भांगरभूंय | प्रतिनिधी
विद्यालयां कडल्यान मागयल्या विद्यार्थी, शिक्षकांची म्हायती
पणजी : शिक्षण खात्यान दरेकी सरकारी तशेंच अनुदानीत विद्यालयां कडल्यान शिक्षक आनी विद्यार्थ्यांची म्हायती मागयल्या. उपरांत विद्यार्थी आनी शिक्षक हांचें प्रमाण कळपाक मजत जातली. आमदार एल्टन डिकोस्टा हांच्या लेखी प्रस्नाक शिक्षणमंत्री डॉ. प्रमोद सावंत हांणी दिल्ले लेखी म्हायतींत हो तपशील आसा.
राज्यांत राष्ट्रीय शिक्षण धोरणाची कार्यवाही सुरू जाल्या. हे फाटभूंयेर विचारिल्ल्या लेखी प्रस्नाक ही लेखी म्हायती दिल्या. विद्यार्थी – शिक्षक हांचें प्रमाण कळ्ळे उपरांत ज्या विद्यालयांत शिक्षक उणें आसात, तांकां शिक्षकांची भरती करपाक एनओसी दितले. राष्ट्रीय शिक्षण धोरणाची कार्यवाही करतना शिक्षकांच्या आवश्यकतेचो विचार सुरू आसा. कला, संगीत, एनएसक्यूएफ शिक्षक गोवा समग्र शिक्षा अभियाना खाला उपलब्ध करतले. तशेंच एनईपीचो विचार करून शिक्षकांक प्रशिक्षण दिवपाची कार्यावळ सुरू जाल्या. शिक्षण खातें आनी एससीईआरटी वरवीं शिक्षकांक प्रशिक्षण दिवप सुरू आसा. दरेकी विशयाचो अभ्यासक्रम तशेंच मोलावणेविशीं मार्गदर्शन करपाची प्रक्रीया सुरू जाल्या. एनईपीची कार्यवाही पावंड्या पावंड्यान सुरू जाल्या.
२०२३- २०२४ शिक्षणिक वर्सा फावंडेशन स्टेज १ पावंड्यार एनईपीची कार्यवाही सुरू जाली. २०२४- २०२५ वर्सा एनईपीची कार्यवाही फावंडेशन स्टेज २ आनी णवव्या यत्तेक सुरू जाली. २०२५ – २०२६ वर्सा दुसरी, तिसरी (प्रीपेरेटरी स्टेज), सवी (मिडल स्टेज) आनी धाव्या यत्तेक सुरू जातली. २०२४ – २५ वर्सा राष्ट्रीय शिक्षण धोरणाचेर ८ कोटी २० लाख रूपया खर्च जाले असो तपशील जापेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
