भांगरभूंय | प्रतिनिधी
भांगरभूंय । प्रतिनिधी
पणजीः गोंय विद्यापिठांत पुराय वेळ समुपदेशकाची नेमणूक करपाची मागणी एनएसयूआयच्या गोंय फाट्यान केल्या. संवसारीक मानसीक भलायकी दिसा निमतान शिक्षण संचालक कौस्तुभ कामत हांका हे मागणेचें निवेदन तांणी सादर केलां.
मानसीक तणाव ही सद्या देशांतली सगळ्यांत व्हडली समस्या जाल्या. विद्यार्थ्यां मदीं ही समस्या व्हडा प्रमाणात आसा. ल्हान-व्हड एनओजी पसून संवसारीक भलायकी संघटने मेरेनच्या पांवड्यार हे समस्येचेर तोडगो काडपाचें काम सुरू आसा अशें एनएसयूआचो अध्यक्ष नौशाद चौधरी हाणे सांगलें. गोंय विद्यापिठांत वाठारांत दोन हजारां परस चड विद्यार्थी आसा. तातूंतले बरेच जाण मानसीक तणावाक लागून येवपी डिप्रेशनाक तोंड दितात. कोविडाक लागून हें प्रमाण चड वाडलां. सध्या समुपदेशक सप्तकांत दोन फावट विद्यापिठांत येतात. विद्यार्थ्यांचो आंकडो पळयल्यार पुराय वेळ समुपदेशकाची गरज आसा अशें तांणी सांगलें.
अदूंच्या मानसीक भलायकी दिसाचें मानसीक भलायकी आनी सगल्यांचें कल्याण जागतीक प्राधान्य अशें घोश वाक्य आसा. ताचें अनुकरण करून विद्यार्थ्यांच्या मानसीक भलायके खातीर विद्यापिठान काम करपाक जाय अशें चौधरी हांणी म्हणलां. मानसीक भलायकेचो मुद्दो खंयचीय संघटना घेना कारण तांकां फकत राजकारण करपाचें आसता असो आरोप एनएसयूच्या कुठ्ठाळी गटाचो अध्यक्ष शेन रिबेलो हांणी ह्या वेळार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
