विदेशांत रावपी गोंयकारांच्या नशिबांत आसतलो मानकुराद

भांगरभूंय | प्रतिनिधी

निर्गत करपा खातीर मोपा येतलें पॅकहावजः शेतकी संचालक

पणजीः विदेशांत रावपी गोंयकारांक आतां मानकुराद आंब्याचो घोस्त काडपाक मेळटलो. युरोप आनी आखाती देशांनी गोंयच्या शेतकी पिकांची आयात करपा खातीर मोपा विमानतळार पॅकहावज बांदतले. येता त्या एप्रील म्हयन्यांत ह्या प्रकल्पाचें काम चालीक लागतलें. एकदां हें पॅक हावज तयार जाले उपरांत गोंयची शेतकी पिकां आनी प्रक्रिया केल्ली उत्पन्नांची विदेशांत हवाई मार्गा वरवीं निर्गत जातली, अशी म्हायती शेतकी खात्याचे संचालक संदीप फळदेसाय हांणी दिली.

भांगरभूंय कडेन उलयतना फळदेसाय हांणी सांगलें, मुख्यमंत्री प्रमोद सावंत हांणी 2026-27च्या अर्थसंकल्पांत मोपा अांतरराष्ट्रीय विमानतळार पॅकहावज बांदून कार्यरत करपाची घोशणा केल्ली. हे नदरेन पयलें पावल मारून आमी गोवा एग्रिक्लचर लायव्हस्चो प्रड्युसींग बोर्ड आनी जीएमआर हांचे भितर हालींच एक कबलात केल्या.

हे कबलाती भितर मोपा विमानतळार पॅकहावज बांदपाचो निर्णय जाला. जर आमी भायल्या देशांनी देशात हवाई कार्गो वरवीं निर्गत करतले जाल्यार तो म्हाल मार्गदर्शक तत्वां आनी एसओपी प्रमाण पॅकहावजांत पॅक करप सक्तीचें आसा. गोंयांत दोन अांतरराष्ट्रीय विमानतळ आसात. पूण तांचे 300 मिटर त्रिज्या भितर सद्या एकय पॅकहावज ना. हे नदरेन मुख्यमंत्री प्रमोद सावंत हांणी ही घोशणा केल्ली, अशें फळेदसाय हांणी म्हणलें.

शेतकी आनी प्रसंस्कृत अन्न उत्पन्न निर्गत उदरगत प्राधिकरण (एपेडा) हे केंद्रीय संस्थेच्या मार्गदर्शक तत्वा प्रमाण हो पॅकहावज आमी गोंयांत घालतले. हो पॅकहावज बांदपाक एपेडा 90 टक्के अनुदान लेगीत दितलें. ह्या पॅकहावजांतल्यान आमचे गोंयचे शेतकार आसात. बारीक अन्न प्रक्रिया करपी वेवसायीक आसात ते आपलो म्हाल भायल्या देशांनी निर्गत करपाक शकतले, अशी म्हायती फळदेसाय हांणी दिली.

गोंयचो मानकुराद आंबो गोंयकारांचे सारके जिबेर बशिल्लो आसा. शेतकारांनी जर तो व्हड प्रमाणांत लायत जाल्यार तो आमी निर्गत करपाक शकतले. तशेच कितल्योश्योच भाजयो आसात जशे की भेंडो, हरवी तशेंच हवमानाक अनुकूल पीक लायत जाल्यार तें व्हड प्रमाणांत निर्गत करपाक शकतले. प्रक्रिया केल्ले अन्न जशे की लोणचें, फेणी निर्गत करीत जाल्यार तांकां बरी दर मेळटली, अशें फळदेसाय हांणी सांगलें.

पॅकहावज खातीर गोंयच्या शेतकारांनी व्हड प्रमाणांत म्हाल तयार करचो. शक्य आसा जाल्यार सेंद्रीय पद्दत तयार करची. बारीक प्रक्रियादार आसात तांणी प्रक्रिया केल्लें अन्न व्हड प्रमाणांत तयार करचें, असो उलो फळदेसाय हांणी मारलाे.

येता त्या एप्रील म्हयन्यांत एपेडाक आमी प्रस्ताव दितले. मुख्यमंत्री डॉ. प्रमोद सावंत हांणी एपेडाच्या चेरमनाक पत्र लेगीत बरयलां ते प्रमाण येता तें अर्थीक वर्स 2026-27सात हो प्रस्ताव मान्य करता म्हूण एपेडाचे चेरमन हांणी आस्वासन दिलां. एकदां मान्यताय मेळ्ळे उपरांत पॅकहावजाचें काम सुरू जातलें, अशें संदीप फळदेसाय हांणी सांगलें.