भांगरभूंय | प्रतिनिधी
भांगरभूंय । प्रतिनिधी
काणकोणः विद्यार्थी नाशिल्ल्यान काणकोण तालुक्यांतल्यो चार सरकारी प्राथमीक शाळा अंदूच्या शिक्षणीक वर्सा सावन बंद केल्यात अशी म्हायती तालुक्याचे एडीईआय लॉरेन्स परेरा हाणे दिली. तीन शाळेंत दरेकी एक शिक्षक शिकयतालो. हे तिनूय शिक्षक फाटल्या शिक्षणीक वर्सांत निवृत्त जाले. एक शिक्षक आशिल्ल्या एके शाळेतल्या शिक्षकाक सध्या दुसरे शाळेंत धाडलां अशें ताणे सांगलें.
विद्यार्थी नाशिल्ल्यान धवळखाजन (आगोंदा), इदर (लोलयें- पोळें), मुठाळ (सादोळशें- पैंगीण) आनी माळोरें (खोला) ह्यो शाळा बंद करच्यो पडल्यात. मोळोरें शाळेंत फकत एक विद्यार्थी आशिल्लो. ताका ताच्या पालकांनी लागीचे शाळेत घातलां. तीन शाळांनी अंदूच्या शिक्षणीक वर्सा एकूय विद्यार्थी नाशिल्लो.
काणकोण तालुक्यांत 58 प्राथमीक शाळा एक शिक्षकी आसात. लोलयें- पोळें पंचायत वाठारांतली माशें आनी खोतीगांव पंचायत वाठारांतल्या अवें शाळेंत दरेकी फकत तीन विद्यार्थी आसात. श्रीस्थळ पंचायत वाठारांतल्या नुवें शाळेंत सगल्यांत चड 56 विद्यार्थी आसात आनी तांका दोन शिक्षक शिकयतात अशी म्हायती परेरा हाणे दिली.
15 सरकारी प्राथमीक शाळांनी 10 परस उणे आनी 18 शाळांनी 20 परस उणे विद्यार्थी आसात. बाकीच्या 21 शाळांनी 21 तें 37 विद्यार्थी आसात. अंदूच्या शिक्षणीक वर्सा 56 सरकारी प्राथमीक शाळांनी मेळून 1035 विद्यार्थी आसात जाल्यार 17 अनुदानीत प्राथमीक शाळांनी 1549 विद्यार्थी आसात. काणकोण पालिका हद्दींतल्या पाळोळें आनी पाटणे हांगच्या सरकारी मिडल स्कुलांनी दरेकी 9 आनी 11 विद्यार्थी आसात.
6 सरकारी हायस्कुलांत आनी 17 अनुदानीत हायस्कुलांनी मेळून 4132 विद्यार्थी शिक्षण घेतात. एक सरकारी हायर सेकंडरी आनी 4 अनुदानीत हायर सेकंडरींत मेळून 1210 विद्यार्थी आसात. काणकोण तालुक्यांत प्राथमीक तें हायर सेकंडरी मेळून वट्ट 7926 विद्यार्थी आसात. शिक्षकांचो उणाव आशिल्ल्यान 20 शिक्षकांची नेमणूक करपाचो प्रस्ताव शिक्षण खात्याक धाडला अशें परेरान सांगलें. 8 शिक्षक कंत्राटी पद्दतीचेर आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
