भांगरभूंय | प्रतिनिधी
म्हापशेंः विदेशी नागरिकांक भाडेकार म्हणून घरांत दवरतना पुलिसांक सी फॉर्म आनी सत्यापन अर्ज पुलिसांक सादर करूंक नाशिल्ल्यान राज्यांतल्या स घर धनयां आड पुलिसांनी गुन्यांव केला. फाटल्या पांच म्हयन्यांत हणजूण, मांद्रें, म्हापशें, वेर्णा आनी कोलवा पुलिसां कडेन ह्यो 6 केशी नोंद जाल्यात. तशेंच राज्यांत बेकायदेशीर रावपाच्या आरोपांत 23 विदेशी नागरिकांक पुलिसांनी अटक केल्या.
हणजूण पुलिसांनी परम व्हर्ती (शिवोली बार्देस), समीत अनंत धारगळकार (ओशेल शिवोली बार्देस), मांद्रें पुलिसांनी लिओनार्ड ग्रासिएस डिसोझा (हरमल पेडणें), म्हापशें पुलिसांनी मारिओ फर्नांडीस (पर्रा बार्देस), वेर्णा पुलिसांनी लिझेट फर्नांडीस (कांसावली, मुरगांव), कोलवा पुलिसांनी कुसूम शर्मा (माजोड्डें साश्ट, मूळ जयपूर) हांचेंआड गुन्यांव नोंद केल्यात.
फाटल्या कांय म्हयन्यां सावन राज्यभर गोंय पुलीस नेमान तपासणी मोहीम आनी बेकायदो गजालीं सोदून काडपाक वा आडावपा खातीर आनी अंतर्गत सुरक्षा सांबाळपाक सुरवात केल्या.
ह्या मोहिमे खाला भाड्याच्या जाग्यार वा सोयऱ्यांच्या घरांनी रावपी विदेशी नागरिकांनी विदेशी कायद्या खाला सक्तीच्या नोंदणी नेमांक पाळो दिला काय ना हाची तपासणी करतात. ते प्रमाण सक्तीचो सी फॉर्म सक्षम अधिकाऱ्यांक सादर करिनासतना विदेशी नागरिकांक भाडेकार म्हणून दवरपी वयल्या स व्यक्तीं आड गुन्यांव नोंद जाल्यात आनी संबंदीतांचेर गरजेची कायदेशीर कारवाय सुरू केल्या.
मजगतीं, वयल्या काळांत 23 विदेशी नागरिक राज्यांत बेकायदेशीर रितीन रावतात अशें दिसून आयलें. तातूंतले 21 उत्तर गोंयांत आनी 2 दक्षीण गोंयांत मेळ्ळे. कायद्या प्रमाण संबंदीत लोकां आड कारवाय सुरू आसा.
विदेशी कायदो, 1946 आनी संबंदीत नेमा प्रमाण सी फॉर्म भरप ही म्हत्वाचें. ज्यांतूंत घर धनी, गेट हाऊस ऑपरेटर वा रावपाची सुवात पुरवणदारान विदेशी नागरिकांक दिले उपरांत 24 वरां भितर तांच्या रावपा विशीं म्हायती दिवप सक्तीचें आसा. राज्यांत येवपी विदेशी नागरिकांची सुरक्षीतताय आनी सोद घेवपाची तांक सुनिश्चीत करपा खातीर हें गरजेचें आसा.
विदेशी नागरिकांक भाडेकार म्हणून दवरपी लोकांनी सी फॉर्मा संबंदी कायदेशीर गरज खरपणान पाळची. हाचें उल्लंघन केल्यार खर दंडात्मक कारवाय जातली. तशेंच अशे तरेचे उल्लंघन केल्यार लागींच्या पुलीस स्टेशनाचेर वा गोंय पुलीसाच्या अधिकृत मार्गांतल्यान कळोवपाचें आवाहन पुलिसांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
