भांगरभूंय | प्रतिनिधी
नवी दिल्ली, खबरां संस्था: आतां पदवीधरांकूय देशांतल्या उच्च शिक्षण संस्थांनी प्राध्यापक म्हणून शिकोवपाक मेळटलें. अट इतलीच आसा, तांचे मदीं उद्देजकताय, स्टार्टअप अशीं जायतीं नवीं क्षेत्रां आनी उद्देग सुरू करपाचें पिशें आसपाक जाय. पदवी, पद्व्युत्तर आनी पीएचडीचे विशय वेगवेगळे आसल्यार तांकांय शिक्षक म्हणून भरती करपाक मेळटले. संशोधन पेपर प्रकाशन सारकिल्ल्या परंपरीक आदर्शच्या समांतर उमेदवारांच्यो स्टार्टअप कल्पना, उद्येजकतायेंत योगदान, संशोधन वेपारीकरण, पेटंट आनी उद्देग भागीदारी निर्माण करपाची तांक अशे जायते आदर्श जोडटले. विद्यापीठां आनी कॉलेजींनी शिक्षक आनी हेर कर्मचार्यांचे नियुक्तीची पात्रताय आनी आदर्श कायम दवरपाक यूजीसी २०१८ च्या नियमांत बदल करतली.
सध्या ४ वर्सांची पदवी वा पदव्युत्तरा सयत पीएचडी करप ही प्राध्यापक भरतीची उण्यात उणी पात्रताय आसा. रिसर्च पेपरची संख्या भरती सोंपी करता. सध्याच्या नेमां प्रमाण, उमेदवाराची पदवी, पदव्युत्तर आनी पीएचडी समान विशयांत आसपाक जाय. वेगळे विशय आसल्यार भरतीची परवानगी ना. प्राध्यापकाक पदोन्नती खातीर एपीआय (अकॅडमीक परफॉर्मन्स इंडिकेटर) स्कोअर चडांत चड दवरचो पडटा. यूजीसीन प्राध्यापक भरती २०१८ च्या नेमांचो सविस्तर आढावो घेतलो. त्याच आदारार नवो मसुदो तयार केलो. प्राध्यापक प्रतिभावंत आसचे अशें यूजीसी अध्यक्षांनी म्हणलें. राष्ट्रीय शिक्षण धोरण- २०२० चे नदरेन पळयल्यार २०१८ चे नेम खूब पोरणे जाल्यात. भारतीय उच्च शिक्षण संस्थांक आपल्या संवसारीक सर्तींत सुधारणा करपा वांगडा देशाचे उदरगतींत योगदान दिवपा खातीर सगळ्यांत उत्कृश्ठ प्रतिभा आशिल्ल्यांक भरती करचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
