विदेशांत पळपाचें वेसन

भांगरभूंय | प्रतिनिधी

पोट भरपा खातीर कोणाकूय खंयूय वचपाचो अधिकार आसा. देशांत वा विदेशांत. मात, विदेशांत गेल्यार कायदेशीर मार्गान वचपाक जाय, थंय वचून बेकायदेशीर अशें कांय करपाक जायना. बरेच लोक लिपचोरयां विदेशांत वतात, अशें दिसून आयलां. हालींच ब्रिटनान आपल्या देशांत आयिल्ल्या विदेशींचो आंकडो कितलो तें जाहीर केलां. 2022 त 2612 भारतीय थंय गेल्ले. 2023 त हो आंकडो वाडून 5253 चेर पावलो. ह्या सगल्यांनी आपणाक आलाशिरो दिवचो, अशी मागणी केल्या. हातूंत डंकी मार्ग म्हणल्यार इंग्लीश चॅनल बेकायदेशीर रितीन हुपून ब्रिटनांत वचपी 1192 भारतीय आसात. 2022 त 748 जाण आशिल्ले. अमेरिकेंतूय बेकायदेशीर पद्दतीन वचपी उणे भारतीय नात. पेल्या वर्सा 65 हजार, तर पोरूं 1 लाखां वयर भारतीय थंय गेल्यात. हाचे भायर कायदेशीर वतात, ते वेगळे.
बेकायदेशीर पद्दतीन वचपी फक्त भारतीयूच नात, तर आशिया, आफ्रिका खंडांतल्या गरीब देशांतले बरेच लोक आसात. अर्थात पोट भरपा खातीर. ल्हान- ल्हान बोटींनी ते ब्रिटनांत वतात. तांकां गुपचूप थंय व्हरून सोडपी कांय लोक आसात. अर्थांत जीव पणाक लावन थंय वच्चें पडटा. कारण ल्हान बोट दर्यांत उमथूंक शकता. शिमेचेर सुरक्षा यंत्रणां आसता. तरीय हो धोक्याचो मार्ग स्विकारपाक हे लोक अनमननात. कांय जाण व्हडल्या बोटींनी लिपून वतात. कांय वर्सां पयलीं म्हाल व्हरपी बोटींतल्या कंटनेरांनी कांय लोक सांपडिल्ले. ते घुस्मटून मरपाचे. थंय वचप, मागीर भारतीय दुतावासाक मजत करपाक सांगप. कांय जाण थंय आलाशिरो मागपी अर्ज करतात. तांकां तो मेळ्ळो जाल्यार सुटले, नातर परत घरवापसी. ब्रिटनांत पांच वर्सांतल्यान फक्त तीन फावटी तसो अर्ज करपाक मेळटा. 2023 वर्सा थंय गेल्ल्या 5,253 मदल्या फक्त 140 जाणांच्या आलाशिरो अर्जाचेर विचार जाला. आतां उरिल्ल्यांचे अर्ज विचारांत घेतले काय तांकां परत भारतांत धाडटले, तें कळटलें.
विदेश म्हणलो काय नाक मुड्डुपी लाखांनी लोक भारतांत आसात. निदान सोशल मिडियाचेर तरी ते तशे दाखयतात. पूण संद मेळ्ळ्यार, ते आनी तांचीं घरचीं विदेशांत धांवपाक एका पांयार तयार! विदेशा विशीं वयलेचाराक दुस्वास आसलो वा तसो तो दाखयलो तरी भितरल्यान प्रत्येकाक विदेशाचें सुप्त आकर्शण आशिल्ल्याचें जाणवता. अमेरिकेचें तर पयलीं सावन, पूण कॅनडा, ब्रिटन, आॅस्ट्रेलिया, सिंगापूराची ओढ लागिल्ले तरणाटे 40 वर्सां पयलींय दिसताले. सगल्यांचेंच सपन साकार जाल्लें ना, तरी आमकां भारतीयांक विदेशाची ओड लागिल्लीच आसता, हें कोडू सत्य.
आमच्या गोंयांतूय बऱ्याच जाणांक विदेशाक, खास करून युरोपाक वचन दिसता. नोकरे खातीर. पूण युरोपाकूच कित्याक, तर पुर्तुगेझ पासपोर्ट गोंयकारांक सोंपेपणी मेळटा. अर्थांत तो घेतकच गोंयकारांक भारताचें नागरिकत्व सोडचें पडटा. हेर देशां सारकें हांगां दोन देशांचे नागरीक जावंक मेळना. पुर्तुगाली पासपोर्टाच्या आदारान युरोपांत, खास करून लंडनाक नोकरी मेळ्ळी जाल्यार गोंयकार परत येतातूच अशें ना. थोडे येता आसतले, पूण युरोप, अमेरिकेक गेल्ले चडशे भारतीय थंयच स्थायीक जाल्यात. खास करून तांचीं भुरगीं. मात, फुडाराक पुर्तुगालाचे पासपोर्ट मेळपूय बंद जावं येता. कारण हालींच पुर्तुगालाच्या भारतीय दुतावासान 20 डिसेंबर 1961 गोंयकारांक वा तांच्या भुरग्यांक, नातरांक पुर्तुगेझ पासपोर्ट दिवपाचें बंद करचें, अशी शिफारस पुर्तुगाल प्रशासनाक केल्या खंय. ती मान्य जाली जाल्यार व्हाया पुर्तुगाल युरोपांत वचपाचें सपन भंगपाची भिरांत आसा. पूण, थंय वचपी गोंयकार हे कायदेशीर मार्गान वतात, बेकायदेशीर न्हय. 1192 भारतीय बेकायदेशीर रितीन ब्रिटनांत पावल्यात, तातूंत 60 टक्के तरणाटे आसात. 18 ते 29 वर्सां पिरायेच्या गटांतले. बऱ्या पगाराचे नोकरेचे आशेन ते गेल्यात. फाटल्या फेब्रुवारी म्हयन्यांतूच दोन हजारां वयर लोकांनी (सगल्या देशांचे) ब्रिटनांत घुसपाचो यत्न केलो. तातूंत ते यशस्वीय जाले. म्हणटकच अमेरिका आनी हेर देशांनी वचप्यांचो आंकडो कितलो आसतलो (बेकायदेशीर लोकांचोच) ताचो अदमास करचो. फ्रान्सा सारक्या देशान दुबावीत विदेशींक परत मायदेशांत धाडप सुरू केलां. भारतांतूय बांगलादेश, नेपाळांतल्यान हजारांनी लोक आयल्यात. नेपाळ आनी भारताचे संबंद बरे आशिल्ल्यान तांकां पासपोर्ट आनी हेर कायदेशीर गजाली करच्यो पडनात. पूण हेरांचें कितें? आव जाव घर तुम्हारा, हो प्रकार आनीक कितलो तेंप चलोवन घेवपाचो?
भारतीय तरणाट्यांक देशांतूच मना सारकी नोकरी मेळत जाल्यार हें उठसूठ विदेशांत पळपाचें वेसन ना जातलें. ते नदरेन सरकारांनी यत्न करुंक फावो.