भांगरभूंय | प्रतिनिधी
पणजी: राज्य वेंचणूक आयोगान विशेश मतदार वळेरी उजळणी मोहिमे वरवीं तयार केल्लो मतदार वळेरी मसुदो १६ डिसेंबर २०२५ दिसा प्रकाशीत केल्लो. ज्या मतदारांचीं नांवां हे मसुदो मतदार वळेरेंत आसात, अशा मतदारांनी नोंद घेवपाक जाय, की जर तांणी खंयच्याय विदेशी देशाचे नागरीकत्व घेतिल्लें आसत जाल्यार तांणी मतदार वळेरेंतल्यान आपलें नांव काडपा खातीर अर्ज ७ भरून संबंदीत मतदार नोंदणी अधिकार्याक सादर करपाक जाय. जर खंयचीय व्यक्ती भारतीय नागरीक नासल्यार ती व्यक्ती लोक प्रतिनिधीत्व कायदो १९५० च्या कलम १६ (१ ) ( अ) प्रमाण मतदार वळेरींत नोंदणी करपाक अपात्र थारता.
तशेंच, जर खंयचीय व्यक्ती मतदार वळेरी तयारीचें काम, उजळणी वा दुरूस्ती वा मतदार वळेरेंत नांवाचो आस्पाव वा नांव वगळावपा बाबतींत चुकीची म्हायती/ जाहीरनामो दिता आनी ती म्हायती/ जाहीर नामो चुकीची आसा वा ताका खबर आसा की ती म्हायती/ जाहीरनामो बरोबर ना, अशा वेळार त्या व्यक्तीक लोक प्रतिनिधीत्व कायदो १९५० च्या कलम ३१ प्रमाण एक वर्स मेरेन बंदखण वा दंड वा दोनूय ख्यास्त जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
