भांगरभूंय | प्रतिनिधी
परराश्ट्र राज्यमंत्री कीर्ति वर्धन सिंह हांची राज्यसभेंत म्हायती
नवी दिल्ली, खबरां संस्था ः विदेशांतल्या भारतीयांच्या मुद्दांचेर शुक्रारा संसदेंत चर्चा जाली. ह्या वेळार केंद्र सरकारान विदेशांतल्या बंदखणींत आशिल्ल्या भारतीयां विशीं म्हत्वाची म्हायती दिली. 10 हजारां परस चड भारतीय परदेशी बंदखणींत आसात, जाल्यार आतां मेरेन 49 जाणांक फांशीची ख्यास्त फर्मायल्या अशें केंद्रीय परराश्ट्र राज्यमंत्री कीर्ति वर्धन सिंह हांणी राज्यसभेंतल्या प्रस्नाक जाप दितना सांगलें.
मंत्रालया कडेन उपलब्ध आशिल्ले म्हायती प्रमाण, सध्या विदेशांतल्या बंदखणींनी अंडरट्रायल सयत भारतीय कैद्यांचो आंकडो 10,152 आसा. विदेशी बंदखणींत आशिल्ल्या भारतीय नागरिकांची सुरक्षीतताय आनी कल्याणाक सरकार प्राधान्य दिता. तशेंच कीर्तिवर्धन सिंह हांणी 8 देशां कडेन संबंदीत डेटा शेअर केलो. युएईंत फांशीची ख्यास्त फर्मायल्ल्या भारतीय नागरिकांचो आंकडो 25 आसा. पूण ह्या निर्णयाची अंमलबजावणी आजून जावंक ना अशेंय तांणी स्पश्ट केलें.
आंकडेवारी प्रमाण, युएईंत 25, साउदी अरेबियांत 11, मलेशियांत 6, कुवेतांत 3 आनी इंडोनेशिया, कतार, अमेरिकेंत आनी येमेनांत दरेकीं एक आसात. मलेशिया, कुवेत, कतार आनी साउदी अरेबियांत फांशी दिल्या अशें कीर्तिवर्धन सिंह हांणी सांगलें. मजगतीं, 2024 वर्सा कुवेत आनी साउदी अरेबियांत 3 भारतीयांक फांशी दिली, जाल्यार झिंबाब्वेंत एकल्याक फांशी दिली. 2023 वर्सा कुवेत आनी साउदी अरेबियांत दरेकीं पांच भारतीयांक आनी मलेशियांत एकल्याक फांशी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
