भांगरभूंय | प्रतिनिधी
आमच्या देशांत बेकायदेशीर पद्दतीन रावप्यांचो उणाव ना. शिमे वयल्या सगल्या राज्यांनी हजारांनी विदेशी कसलींच कागदां नासतना रावतात. आतां भितरल्या कांय जाणांक भारतीय नागरिकत्व मेळ्ळां. तर थोडे थळाव्या राजकी फुडाऱ्यांच्या आशिर्वादान 20 -30 वर्सां पसून भारतांत रावतात. आमच्या गोंयांत फाटल्या कांय दिसांनी बांगलादेशी सांपडल्यात. थोडे न्हय, विसां वयर. फुडल्या कांय दिसांनी हो आंकडो वाडूं येता. तांकां बेगोबेग तांच्या गांवघरा धाडपाची वेवस्था करुंक फावो. कारण खंयचोय विदेशी धुंविल्ल्या तांदळा परस नितळ आसलो तरी, ताका सरकारी सोपस्कार पुराय केले बगर दुसऱ्या देशांत रावपाक मेळना. सरकारां कांय वेळा झुजां वा सैमीक संकश्टाक लागून विस्थापीतांक आश्रय दिता. पूण तांकां गांवा भायर खाशेली वेवस्था करून दवरता. कांय वेळार परतून तांच्या देशांत धाडटा. स्थलांतरां शेंकड्यांनी वर्सां सावन जायत आसात. भारतात तीं नवीं न्हय. हालींच्या वर्सांनी कांय अरबी राष्ट्रांनी लोकांक जीव वाटावपाक देश सोडचो पडला. तो सोडटना बऱ्याच लोकांक बुडून मरण पसून आयलां.
गोंयांत कावल (भंगार) घेवन प्लास्टिकाची आयदनां विकपाचें वा कावल अड्ड्यांचेर बरेच भायले लोक काम करतात. तातूंतले कांय बांगलादेशी आसात, असो पुलिसांक दुबाव आसा. ते नदरेन तांणी तपास सुरू केला. हे सगलेच आकांतवादी कारवायांनी घुस्पल्यात अशें कांय जाणांक दिसता. खरेंच तशें आसा काय कितें तें पुलिसांक चड बरें खबर आसतलें. हालींच पाॅप्युलर फ्रंटाच्या कार्यालयांचेर धाडी पडल्यो. तातूंत ते आतंकवाद्यांक पयश्यांची पुरवण करताले, असो आरोप तपास यंत्रणांनी केला. तांचे कडेन पुरावे आसतलेच. ते बेगोबेग न्यायालयांत सादर करून दोशी व्यक्तींक ख्यास्त जातली, हे खातीर तांणी आतां कामाक लागचें. मुंबय बाॅ म्बस्फोट प्रकरणाचो निकाल लागपाक वर्साचीं वर्सां लागलीं, तशें परतून जावचें न्हय.
परदेशांतल्यान लोक येतात. तांकां जो कोण हांगा हाडटा, ताका धरीत जाल्यार तपासाचीं चक्रां बेगीन घुंवतलीं. म्हणल्यार तांकां हांगां भाड्यान घरां कोण दितात, आधारकार्ड (तीं बोगस अशें आयकूंक येता.) कोण दितात, लायट- उदक कोण दितात, सरकारी नोकऱ्यो कोण दितात…. ह्या सगल्या प्रस्नांच्यो जापो सोदपाचो यत्न जावपाक जाय. होच न्याय परराज्यांतल्यान आयिल्ल्यांकूय लावं येता. पूण, ते भारतीय नागरिक आशिल्ल्यान तांकां परत तांच्या राज्यांत धाडपाक मेळना. तांचीं स्वताचीं राज्यां अविकसीत आशिल्ल्यान पोटा खातीर तांकां महानगरां वा गोंयां सारक्या विकसीत राज्यांत वच्चें पडटा. फाटल्या 75 वर्सांतली उदरगतीची असंतुळा हें ताचे फाटलें एक कारण. भूक सोंसना म्हणटकच दोन गोटे मेळटा थंय गरिबांक वच्चेंच पडटा. सुकणीं- सावदां वतात. पूण तांकां शीम लागना. ती लागता मनशांक. आमकां कायदेय लागतात. व्हिसा, पासपोर्ट आनी हेर सगलीं कागदां आसले बगर दुसऱ्या देशांत पावल पसून दवरूंक मेळना. दवरल्यार सरळ बंदखण. ज्या देशांचे एकमेकां कडेन बरे संबंद आसात. तांकां हे कायदे सहसा लागनात. थंय ह्या देशांतल्यान त्या अशें स्थलांतर केल्यार तो गुन्यांव थारना. आमच्या भारतांत पसून बांगलादेश, पाकिस्तान हे देश सोडल्यार हेर देशांच्या नागरिकांक मुक्तद्वार आसा. आफ्रिकी देश, रशियेचे लोकूय हांगा वर्साचीं वर्सां रावत आयल्यात.
भायल्यान लोक येतात, तांची सारकी चवकशी करीनासतना भाड्यान रावपाक घर दिवपीय तितलोच दोशी म्हणचो पडटलो. बांगलादेशींक थंयच्यान कांय वर्सां पयलीं आयिल्ल्या व्यक्तीनूच गोंयांत हाडल्यात अशें उक्ताडार आयलां. जोडटा तातूंतले अमूक पयशे आपल्याक दिवचे, हे अटीचेर जाल्ली ही मनीस तस्करी न्हय मू, हाचोय तपास जावचो. बोटींच्या टँकरांनी लिपून इंग्लंड, अमेरिकेक वतना कांय वर्सां पयलीं घुस्मटून लोक मरपाची घडणूक घडिल्ली. कायदो माड्डून वचप आनी धरलेच जाल्यार बंदखणींत बसप वा सरकारी खर्चान परत मायदेशांत येवप. कांय गांवांनी, शारां कुशीच्या उपनगरांनी भाड्याक दवरप हो वेवसाय जाला. ल्हान- ल्हान कुडी काडप आनी तीन ते पांच हजारां मेरेन भाडें घेवप!! तांकां भाड्याक दवरतना सगलीं कागदां तपासून पळोवप ही घरधनयाची लागणूक. मात हें जायना. गोंयांत गुन्यांव वाडल्यात, तातूंत परप्रांतीय चड आसात, असो आरोप जाला. तेन्ना सरकारी यंत्रणेन सादूर रावचेंच, पूण ताचे परस चड समाजानूय जागृत रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
