा अंकी अपार वळख पत्र दिवपाचें घोशीत केल्लें. विद्यार्थ्यांक एक डिजिटल वळख दिवन तांचो शिक्षणीक रेकोर्ड आनी तांचे प्रगतीचेर देखरेख दवरप हो ताचो हेतू आसा. शिक्षण खात्यान काडिल्ल्या परिपत्रकांत म्हणलां, अपार वळखपत्र ही विद्यार्थ्यांची मुळावी वळख म्हूण वापर करपाची मोख दवरून शाळा बदलप आनी स्थलांतर करपा खातीर अपार दाखोवप आतां सावन सक्तीचें आसा. तशेंच फुकट पाठ्य पुस्तकां, माधान्य आहार आनी हेर सरकारी लाव घेवपा खातीर आपार सक्तीचें आसतलें. देखून विद्यार्थ्यांचें अपार वळखपत्र तयार करपाचे प्रक्रियेक गती दिवपाची जापसालदारकी सगळ्या शाळेच्या मुखेल्यांनी घेवची. शिक्षक, विद्यार्थी आनी पालक हांकां ही म्हायती कळोवचे खातीर ह्या परिपत्रकाची एक प्रत शाळेच्या नोटीस बोर्डार दिसता तशी लावची, अशे निर्देश शिक्षण संचालक शैलेश झिंगडे हांणी दिल्यात.