भांगरभूंय | प्रतिनिधी
मनीस हक्क आयोगाची गोंय विद्यापीठाक नोटीस
भांगरभूंय । प्रतिनिधी
पणजी : गोंय विद्यापिठाच्या इंटिग्रेटेड एमबीए विभागांतल्या विद्यार्थ्यांनी ‘फ्रॉलीक’ कार्यावळ घडोवन हाडिल्ली. ह्या वेळार ‘थर्ड डिग्री’ कार्यावळींत कांय चल्यांक फक्त अंडरवियरीचेर भोंवडायिल्ले, असो आरोप आसा. ह्या वेळार हाजीर आशिल्ल्या कांय विद्यार्थिनींक सुवात सोडपाची परवानगी दिवूंक ना, असो आरोप जायत्या पालकांनी आनी राजकी फुडाऱ्यांनी केला.
गोंय विद्यापिठांत ‘फ्रॉलीक’ हे वर्सुकी सांस्कृतीक कार्यावळींत घडिल्ल्या आक्षेपार्ह घडणुकेची दखल घेवन गोंय मनीस हक्क आयोगान गोंय विद्यापीठाचे कुलगुरू प्रा. हरिलाल मेनन हांकां नोटीस धाडल्या. तांणी 23 जुलय मेरेन हे घडणुकेचो सविस्तर अहवाल वा जाप सादर करपाचे निर्देश गोंय मनीस हक्क आयोगान दिल्यात.
ह्या प्रकरणाची म्हायती प्रसार माध्यमांतल्यान मेळ्ळे उपरांत आयोगान स्वेच्छा दखल घेवन ह्या कार्यावळीक लागून विद्यार्थ्यांची प्रतिश्ठा इबाडल्या काय ना हाची चवकशी करपाचो निर्णय घेतला.
हे कार्यावळींतलो एक परिक्षकूय माचयेर अश्लील वागिल्ल्याचो आरोप आसा. कांय चलयांनी विद्यापीठ प्रशासना कडेन कागाळ केल्या. हातूंत वांटेकार जाल्ल्या विद्यार्थ्यांची काक्रा दर्यादेगेर मेरेन अंडरवियरीचेर मिरवणूक काडिल्ल्याचो आरोप कांय जाणांनी केला.
विद्यार्थी संघटना आनी कांय राजकी फुडाऱ्यांनी हाचेर खर प्रतिक्रिया दिवन उंचेल्या पांवड्यार चवकशी करपाची मागणी केल्या. एनएसयूआय गोंय फांट्याचे अध्यक्ष नौशाद चौधरी हांणी हाचे पयलीं ‘थर्ड डिग्री’ कार्यावळ बंद करची, अशी मागणी केल्ली.
मजगतीं, विद्यापिठाच्या अंतर्गत कागाळ निवारण समितीन (आयसीसी) हे संबंदांत वेगवेगळ्या वटांनी विद्यार्थ्यांचे विचार मागयल्यात, अशी म्हायती कॅम्पस युनियनाचे अध्यक्ष सतेज सिनाय खांडेपारकार हांणी दिली. सध्या विद्यापीठ प्रशासनाचेर ह्या पुराय प्रकरणांत आपली जापसालदारकी स्पश्ट करपा खातीर चेपण वाडत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
