भांगरभूंय | प्रतिनिधी
म्हारगायेचे बाबतींत देशांतल्या हेर राज्यां मदीं आमच्या गोंयचो पयलो क्रमांक लागता. म्हानगरांतलीं जिणेंशैली गोंयच्या खेडेगांवांनी पसून पावल्या, अशें म्हणल्यार तें चुकीचें थारचें ना. म्हारगाय आसली तरी जगचें पडटा….. आनी ते खातीर पयसो, चड पयसो, आनीक चड पयसो जाय. बऱ्या मार्गान तो जोडपाक मेळटा. पूण, झटपट दुडवाकार जावंक सोदपी, कांय जाण तो चुकीच्या मार्गान जमयतात. थोडे बाबडे काटकसर करून जगतात. उरिल्ले, पयसो कोण दिता वा दिसपट्ट्यो गरजो कोण पुराय करता, तांचे फाटल्यान लाचार जावन धांवतात. भ्रश्टाचार, गैरवेव्हार वाडला ताका म्हारगाय जापसालदार आसा. निदान कांय प्रमाणांत तरी. पयसो जोडपाक नोकरी जाय वा वेवसाय, धंदो. चडश्यांक नोकरेची आवड. तातूंत सरकारी मेळ्ळ्यार देव पावलो!! भारता परस विदेशांत चड पगार मेळटा. थंयचे 1000 डाॅलर हांगा पावतकच 83 हजार रुपया जातात. म्हणटकच कशेय भशेन विदेशांत वचपाक लाखांनी भारतीय उचांबळ जाल्ले आसतात. तातूंत गोंयकारांक पुर्तुगेज पासपोर्टाक लागून भायर वचप इल्लें सोंपें जालां.
गोंयकार गोंयचेर मोग ना, तांकां गोंय आवडना, म्हूण पुर्तुगेज पासपोर्ट घेनात, तर फक्त पोट भरपाक युरोपांत वचपा खातीर तो घेतात, अशें चर्चील आलेमांव म्हणटात, तातूंत तथ्य आसा. निवृत्त जातकच वा ताचे पयलीं बरेच जाण परत गोंयांत येतात. फाटल्या 10 वर्सांच्या काळांत 28 हजारां परस चड गोंयकारांनी भारतीय पासपोर्ट सरंडर केल्यात. हांगाचें नागरिकत्वूय सोडलां. कारण पुर्तुगाल वा हेर कांय देशां प्रमाण भारतांत दोन नागरिकत्वां मेळनात. पूण, हालींसराक तांचें भारतीय नागरिकत्व कायम उरचें, हे खातीर भाजपा लोकप्रतिनिधींनीय आवाज काडला. घडये ही तरतूद मान्य पसून जायत!! ह्या नागरिकत्व सोडपाच्या प्रस्नाचेर गोंय सरकाराची 17, 18 फेब्रुवारीक गृह आनी परराष्ट्र वेव्हार मंत्रालया कडेन बसका जावपाची आसा. भारतीय पासपोर्ट सोडून विदेशांत वचपाची ही पद्दत तशीं पयलीं सावन चालू आसा. ती आडावप सरकाराक शक्य ना. मुख्यमंत्र्यान तशें स्पश्ट केलां. बिहार, उत्तरप्रदेश, ओडिशांतल्यान मानाय, कामगार गोंयां सयत साबार राज्यां आनी म्हानगरांनी वतात. आपल्या राज्यांत नोकरी, वेवसाय उण्या प्रमाणांत आसा, म्हणून तांकां वच्चेंच पडटा. बरो पगार, दिसवडो, बरी जीण, चड पगाराची नोकरी, शिक्षण हींय कारणां आसात. विदेशांतूय हाकाच लागून लोक वतात. युरोप, अमेरिकेंतले लोक नोकरे खातीर भारतांत येतले, इतलो आमचो देश विकसीत जावंक जाय. हें आव्हान आमच्या सरकारांनी स्विकारचें. 2022 त पासपोर्ट सरंडर करपी भारतीयां मदले 45.2 टक्के गोंयकार आशिल्ले. 2019 तर ही टक्केवारी 64.31 टक्के आशिल्ली. प्रत्येक देशांतले हुशार नागरीक अमेरिकेक वतात. ताचो फायदो अमेरिकेक जाला आनी लुकसाण संबंदीत देशांक, हाचो विचार आमी भारतीयांनी करपाक जाय.
आमची समाजीक जिणूय सुदारपाक जाय. तिचो दर्जो वाडपाक जाय. खंयच्याय कारणा वयल्यान लोकांक खुबळावन घालप. फक्त सुवार्थाचोच विचार करप. तकली वापरिनासतना खंयचेय गजालीचेर विस्वास दवरप हेंय चुकीचें. विदेशांत जंय पयसो, शांत जीण आसा थंय चड करून लोक वतात आनी ते खातीर तांकां कोण आडावंक शकना. गोंयांत बेकारी वाडपाक लागल्या. विधानसभेंत दिल्ले लेखी म्हायतींत गोंयांत 1 लाख 53 हजार 989 सुशिक्षीत बेकार तरणाटे आसात. अर्थांत ते काम करतात, पूण ते बऱ्या पगाराचे नोकरेची वाट पळयतात. हातूंत पांच हजारां वयर अभियंते आनी पदव्युत्तर शिकिल्ले (एमए, एमकाॅम बी) साडे इकरा हजारां वयर आसात. सगल्यांकूच सरकारी नोकऱ्यो मेळप शक्यूच ना. निवृत्ती पिराय देंवयली जाल्यार घडये त्यो बेगीन मेळत. म्हणटकच हो सुशिक्षित वर्ग पासपोर्टाचो त्याग करून दुसऱ्या देशांत गेलो (थोडे थंयच स्थायिक जातात) जाल्यार ताका दोश दिवपाक मेळचो ना. फक्त अल्पसंख्यांक समाजांतलेच तरणाटे भायर वतात, असो एक गैरसमज कांय गोंयकारां मदीं आसा. पूण तो चुकीचो. सगल्या धर्माचे गोंयकार युरोप, अमेरिकेंत आसात. तेन्ना ह्या मुद्द्या कडेन एके विशिश्ट नदरेन पळोवप्यांनी आपलीं रंगीत वक्लां काडून बोल्साक लावचीं.
गोंयकार विदेशांत कसली नोकरी करतात, ताचो अभ्यास करून तांकां हांगा संद दिवपाचो यत्न जावंक जाय. चडशे 10- 12 वर्सां खातीर वता आसले, तरी तांचे हुशारीचो, कुशळटायेचो फायदो गोंयाक जायना. थंय मेळटा तितलो पगार हांगां दिवप शक्य जातलेंच अशें ना. निदान ह्या दोट्टी पासपोर्ट, नागरिकत्वाचेर तरी वेंचणुके पयलीं विचार जावचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
